بۇگىن ارال اۋدانىندا اۋداندىق اۋرۋحاناعا جاڭا رەانيموبيلدەردى تابىستاۋ ءراسىمى ءوتتى, دەپ حابارلايدى Egemen.kz.
جەدەل مەديتسينالىق كومەك كورسەتۋگە ارنالعان زاماناۋي قۇرىلعىمەن جابدىقتالعان رەانيموبيلدەر جەرگىلىكتى ءىرى ءوندىرىس ورنى سانالاتىن "ارالتۇز" اق-نىڭ سىيى. اۋدان اكىمى مۇحتار ورازباەۆ رەانيماتسيالىق كولىكتەردىڭ تۇرعىندار ساۋلىعىن ساقتاۋدا كوپ كومەگى تيەتىنىن ايتىپ ءوتتى.
"دەنساۋلىق ساقتاۋ سالاسى اۋدانىمىز ءۇشىن قاشاندا ماڭىزدى سالالاردىڭ ءبىرى بولىپ تابىلادى. سوندىقتان دا دەمەۋشىلەرىمىز مەديتسينالىق مەكەمەلەر مەن دەنساۋلىق ساقتاۋ سالاسىنىڭ قىزمەتكەرلەرىن قولداۋعا باسا نازار اۋدارىپ كەلە جاتقانى قۋانتادى. الداعى ۋاقىتتا بىلىكتى دارىگەرلەر باسى اۋىرىپ, بالتىرى سىزداعان اۋدان تۇرعىندارىنا جاڭا كولىكتەر ارقىلى قاجەتتى ءارى ساپالى مەديتسينالىق كومەك كورسەتەتىن بولادى دەپ سەنەمىز", دەگەن اۋدان باسشىسى دارىگەرلەر ەڭبەگىنە ساتتىلىك تىلەدى.
ايتا كەتۋ كەرەك, "ارالتۇز" اق-نىڭ نەگىزگى وندىرىستىك نىساندارى ارال اۋدانىندا ورنالاسقان. بيىل قايىرىمدىلىق كومەك اياسىندا اكتسيونەرلىك قوعام ءوز قاراجاتىنان 50 ميلليون تەڭگە بولگەن.
بۇعان دەيىن وسى اكتسيا اياسىندا اتالمىش كومپانيا اۋدانداعى جۇقپالى جانە پروۆيزورلىق اۋرۋحانالاردى ىندەتپەن كۇرەسۋگە ارنالعان قۇرال-جابدىقتارمەن قامتاماسىز ەتكەن.
قىزىلوردا وبلىسى