كايردە قازاقستاننىڭ مەرەيتويلىق مەدالدارى تابىس ەتىلدى

2020 جىلعى 15 قاراشا – مىسىردىڭ جوعارى كونستيتۋتسيالىق سوتىنىڭ توراعاسى سايد مارەي مەن ونىڭ ورىنباسارى ابدەل ومار شەريفكە "قازاقستان كونستيتۋتسياسىنا 25 جىل" مەرەيتويلىق مەدالدارىن تابىس ەتتى.

قازاقستان ەلشىسى قايرات لاما شاريف ءوز سوزىندە: "اتا زاڭ ەلىمىزدىڭ جاڭا تاريحىندا حالقىمىزدىڭ ەركىن ەرىگى مەن تۇڭعىش پرەزيدەنت – ەلباسى نۇرسۇلتان نازارباەۆتىڭ ساليقالى ستراتەگياسىنىڭ بىرلىگىن بەلگىلەگەن ۇلكەن قادام بولدى جانە قازىرگى ۋاقىتتا بۇل باعىتتى مەملەكەت باسشىسى قاسىم-جومارت توقاەۆ جالعاستىرىپ كەلۋدە", دەپ اتاپ ءوتتى.

ديپلومات مىسىر تاراپىنا كونستيتۋتسيوناليزمنىڭ يدەيالارى مەن قاعيداتتارىن ىلگەرىلەتۋگە جانە دامىتۋعا باعىتتالعان ەكى ەلدىڭ سوت ورگاندارى اراسىنداعى كوپجوسپارلى جانە سىندارلى ءوزارا ءىس-قيمىلدى جولعا قويعانى ءۇشىن ريزاشىلىعىن ءبىلدىردى.

س.مارەي مەن ا. شەريف وسىنداي ەرەكشە ىلتيپاتقا شىنايى العىستارىن ءبىلدىرىپ, "بۇل وقيعانى قازاقستانمەن ءوزارا قارىم-قاتىناستاردى دامىتۋ جانە ودان ءارى تەرەڭدەتۋ جونىندەگى مىسىرلىق كۇش-جىگەردى تانۋ رەتىندە قاراستىرامىز" دەپ اتاپ ءوتتى. كونستيتۋتسيالىق سوتتىڭ باسشىسى اتالعان ءىس-شارا قازاقستان رەسپۋبليكاسىنىڭ تۇڭعىش پرەزيدەنتى كۇنى قارساڭىندا ءوتىپ جاتقاندىعىنا توقتالىپ, ن.نازارباەۆتىڭ مەملەكەتتىڭ قۇقىقتىق نەگىزدەرىن نىعايتۋداعى ەرەكشە ءرولىن تىلگە تيەك ەتتى. ول قازاقستان مەن مىسىردىڭ سوت ورگاندارى اراسىنداعى ءوزارا ءىس-قيمىل رۋحىنداعى سىندارلى ىنتىماقتاستىقتى ودان ءارى جالعاستىرۋعا مۇددەلىك تانىتتى.

سونىمەن قاتار, ەلشى ءىس-شارانىڭ قۇرمەتتى قوناقتارىنىڭ ءبىرى مىسىر پارلامەنتى سەناتىنىڭ توراعاسى ابدەل ۋاحاب ابدەل رازيكتى وسى لاۋازىمعا سايلانۋىمەن قۇتتىقتاپ, ونىڭ اتىنا كەلىپ تۇسكەن قازاقستان سەناتىنىڭ توراعاسى ماۋلەن اشىمباەۆتىڭ قۇتتىقتاۋ حاتىن وقىپ بەردى.

ءا.رازيك 10 قاڭتاردا قازاقستاندا وتەتىن پارلامەنتتىك سايلاۋ "دەموكراتيالىق وزگەرىستەر جولىندا سەنىمدى العا باسۋدىن جانە ۇلتتىق ءال-اۋقات دەڭگەيى ارتۋىنىڭ تاعى ءبىر ايقىن دالەلى بولادى" دەگەن سەنىمىن مالىمدەدى. ونىڭ ايتۋىنشا, "مىسىر قازاقستانمەن قالىپتاسقان دوستىعىن شىنايى باعالاي وتىرىپ, ساياساتتاعى, ەكونوميكاداعى, عىلىمداعى جانە مادەنيەتتەگى ورتاق جەتىستىكتەردى ماقتان تۇتادى, حالىقارالىق ارەنادا قول جەتكىزىلگەن ءوزارا ءىس-قيمىلدىڭ جوعارى دەڭگەيىن باعالايدى" دەپ ءسوزىن تۇيىندەدى.

سالتاناتتى جيىندا ەلشى ەكى ەل پارلامەنتتەرىنىڭ جوعارعى پالاتالارى اراسىندا پارلامەنتارالىق دوستىق توپتىڭ قۇرىلعاندىعىن حابارلادى. ونىڭ قۇرامىنا قازاقستان تاراپىنان پارلامەنت سەناتى توراعاسىنىڭ ورىنباسارى نۇرلان ءابدىروۆ باستاعان 11 دەپۋتات كىرگەندىنىن جەتكىزدى.

ءىس-شاراعا سونداي-اق ادىلەت ءمينيسترى ومار مارۋان, اقپارات ءمينيسترى وساما حەيكال, مەملەكەتتىك كەڭەستىڭ توراعاسى مۇحاممەد حۋسام اد-دين, تاعى باسقا دا كورنەكتى ساياسي جانە قوعام قايراتكەرلەرى, مىسىردا اككرەديتتەلگەن شەت مەملەكەتتەردىڭ ەلشىلەرى, بۇقارالىق اقپارات قۇرالدارىنىڭ وكىلدەرى قاتىستى.