شىعىس قازاقستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ قىزمەتكەرلەرى سوڭعى اپتادا بىرنەشە زاڭبۇزۋشىلىقتى انىقتاعان.
13 قاراشادا «سەمەي ورمانى» مەملەكەتتىك ورمان تابيعي رەزەرۆاتى تاۋ-دالا فيليالىنىڭ جارما ورمانشىلىعىنىڭ اۋماعىندا جەر قازۋ جانە قوپارۋ ارقىلى التىن ءوندىرۋ جۇمىستارى جۇرگىزىلگەنى انىقتالدى. جەر قويناۋىن پايدالانۋشىلار بىلقىلداق وزەنىنىڭ جاعالاۋىندا وزەن اعىسىمەن 50-100 م قاشىقتىقتا, ياعني تىكەلەي ەرەكشە قورعالاتىن تابيعي اۋماقتاردا جانە ونىڭ قورعاۋ ايماعىندا توپىراقتاردى قازىپ الۋ جۇمىستارىن جۇرگىزگەن. ازاماتتاردىڭ بۇل ارەكەتى ورمان جانە ەرەكشە قورعالاتىن تابيعي اۋماقتار سالاسىنداعى زاڭنامالاردى بۇزعان بولىپ ەسەپتەلەدى.
جەر قازىپ, ولجا تاپپاق بولعان كۇدىكتىلەر توپىراقتىڭ جوعارى قۇنارلى قاباتىمەن تومەنگى قاباتىن ارالاستىرىپ جىبەرگەن. ناتيجەسىندە, توپىراقتىڭ قۇنارلى قاباتى, وندا ءوسىپ تۇرعان شوپتەسىن جانە بۇتا وسىمدىكتەرى تولىعىمەن جويىلعان. مامانداردىڭ باعالاۋىنشا, تابيعاتقا كەلتىرىلگەن زالالدىڭ جالپى سوماسى 2,6 ملرد-تان اسا تەڭگەنى قۇرادى.
سونىمەن قاتار ۇلان اۋدانىندا زاڭسىز اعاش كەسۋدىڭ ەكى فاكتىسى انىقتالعان. رەيدتىك شارا بارىسىندا وسكەمەن – سەمەي رەسپۋبليكالىق كۇرە جولىنىڭ ۋكراينكا اۋىلىنىڭ بۇرىلىسىنان ساراتوۆ ەلدى مەكەنىنە دەيىنگى 14-21 شاقىرىمدارداعى تەرەك, قاراعاش جانە ۇيەڭكى اعاشتارىنىڭ تومارلارى, كەسىلگەن بۇتاقتار, اعاش دايىنداعان ىزدەر انىقتالعان. الايدا اتالعان ۋچاسكەلەردە 2019-2020 جىلدارى اعاش كەسۋگە رۇقسات بەرىلمەگەن. تابيعاتقا زيان كەلتىرگەن كۇدىكتىلەر 336 اعاش كەسىپ ۇلگەرگەن. ونىڭ ىشىندە 232 تەرەك, 79 قارااعاش, 25 ۇيەڭكى جويىلىپ كەتكەن. ەسەپ-قيساپ بويىنشا كەلتىرىلگەن شىعىن – 314 مىڭ 103 تەڭگە. ەكىنشى فاكتى دە ۇلان اۋدانىنىڭ اكىمشىلىك اۋماعىندا, سىبە وزەنىنىڭ جاعاسىندا انىقتالعان. بۇل جەردە زاڭسىز كەسىلگەن 19 دانا تەرەك اعاشى جانە تومار تابىلدى.
بۇدان وزگە اعاش كەسۋ فاكتىسى التاي اۋدانىنىڭ «زىريان ورمان شارۋاشىلىعى» كمم وسينوۆسكوە ورمانشىلىعىنىڭ اۋماعىندا ورىن العان. التاي اۋدانىنىڭ رەزەرۆتىك قورىندا ورنالاسقان «بەلايا گورا» اڭشىلىق شارۋاشىلىعىنىڭ اۋماعىندا اڭ اۋلاۋ ەرەجەسى دە بۇزىلعان. زاڭسىز اڭ اۋلاعان ازامات تەز ارادا انىقتالىپ, اكىمشىلىك جاۋاپكەرشىلىككە تارتىلدى.
اتالعان باسقا فاكتىلەر بويىنشا تولتىرىلعان ماتەريالداردىڭ بارلىعى ءىس قوزعاۋ ءۇشىن قۇقىق قورعاۋ ورگاندارىنا بەرىلدى. ال تابيعات جاناشىرلارى تۇرعىنداردى ورمان شارۋاشىلىعى جانە جانۋارلار دۇنيەسى سالاسىنداعى زاڭ تالاپتارىن ساقتاۋعا, سونداي-اق قانداي دا ءبىر جۇمىستاردى جۇرگىزبەس بۇرىن, ونىڭ زاڭدىلىعىنا كوز جەتكىزىپ الۋعا شاقىرادى.
شىعىس قازاقستان وبلىسى