مەملەكەت باسشىسى نۇرسۇلتان نازارباەۆ كورنەكتى اقىن كاكىمبەك سالىقوۆتىڭ قايتىس بولۋىنا بايلانىستى وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆ كورنەكتى اقىن كاكىمبەك سالىقوۆتىڭ قايتىس بولۋىنا بايلانىستى وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى جەدەلحاتتا كاكىمبەك سالىقوۆتىڭ بۇكىل ءبىلىمى مەن تاجىريبەسىن, قاجىر-قايراتىن تۋعان ەلى مەن حالقىنىڭ يگىلىگىنە ارناپ, جەمىستى ەڭبەك ەتكەن بەلگىلى تۇلعا ەكەنىن اتاپ وتكەن.
«ەڭبەك جولىن ينجەنەر-مەتاللۋرگ بولىپ باستاپ, ءوزىنىڭ كەمەل ءبىلىمى مەن زور ۇيىمداستىرۋشىلىق قابىلەتىنىڭ ارقاسىندا رەسپۋبليكامىزدا, ءماسكەۋدە جانە وزبەكستاننىڭ قاراقالپاق وبلىسىندا جوعارى مەملەكەتتىك قىزمەتتەر اتقاردى. ول عيبراتى مول ومىرىندە مەملەكەتتىك قىزمەت پەن تابيعات بەرگەن اقىندىق دارىنىن قاتار الىپ ءجۇردى. ونىڭ نازىك تە سىرشىل اقىندىق جۇرەگىنەن حالقى ءسۇيىپ وقيتىن تالاي-تالاي جىر كىتاپتارى مەن ءان ارقاۋىنا اينالعان ولەڭ جولدارى تۋدى. وسىنداي قاسيەتتەرىمەن حالقىمىزدىڭ زور قۇرمەتى مەن قوشەمەتىنە بولەندى. ول كسرو جوعارعى كەڭەسىنىڭ جانە قازاق كسر جوعارعى كەڭەسىنىڭ دەپۋتاتى بولىپ سايلاندى. ونىڭ ەڭبەگى جوعارى مەملەكەتتىك ناگرادالارمەن اتاپ ءوتىلدى», – دەلىنگەن جەدەلحاتتا.
نۇرسۇلتان نازارباەۆ كاكىمبەك سالىقوۆتىڭ ەسىمى ۇمىتىلمايتىنىن, ال حالقىمىز ونىڭ شىعارمالارىنان ءاردايىم رۋحاني ءنار الاتىنىن اتاپ وتكەن.