بۇگىندە جاھان جۇرتشىلىعىن الاڭداتىپ وتىرعان كوروناۆيرۋس ىندەتىنىڭ بەتى ءالى قايتا قويعان جوق. قاۋىپتى ىندەتتەن ءاربىر ادام قاۋىپسىزدىك شارالارىن قاتاڭ ساقتاۋ ارقىلى عانا قورعانا الادى. قازىرگى كەزدە جامبىل وبلىسىندا كارانتين تالاپتارى ءبىرشاما جەڭىلدەتىلگەنمەن, كوروناۆيرۋستىڭ تارالۋىنىڭ بولجالدى ەكىنشى تولقىنىنا دايىندىق شارالارى ءوز دەڭگەيىندە جولعا قويىلعان.
قاۋىپتى ىندەتپەن كۇرەس قارقىندى جۇرگىزىلۋدە. سونىمەن قاتار وڭىردەگى مەديتسينالىق مەكەمەلەر ەپيدەميالىق جاعدايدى تۇراقتاندىرۋ ماقساتىندا ناقتى شارالار قابىلداپ جاتىر. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, ىندەتتىڭ تارالۋىنىڭ «جاسىل» دەڭگەيىندە ناۋقاستاردى قابىلداۋعا 750 توسەكتىك ورىن ازىرلەنىپتى. ونىڭ ىشىندە رەانيماتسيالىق 75 ورىن بار.
«بۇل ورىندار جاقىندا عانا جوندەۋ جۇمىستارىنان وتكەن بۇرىنعى تاراز قالالىق پەريناتالدىق ورتالىعى جانە ت.رىسقۇلوۆ اۋدانىنداعى تۋبەركۋلەز ديسپانسەرىنەن سايلاندى. ال «سارى» دەڭگەي ورىن العاندا توسەكتىك ورىن قورى 1 360-قا دەيىن ۇلعايتىلادى دەپ جوسپارلانۋدا. مۇنداعى رەانيماتسيالىق ورىندار سانى – 136. «قىزىل» دەڭگەي ورىن العاندا ناۋقاستاردى ەمدەۋ ءۇشىن ينفەكتسيالىق ستاتسيونارلارداعى توسەكتىك ورىن قورى جالپى 2 530-عا دەيىن ارتادى. ونىڭ ىشىندە رەانيماتسيالىق ورىندار سانى 253-ءتى قۇرايدى. بۇعان قوسا رەزەرۆ رەتىندە 2 000 ورىن دايىندالۋدا», دەيدى ءا.قاليەۆ.
سونداي-اق جامبىل وبلىسىنىڭ قىرعىز رەسپۋبليكاسىمەن شەكتەسەتىنى بەلگىلى. ەندى اتالعان اۋماقتاردا ەپيدەميالىق احۋالدى ۋشىقتىرماۋ ءۇشىن ەلىمىزدىڭ باس مەملەكەتتىك سانيتارلىق دارىگەرىنىڭ «قازاقستان رەسپۋبليكاسىنىڭ مەملەكەتتىك شەكاراسىنداعى وتكىزۋ پۋنكتتەرىندە كوروناۆيرۋستىق ينفەكتسيا اۋرۋىنىڭ الدىن الۋ جونىندەگى شارالاردى ودان ءارى كۇشەيتۋ تۋرالى» قاۋلىسىنا ساي شەكارادان وتكەن دەنە تەمپەراتۋراسى جوعارى ادامداردى كوروناۆيرۋسقا قارسى زەرتحانالىق قاراۋدى جۇرگىزۋ جانە ولاردى وقشاۋلاۋ ماقساتىندا 165 توسەكتىك ورىنعا ارنالعان كارانتيندىك ستاتسيونار اشىلدى. بۇل دا ءوز كەزەگىندە قاۋىپتى ىندەتپەن كۇرەستە جەمىسىن بەرەتىنى ءسوزسىز.
قازىرگى كەزدە وڭىردەگى ەپيدەميالىق جاعداي – دەنساۋلىق ساقتاۋ مەكەمەلەرىنىڭ ءجىتى باقىلاۋىندا. جەرگىلىكتى تۇرعىندارعا ساپالى مەديتسينالىق قىزمەت كورسەتۋ, ىندەتتىڭ تارالۋىن بولدىرماۋ ماقساتىندا العاشقى مەديتسينالىق سانيتارلىق كومەك كورسەتۋ ۇيىمدارىنىڭ جانىنان 214 ۇتقىر امبەباپ بريگادالارى ۇيىمداستىرىلعان. سونداي-اق ءدارىحانالاردا كوروناۆيرۋستى ەمدەۋ حاتتاماسىنا ساي ءدارى-دارمەك قورىن جاساقتاۋ, حالىقتى تۇماۋعا قارسى ۆاكتسينالاۋ جۇمىستارى دا جوسپارعا ساي جۇرگىزىلۋدە.
دەگەنمەن وبلىس بويىنشا سانيتارلىق-ەپيدەميالىق باقىلاۋ دەپارتامەنتى باسشىسىنىڭ مىندەتىن اتقارۋشى نەيلا مۋليكوۆا وڭىردەگى جاعدايعا الاڭداۋشىلىق ءبىلدىردى. وتكەن اپتانىڭ وزىندە وبلىستا قاۋىپتى ىندەتتى جۇقتىرۋدىڭ 38 جاعدايى تىركەلگەن. ناۋقاستاردىڭ باسىم بولىگى تاراز قالاسى مەن شۋ اۋدانىندا انىقتالعان. سونداي-اق 339 تۇرعىن ءۇي كارانتينگە الىنعان.
ء«بىز قازىر «جاسىل» ايماقتا تۇرمىز. الايدا تاراز قالاسىندا سوڭعى اپتادا كوروناۆيرۋستى جۇقتىرۋدىڭ 20 جاعدايى, شۋ اۋدانىندا 8, ال باسقا اۋدانداردا دا ءبىر-ەكى جاعدايدان تىركەلگەن. ارينە, ءبىزدىڭ ماماندار كاسىبي تۇردە جۇمىس ىستەيدى. بايلانىستا بولعان تۇلعالاردى وقشاۋلاپ, وشاقتاردى انىقتاپ جانە دەزينفەكتسيالاپ وتىرادى», دەيدى ول.
بۇل رەتتە تاراز قالاسىنىڭ اكىمى ايتقازى قارابالاەۆ پەن شۋ اۋدانىنىڭ اكىمى نۇرجان كالەندەروۆ قۇرىلعان ءموبيلدى توپتاردىڭ جۇيەلى جۇمىس ىستەپ, تۇرعىنداردىڭ اراسىندا ءتۇسىندىرۋ جۇمىستارىنىڭ جۇرگىزىلىپ جاتقانىن جەتكىزدى. قازىرگى كەزدە وڭىردە كوروناۆيرۋس ىندەتىمەن كۇرەسكە بارلىق رەسۋرستى جۇمىلدىرۋ ماڭىزدى بولىپ وتىر. سونىمەن قاتار جۇمىسقا اسكەري دارىگەرلەردى دە تارتۋ جوسپاردا بار.
جامبىل وبلىسى