شىمكەنت قالاسىندا ا.اسقاروۆ اتىنداعى دەندرولوگيالىق ساياباقتا "بولاشاققا تىنىس" اكتسياسى شەڭبەرىندە شىنار اعاشىنىڭ كوشەتتەرى وتىرعىزىلادى. تۇركيانىڭ "ۇلتتىق اعاش وتىرعىزۋ كۇنىنە" وراي ۇيىمداستىرىلعان اكتسياعا شىمكەنت قالاسىنىڭ اكىمى مۇرات ايتەنوۆ جانە تۇركيانىڭ الماتىداعى باس كونسۋلى الي ريزا اكىنجى, تۇرىك ىنتىماقتاستىق جانە ۇيلەستىرۋ اگەنتتىگىنىڭ (TİKA) قازاقستانداعى وكىلى يسلام يسمايل ارنايى قاتىستى, دەپ حابارلايدى Egemen.kz
الي ريزا اكىنجى وسى ءىس-شارانىڭ شىمكەنت قالاسىندا ۇيىمداستىرىلعانىنا العىسىن ءبىلدىرىپ, ەكى ەل اراسىنداعى ىنتىماقتاستىق ودان ءارى قاراي وركەندەي بەرۋىنە تىلەكتەستىگىن جەتكىزدى.
– ەكى ەلدىڭ دوستاستىعىنىڭ نىعايۋىنا قوسقان ۇلەسىڭىز ءۇشىن العىس ايتامىن. ىنتىماقتاستىعىمىز ارتا بەرسىن, دەدى تۇركيا كونسۋلى.
قالا اكىمى شىمكەنت قالاسىندا جىلىنا ميلليونعا جۋىق اعاش كوشەتتەرى ەگىلەتىنىن جانە باۋىرلاس ەلدەگى اتاۋلى كۇن ءبىزدىڭ ەلدە كورىنىس تاپقانىن قۋانىشپەن جەتكىزىپ, تۇرىك كاسىپكەرلەرىن قالاداعى ءىرى جوبالارعا بەلسەندى قاتىسۋعا شاقىردى.
– ەجەلدەن جالعاسقان باۋىرلاستىق ديپلوماتيا, ەكونوميكا, سپورت, ونەر سەكىلدى بارلىق سالادا دا جالعاسىن تابۋدا. تۇرىك ەلىندەگى "ۇلتتىق اعاش ەگۋ" ءداستۇرى ءبىزدىڭ ەلدە كورىنىس تاپقانىنا وتە قۋانىشتىمىز. اتالارىمىز ء"جۇز جىلدىعىن ويلاعان حالىق اعاش ەگەدى" دەگەن ەكەن.
بۇگىنگى ءىس-شارا تۇرىك ەلىنىڭ بىزگە دەگەن ءىلتيپاتى دەپ بىلەمىن. تۇركيالىق كاسىپكەرلەردى "ەسكى قالاشىققا" ءتۋريزمدى دامىتۋ بويىنشا ينۆەستيتسيا سالۋدى ۇسىنامىن. بۇگىنگى وتىرعىزعان اعاشتار ەكى ەلدىڭ بارلىق سالاسىنداعى ىنتىماعىنىڭ نىشانىنا اينالسىن, دەدى مۇرات دۇيسەنبەك ۇلى.
ايتا كەتەيىك, وسى اكتسيا اياسىندا شىمكەنت قالاسىنىڭ 2200 جىلدىعىنا وراي 2200 ءتۇپ اعاش كوشەتى وتىرعىزىلادى.