ۆيرۋس قاتەرى قايتا سەزىلە باستاعالى وڭىردەگى دەنساۋلىق ساقتاۋ سالاسى ماماندارى قاۋىرت قيمىلعا كوشتى. قازىر دەرتكە جاڭادان ىلىنگەندەر قاتارى كوپ ەمەس, دەگەنمەن دە دارىگەرلەر ىندەتتىڭ تارالۋىن بولدىرماۋ ماقساتىنداعى دايىندىقتى توقتاتقان جوق.
قاۋىپتىڭ الدىن الۋ باعىتىندا ىستەلىنىپ جاتقان جۇمىستار جايلى وڭىرلىك كوممۋنيكاتسيا قىزمەتىندە وبلىس اكىمىنىڭ ورىنباسارى ناۋرىزباي بايقاداموۆ پەن وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆ باق وكىلدەرىنە ارنالعان بريفينگتە تارقاتىپ ايتىپ بەردى.
سپيكەرلەر جەدەل جاردەم قىزمەتىن ورتالىقتاندىرۋدىڭ ارقاسىندا وبلىس ورتالىعى مەن اۋدانداردا ناۋقاستارعا جەتىپ, ولارعا دارىگەرلىك كومەك كورسەتۋ ساپاسى ءبىر دەڭگەيدە كورسەتىلىپ وتىرعانىن اتاپ ءوتتى. وسىنىڭ ارقاسىندا ايماقتاعى مەديتسينالىق جەدەل جاردەم ستانساسى قىزمەتى ەلىمىزدەگى ۇلتتىق شۇعىل مەديتسينانى ۇيلەستىرۋ ورتالىعىنىڭ باعالاۋ رەيتينگىنىڭ الدىڭعى قاتارىنان كوتەرىلدى. الىس ەلدى مەكەندەر تۇرعىندارى دا ساپالى جانە جەدەل مەديتسينالىق كومەكتىڭ قولجەتىمدىلىگىن انىق سەزىنىپ وتىر. وتكەن اپتا سوڭىندا جەدەل جاردەم قىزمەتىنە 42 اۆتوكولىكتىڭ كىلتى تابىستالدى. وسىنداي قولداۋدىڭ ارقاسىندا بيىل شاقىرىستارعا كەشىگۋ 2,5%-دان 1,9%-عا ازايىپ, ناتيجەلى رەانيماتسيا 47,2%-دان 56,3%-عا ۇلعايعان. ەپيدەميالىق ماۋسىم باستالعالى بەرى وبلىستا 3 264 ناۋقاس تىركەلىپ, ولاردىڭ 97 پايىزى قۇلانتازا ايىعىپ شىقتى.
كەسەل ءورشىپ تۇرعان كەزدە بايقالعان ءدارى-دارمەك تاپشىلىعىن الدا بولدىرماس ءۇشىن ماماندار ستاتسيونارلىق جانە ەمحانالىق جاعدايدا جەتىسپەگەن پرەپاراتتارعا ساراپتاما جاساپ, دارىلەر ءتىزىمى جاساقتالدى.
قاجەت بولعان جاعدايدا 21 ينفەكتسيالىق جانە پروۆيزورلىق ورىندار قايتا اشىلادى. سونداي-اق 200 توسەك-ورىندىق ءمودۋلدى ينفەكتسيالىق اۋرۋحانا قۇرىلىسى جۇرگىزىلۋدە.
ىندەت باستالعانعا دەيىن وبلىستا وكپەنى جاساندى تىنىستاندىراتىن 76 اپپارات بولىپتى, قازىر بۇل قۇرىلعى سانى 244-گە جەتىپ وتىر. الدا دۇنيەجۇزىلىك بانكى ارقىلى تاعى دا 47 اپپاراتتىڭ جەتكىزىلۋى جوسپارلانۋدا. جەرگىلىكتى بيۋدجەت ەسەبىنەن 4 فليۋرو جانە 6 ستاتسيونارلى رەنتگەن قوندىرعىسىن ساتىپ الۋ كوزدەلىپ وتىر. ۆيرۋستىڭ ەكىنشى تولقىنىنا وراي جاسالعان دايىندىق جۇمىستارى اياسىندا قۇرامىندا 3 500 مەديتسينا قىزمەتكەرى بار ماماندار رەزەرۆى قۇرىلدى.
ايماقتاعى ىرگەلى كاسىپورىندار دا دەرتتىڭ تارالۋىن بارىنشا تەجەۋگە حال-قادەرىنشە كومەك قولىن سوزىپ جاتىر.
– مىسالى, قازالى اۋدانىندا «پەتروقازاقستانقۇمكولرەسورسيز» كومپانياسىنىڭ دەمەۋشىلىگىمەن ءبىر وتتەگى ستانساسى سالىنادى. بۇل ستانسا ارال جانە قارماقشى اۋداندارىن, بايقوڭىر قالاسىن وتتەگىمەن قامتاماسىز ەتە الادى. «قازگەرمۇناي» بك» جشس وبلىستىق اۋرۋحانا بازاسىندا قالا اۋماعىنداعى ەمدەۋ مەكەمەلەرى مەن سىرداريا, جالاعاش اۋداندارىن قامتاماسىز ەتەتىن ستانسانىڭ تاعى ءبىرىن سالۋعا ءازىر, – دەدى ناۋرىزباي سەيىتقالي ۇلى.
باستاپقى مەديتسينالىق سانيتارلىق كومەك كورسەتۋ باعىتىندا دا ءبىرشاما جۇيەلى جۇمىس جۇرگىزىلۋدە. شىلدە ايىنان باستاپ قالا, اۋدان اكىمدىكتەرىمەن بىرلەسىپ ەمحانالار بازاسىندا ءۇي جاعدايىندا دارىگەرلىك كومەك بەرەتىن موبيلدىك بريگادالار ۇيىمداستىرىلعان ەدى. وسىنداي توپتار سانى از ۋاقىتتا 161-گە جەتتى. ولاردىڭ 38-ءى قىزىلوردا قالاسىندا, 28-ءى اۋدان ورتالىقتارىندا, 95-ءى اۋىلداردا ۇيىمداستىرىلدى. موبيلدىك بريگادالاردى جەرگىلىكتى بيلىك كولىكپەن قامتاماسىز ەتىپ, ناۋقاسقا جەدەل جەتۋىنە بار جاعدايدى جاسادى. وسى توپتار بۇگىنگە دەيىن 13 368 شاقىرتۋعا بارىپتى.
ايتقان جەردەن اۋلاق, بىراق الدا دا اۋرۋ ءورشي قالسا, موبيلدىك بريگادالار قايتا جۇمىلدىرىپ, تۇرعىندارعا مەديتسينالىق كومەك كورسەتىپ, دارىلىك زاتتاردى جەتكىزۋگە ءازىر تۇر.
قىزىلوردا