قازىر ادامداردى الداپ, سەنىمىنە كىرىپ, ونىڭ مۇلكىنە قول سۇعىپ, يەمدەنىپ الاياقتىق جاسايتىندار قاتارى كوبەيۋدە. ماسەلەن, 10 ايدا قىزىلوردا وبلىسىندا وسىنداي 511 قىلمىس تىركەلىپ, ونىڭ 490-ى نەمەسە 96 پايىزى اشىلعان. بۇل تۋرالى بۇگىن وڭىرلىك كوممۋنيكاتسيالار قىزمەتىندە وبلىستىق پد باستىعىنىڭ ءبىرىنشى ورىنباسارى, پوليتسيا پولكوۆنيگى شامشيدين ءاميتوۆتىڭ قاتىسۋىمەن وتكەن بريفينگتە ايتىلدى.
قىلمىسكەرلەر نەگىزىنەن پاتەر, جەر ۋچاسكەسىن, جەڭىلدەتىلگەن نەسيە الىپ بەرۋگە, جۇمىسقا ورنالاستىرۋعا ۋادە بەرىپ, وزىنە سەنگەن جۇرتتى جەر سيپاتىپ كەتەدى. سوڭعى كەزدە اقپاراتتىق تەحنولوگيالاردىڭ دامۋىنا بايلانىستى, اتالعان قىلمىستاردىڭ كوبى ينتەرنەت ارقىلى جاسالاتىنى بايقالادى. سوندىقتان, پوليتسيا قىزمەتكەرلەرى جەڭىل تابىس تابۋعا ۋادە بەرگەن ادامدار جولىعا قالعاندا ەڭ الدىمەن زاڭ قىزمەتكەرلەرىنەن قاجەتتى كەڭەستەر الىپ, ساقتىق شارالارىنا ەرەكشە نازار اۋدارۋدى سۇرايدى.
ەسەپتى مەرزىمدە كامەلەتكە تولماعاندارعا قاتىستى 19 قىلمىس تىركەلگەن. بالالار جاسايتىن قىلمىستى تەك پوليتسيا كۇشىمەن تىيۋ مۇمكىن ەمەس. سول سەبەپتى قۇقىق قورعاۋشىلار اتا-انالارمەن, باسقا دا قوعامدىق ەمەس ۇيىمدارمەن بىرىگىپ جۇمىس جاساۋعا باسا ءمان بەرىپ وتىر. قازاقستان رەسپۋبليكاسى اقبتك-ءنىڭ 442-بابىنىڭ تالاپتارىنا سايكەس 2528 اتا-انا جاۋاپقا تارتىلدى.
ون ايدا وبلىستا 345 جول كولىك وقيعاسى كەزىندە 68 ادام قايتىس بولسا, 401-ءى دەنە جاراقاتىن العان. جول كولىك وقيعالارىنىڭ باستى سەبەپتەرىنىڭ ءبىرى جولدا ءجۇرۋ ەرەجەلەرىنىڭ ورەسكەل بۇزىلۋى. كولىكتى ماس كۇيدە باسقارعان 902 جۇرگىزۋشى انىقتالىپ, بارلىعى اكىمشىلىك قاماققا الىندى. 785-ءى كولىك قۇرالىن باسقارۋ قۇقىعىنان ايىرىلدى.