ابايدىڭ 175 جىلدىعىندا كۇرشىم كوركەيە ءتۇستى. شەكارا شەبىندەگى اۋداندا اباي اتىندا الاڭ اشىلىپ, اقىننىڭ تۇلعا ءمۇسىنى ورنادى.
الاڭنىڭ قاق ورتاسىنا قويىلعان حاكىمنىڭ قولادان قۇيىلعان ەسكەرتكىشىنىڭ جالپى بيىكتىگى – 6 مەتر. كۇرشىم اۋدانىنىڭ ورتالىعىندا وسىعان دەيىن ۇلى ابايدىڭ ەسىمى بەرىلگەن بىردە-ءبىر نىسان بولماعان ەكەن.
اقىن رۋحىنا قۇرمەت رەتىندە اۋماعى بىرنەشە گەكتاردى الىپ جاتقان ورتالىق الاڭعا ابايدىڭ ەسىمى بەرىلدى. ۇلى ويشىلدىڭ اتىنداعى ساياباق تولىق اباتتاندىرىلىپ, جان-جاعى تۇنگى ۋاقىتتا سامالاداي جارقىرادى.
جارتى الەمدى جايلاعان ىندەتتىڭ بەتى قايتىپ, حالىق باياعى تىرشىلىگىنە ورالعان سوڭ بۇل الاڭ مەرەكەلىك كەشتەر ۇيىمداستىرۋعا تاپتىرماس ورىن بولماق. كورىكتى ورىنعا كاسىپكەرلەردىڭ كومەگىمەن ۇزىندىعى 20, ەنى 10 مەترلىك سۋ بۇرقاق سالىندى. جاي سۋ بۇرقاق ەمەس, اۋەزدى ءان شىرقاپ, مىڭ بۇرالا بي بيلەيدى.
– اۋدان ورتالىعىنىڭ اجارى كىرىپ, كوشەلەردىڭ جوندەلىپ جاتقانى قۋانتادى. جاڭادان بوي كوتەرگەن ەسكەرتكىشتىڭ, ەرتەڭگى ءوسىپ كەلە جاتقان ۇرپاق ءۇشىن وتە ماڭىزدى. كىشكەنتايىنان ابايدى تانىپ, ولەڭدەرىن, عيبراتتى سوزدەرىن وقىپ وسسە جامان بولمايدى, – دەيدى اۋدان تۇرعىنى مەيرامگۇل قوزىباەۆا.
سونىمەن قاتار اۋدانى ورتالىعى كۇرشىمدە ءتورت كوشەنىڭ جولى تولىق جوندەلىپ, اباتتاندىرىلدى. بۇل جۇمىستاردىڭ ءبارى شەكارالىق اۋدانداردى دامىتۋ باعدارلاماسى بويىنشا اتقارىلدى. ال اۋدانداعى جالپى ەلدى مەكەندەردىڭ ينفراقۇرىلىمىنا بيىل 5 ملرد تەڭگەگە جۋىق قارجى ءبولىندى. ەندەشە, الداعى ۋاقىتتا كۇرشىم وڭىرىندە ءالى دە اۋقىمدى جۇمىستار اتقارىلادى.
شىعىس قازاقستان وبلىسى,
كۇرشىم اۋدانى