سەناتتا قارجى جانە بيۋدجەت كوميتەتىنىڭ كەڭەيتىلگەن وتىرىسى ءوتىپ, وندا «قازاقستان رەسپۋبليكاسىنىڭ ۇلتتىق قورىنان 2021 – 2023جىلدارعا ارنالعان كەپىلدەندىرىلگەن ترانسفەرت تۋرالى» جانە «2021 – 2023 جىلدارعا ارنالعان رەسپۋبليكالىق بيۋدجەت تۋرالى» ەكى زاڭ جوباسى تالقىلاندى, دەپ حابارلايدى Egemen.kz.
سەناتورلاردىڭ ايتۋىنشا, ەلىمىزدىڭ الداعى 3 جىلعا ارنالعان بيۋدجەتى مەملەكەتتىڭ بارلىق الەۋمەتتىك مىندەتتەمەلەرى ەسكەرىلىپ جاسالعان. ەكونوميكاداعى كۇردەلى كەزەڭگە قاراماستان ەلىمىزدە قولجەتىمدى تۇرعىن ءۇي, جول قۇرىلىسى, وڭىرلەردى دامىتۋ جونىندەگى باعدارلامالاردى ىسكە اسىرۋ جالعاسا بەرەدى, جاردەماقىلار مەن زەينەتاقىلاردىڭ ءبارى تولەنەدى, كاسىپكەرلىكتى قولداۋعا دا قارجى سالىنعان. پاندەميامەن كۇرەسۋ جانە باسقا دا اۋرۋلاردى ەمدەۋ ءۇشىن دارىگەرلىك مەكەمەلەردى ءدارى-دارمەكتەرمەن قامتاماسىز ەتۋ باسىم باعىت بولىپ قالا بەرەدى.
ء«ۇش جىلدىق كەزەڭدە بيۋدجەتتىڭ نەگىزگى شىعىستارى الەۋمەتتىك سالاعا بولىنەتىن بولادى. اقشا الەۋمەتتىك تولەمدەردى – زەينەتاقى مەن جاردەماقىنى يندەكستەۋگە, پەداگوگتار مەن دارىگەرلەردىڭ جالاقىسىن ارتتىرۋعا, سونداي-اق مەملەكەتتىك جارنالار الەۋمەتتىك مەديتسينالىق ساقتاندىرۋ قورىنا جىبەرىلەتىن بولادى», - دەدى سەنات دەپۋتاتى نۇرلان قىلىشباەۆ.
سونىمەن قاتار, بيۋدجەت جوباسىندا ءبىلىم جانە عىلىم جۇيەسىن دامىتۋعا 5,1 ترلن تەڭگە قاراستىرىلعان. نەگىزگى قارجى قوسىمشا تولەمدەرمەن بىرگە مۇعالىمدەردىڭ جالاقىسىن كوتەرۋگە جۇمسالادى. سونداي-اق ستيپەنديالاردى, ءبىلىم بەرۋ گرانتتارىن دا ۇلعايتۋ جوسپارلانىپ وتىر. رەسپۋبليكالىق بيۋدجەتكە سۋمەن جابدىقتاۋ جۇيەلەرىن سالۋ مەن جاڭعىرتۋ, وڭىرلەرگە گازجەتكىزۋ, از قامتىلعان جانە كوپ بالالى وتباسىلارمەن جاستاردى تۇرعىن ۇيمەن قامتاماسىز ەتۋ جونىندەگى جوبالار دا ەنگىزىلدى.
سونداي-اق, ۇلتتىق قوردان رەسپۋبليكالىق بيۋدجەتكە بولىنەتىن كەپىلدەندىرىلگەن ترانسفەرت مولشەرى بەلگىلەندى. بۇل اقشانى ىنتىماقتى زەينەتاقىنى تولەۋگە, رەسپۋبليكالىق بيۋدجەتتەن مەملەكەتتىك بازالىق زەينەتاقى تولەمدەرىنە جىبەرۋ ۇسىنىلاتىن بولدى.