قوستاناي وبلىسىندا "قاراپايىم زاتتار ەكونوميكاسى" باعدارلاماسىن ىسكە اسىرۋعا 49 ملرد تەڭگە ءبولىندى, دەپ حابارلايدى Egemen.kz
وڭىرلىك كوممۋنيكاتسيالار الاڭىندا وتكەن بريفينگتە قوستاناي وبلىسى اكىمدىگىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى ولجاس ساپاربەكوۆ "قاراپايىم زاتتار ەكونوميكاسى" باعدارلاماسىنىڭ ورىندالۋى تۋرالى ايتىپ بەردى. ونىڭ سوزىنشە, بيىل باعدارلاما شەڭبەرىندە 245 جوبا قارالىپ, ونىڭ 192 -ءسى ماقۇلداندى. بۇل ماقساتتا 31 ملرد تەڭگە يگەرىلدى. جالپى جوبانىڭ ورىندالۋىنا 49 ملرد تەڭگە جۇمسالماق.
"قابىلدانعان 192 جوبانىڭ دەنى شاعىن جانە ورتا بيزنەس سۋبەكتىلەرىنە تيەسىلى. جوبالاردى ورىنداۋداعى باستى تالاپ تۇرعىندار مەن بيزنەس سۋبەكتىلەرىنىڭ سانيتارلىق- ەپيدەميولوگيالىق تالاپتارعا جاۋاپتىلىعى بولىپ وتىر. كورونوۆيرۋستىق ينفەكتسيانىڭ ءورشىپ كەتۋىنە بايلانىستى 9 قاراشادان باستاپ وبلىستىڭ پەريمەترى بويىنشا سانيتارلىق بەكەتتەر ورناتىلدى. سونداي-اق, قر مەملەكەتتىك شەكاراسى ارقىلى اۆتوكولىكتەردى وتكىزۋ قاتاڭ تەكسەرىلەدى. مۇنى ازاماتتارىمىزدىڭ ىندەت جۇقتىرۋ قاۋپىن بارىنشا ازايتۋعا باعىتتالعان ءماجبۇرلى شارالار ەكەنىن ءتۇسىنۋىمىز كەرەك", دەيدى باسقارما باسشىسى.
وبلىستا "ەڭبەك" باعدارلاماسى شەڭبەرىندە جالپى سوماسى 2,9 ملرد. تەڭگەگە 1200 كاسىپكەرگە قولداۋ كورسەتىلدى. سونىمەن قاتار قر ۇكىمەتى بيزنەستى قولداۋعا باعىتتالعان داعدارىسقا قارسى شارالار پاكەتىن قابىلدادى.
"اتاپ ايتقاندا, قر ۇلتتىق بانكىنىڭ جەڭىلدىكپەن نەسيەلەۋ باعدارلاماسى بويىنشا 15,9 ملرد. تەڭگەگە 74 كرەديت ماقۇلداندى. شوب-قا قاتىستى تەكسەرۋلەر مەن پروفيلاكتيكالىق باقىلاۋ اكتىلەرىنىڭ سانى 39%-عا قىسقاردى. ەكىنشى دەڭگەيدەگى بانكتەر مەملەكەتتىك باعدارلامالاردىڭ قاتىسۋشىلارى سانالاتىن 171 كاسىپكەرلىك سۋبەكتىسىنە كرەديتتەر بويىنشا مەرزىمىن كەيىنگە قالدىرۋدى ۇسىندى. بۇل كاسىپكەرلەرىمىزگە ۇلكەن كومەك بولىپ وتىر. سونداي-اق كوممۋنالدىق مەنشىكتىڭ 729 شارتى بويىنشا جالداۋ اقىسىن ەسەپتەۋدىڭ توقتاتىلعانى قۋانتادى. 46 مىڭ ميكرو جانە شاعىن بيزنەس سۋبەكتىسى سالىقتان تولىق بوساتىلعانىن اتاپ ءوتۋ كەرەك", دەيدى و.ساپاربەكوۆ.
وبلىستا infokazakhstan.kz ەلەكتروندىق پورتالى جۇمىسىن جالعاستىرۋدا. سايت ارقىلى كاسىپكەرلەر ءوز قىزمەتىن قالپىنا كەلتىرە الادى. وسى جىلدىڭ 12 قاراشاداعى مالىمەتى بويىنشا پورتالعا 23 477 ءوتىنىم بەرىلسە, ونىڭ 18 472-ءسى ماقۇلداندى.