جاڭاارقا اۋدانىنداعى اقتۇبەك اۋىلى ەرمۇرات زەكەن سىندى ۇلدارىن ورىندى ماقتان ەتەدى. مەديتسينالىق جوعارى وقۋ ورنىن بيىل عانا تامامداعان جاس مامان كوروناۆيرۋس ينفەكتسياسى قۇتىرىپ تۇرعان كۇردەلى كەزەڭدە تۋعان اۋىلىنا كومەك قولىن سوزعان.
ەرمۇرات زەكەن قاراعاندى مەملەكەتتىك مەديتسينا ۋنيۆەرسيتەتىن ءتامامداي سالا, ماۋسىم ايىندا وبلىس ورتالىعىنداعى پروۆيزورلىق ورتالىقتا ەرىكتى رەتىندە جۇمىس ىستەگەن. جاس مامان باسىن قاۋىپ-قاتەرگە تىگە ءجۇرىپ, نەبىر جاۋاپتى ىستەردى اتقاردى. ءسويتىپ ءجۇرىپ ءوزىنىڭ تۋعان اۋىلىن دا ءبىر ءسات ەستەن شىعارماعان. ال بۇل كەزدە ەرمۇراتتىڭ كىندىك قانى تامعان اقتۇبەك اۋىلىندا جاساندى وتتەگى اپپاراتتارىنىڭ جەتىسپەۋشىلىگى قاتتى سەزىلىپ تۇرعان بولاتىن.
ماسەلەنىڭ ءمان-جايىنا قانىققاننان كەيىن ەرمۇرات جەرلەسى ازامات سماعۇلوۆ ەكەۋى بىرىگىپ, جالپى قۇنى 219 مىڭ تەڭگە بولاتىن بەس وتتەگى باللونىن ارنايى تاپسىرىسپەن الدىرتىپ, اقتۇبەك اۋىلىنىڭ تۇرعىندارىن ايتىپ جەتكىزگىسىز قۋانىشقا بولەدى. جاس مامان اۋىلعا ارنايى كەلىپ, الگى وتتەگى باللوندارىن اۋىلداعى امبۋلاتورياعا ورناتىپ, ىسكە قوسقان.
«شىن مانىسىندە ەرمۇراتتاي اسىل ازامات اۋىلدىڭ ءبىرتالاي ادامىنىڭ ءومىرىن ساقتاپ قالدى دەسەم, ارتىق ايتپاعان بولار ەدىم. ول تۇرعىندارىمىزعا سەنىم سىيلادى, ەرتەڭگى كۇنگە دەگەن ءۇمىتىن جاقتى», دەيدى اقتۇبەك اۋىلدىق وكرۋگىنىڭ اكىمى ەرلان ورمانوۆ.
ەرمۇراتتىڭ ءوزى ۇيدەگى ءتورت بالانىڭ ۇلكەنى ەكەن. جاپ-جاس جىگىت باۋىرلارىنىڭ عانا ەمەس, بۇكىل اۋىلدىڭ قامقورى بولىپ, وسىلايشا ازاماتتىق تانىتتى. اقتۇبەك اۋىلى تۇرعىندارىنىڭ ەرمۇراتتاي ەر ۇلدى تاربيەلەپ وسىرگەن اتا-اناسىنا دەگەن ريزاشىلىعى ءتىپتى ەرەسەن!
قاراعاندى وبلىسى,
جاڭاارقا اۋدانى