بۇگىن وبلىس اكىمى گۇلشارا ابدىقالىقوۆا "Antikor Live" جوباسى اياسىندا "اكىمدىكتەردىڭ اشىقتىعى, ەسەپتىلىگى جانە قول جەتىمدىلىگى" تاقىرىبىندا تىكەلەي ەفيردە سۇحبات بەردى, دەپ حابارلايدى Egemen.kz.
ايماق باسشىسىنا الەۋمەتتىك جەلىدەگى وبلىس تۇرعىندارىنىڭ پىكىرلەرى نەگىزىندە سىبايلاس جەمقورلىقپەن كۇرەس باعىتىندا اتقارىلىپ جاتقان جۇمىستارعا قاتىستى بىرقاتار سۇراق قويىلدى.
"قۇقىقتىق ستاتيستيكالىق مالىمەتتەرگە جۇگىنسەك وسى جىلدىڭ 10 ايىنىڭ قورىتىندىسىمەن سىبايلاس جەمقورلىق سيپاتىندا 81 قىلمىس تىركەلدى, وتكەن جىلمەن سالىستىرعاندا 26,4% تومەندەگەن. رەسپۋبليكاداعى 17 وڭىرمەن سالىستىراتىن بولساق تەرگەۋ وندىرىسىندە بولعان سىبايلاس جەمقورلىق سيپاتىنداعى قىلمىستىق ىستەر بويىنشا ءبىزدىڭ وبلىس 16-ى پوزيتسيادا تۇر. وسى كورسەتكىشتىڭ ءوزى ءبىزدىڭ بۇل سالاداعى جۇمىستاردىڭ وڭ ناتيجەسى دەپ بىلەمىن", دەدى گۇلشارا ابدىقالىقوۆا.
سونداي-اق, وبلىس اكىمى ازاماتتاردىڭ اقپاراتقا قول جەتىمدىگىن قامتاماسىز ەتۋ ماقساتىندا مەملەكەتتىك ورگانداردىڭ تاراپىنان قابىلدانىپ جاتقان ءىس-شارالارعا توقتالىپ, اشىقتىق ءپرينتسيپىن ۇستاناتىنىن اتاپ ءوتتى.
قازىرگى تاڭدا, وبلىستىق اكىمدىكتىڭ رەسمي ينتەرنەت-رەسۋرسى ارقىلى كەز-كەلگەن ازامات مەملەكەتتىك ورگانداردىڭ اتقارىپ جاتقان جۇمىستارى تۋرالى اقپاراتتى اشىق تۇردە الادى. سالالىق باسقارمالاردىڭ جۇمىسى, كونكۋرس حابارلاندىرۋلارى, نورماتيۆتىك قۇقىقتىق اكتىلەر, وڭىردەگى بارلىق جاڭالىقتار كۇن سايىن جاڭارتىلىپ تۇرادى. ال, اشىقتىقتىڭ ءبىر بولىگى – قارجىلارعا بايلانىستى. اكىمدىكتەردىڭ اشىق بيۋدجەتتەرىنە ارنالعان ينتەراكتيۆتى كارتا ازىرلەنگەن. وندا بارلىق سالالاردىڭ شىعىستارى تۋرالى تولىق اقپارات الۋعا مۇمكىندىك بار.
"ەلەكتروندى ۇكىمەت", "اشىق ديالوگ" egov.kz پورتالىندا تۇراقتى تۇردە وبلىس اكىمىنىڭ قاتىسۋىممەن ونلاين رەجيمدە ءتۇرلى تاقىرىپتاردا ينتەرنەت-كونفەرەنتسيالار وتكىزىلۋدە. اتاپ ايتساق, 2020 جىلى 12 ينتەرنەت-كونفەرەنتسيا جوسپارلاندى. بۇگىنگى كۇنگە دەيىن 8 ۇيىمداستىرىلىپ, تۇسكەن سۇراقتاردىڭ بارلىعىنا ونلاين رەجيمدە جاۋاپ بەرىلدى.
سونىمەن قاتار, مەملەكەت تاپسىرىسى بويىنشا سالىنىپ جاتقان قۇرىلىس نىساندارى تۋرالى تولىق اقپاراتتى ارنايى سايتتا ورنالاستىرىپ, حالىققا قولجەتىمدى ەتۋ ماقساتىندا قۇرىلىس سالاسىندا "حالىق مونيتورينگ" ەلەكتروندى جۇيەسى ىسكە قوسىلعان.
وبلىس اكىمىنە كاسىپكەرلىك سۋبەكتىلەردىڭ زاڭدى مۇددەلەرىنىڭ قورعالۋىن قامتاماسىز ەتۋ بويىنشا دا ساۋال قويىلدى.
"وڭىرلىك بيزنەس-ورتادا اكىمشىلىك كەدەرگىلەردى جانە سىبايلاس جەمقورلىق كورىنىستەرىن جويۋ, كاسىپكەرلەردىڭ زاڭدى مۇددەلەرىنىڭ قورعاۋ ءۇشىن "بيزنەستى جانە ينۆەستورلاردى قورعاۋ» جوباسى ىسكە اسىرىلۋدا. بۇل جوبا اياسىندا جىل باسىنان بەرى وبلىستاعى ينۆەستورلار مەن كاسىپكەرلەردى دەمەۋ ءۇشىن 6 شەتەلدىك جانە 15 وتاندىق جوبامەن كەلىسىم-شارت جاسالدى. ودان بولەك, پاندەميا كەزىندە بيزنەستى جوعالتپاۋ ءۇشىن 51 مىڭنان استام كاسىپكەرگە سالىقتىق جەڭىلدىكتەر بەرىلىپ, 4 مىڭنان استام كاسىپكەر مىندەتتى الەۋمەتتىك-مەديتسينالىق ساقتاندىرۋ تولەمىنەن بوساتىلدى", دەدى گۇلشارا ابدىقالىقوۆا.
مۇنىمەن قوسا, 9 مىڭ ساۋدا الاڭى جالپى سوماسى شامامەن 700 ملن.تەڭگەگە جۋىق جالدامالىق تولەمدەردى وتەۋدەن بوساتىلعان. اۋىل كاسىپكەرلەرىن جەڭىلدىكپەن نەسيەلەندىرۋگە باعىتتالعان "قىزىلوردا" وڭىرلىك ينۆەستيتسيالىق ورتالىعىنىڭ قىزمەتى 2025 جىلعا دەيىن ۇزارتىلدى.
تسيفرلاندىرۋ ماسەلەسىنە قاتىستى اعىمداعى جىلى 7 باعىت بويىنشا 13 جوبا ىسكە اسۋدا.
ايماق باسشىسى مەملەكەتتىك قىزمەت كورسەتۋ, قالىپتاسقان ەپيدەميولوگيالىق احۋالعا بايلانىستى بولىنگەن بيۋدجەت قاراجاتىنىڭ ماقساتىنا ساي يگەرىلۋىن باقىلاۋ باعىتىندا اتقارىلىپ جاتقان جۇمىستارعا دا توقتالدى.