نازارباەۆ زياتكەرلىك مەكتەبىندە وركەن جايىپ, ءورىسىن كەڭەيتىپ كەلەدى
وركەنيەت جولىنا تۇسكەن ەلدەردەگىدەي تياناقتى ءبىلىم, ونەگەلى ءتاربيە بەرىپ كەلە جاتقان نازارباەۆ زياتكەرلىك مەكتەبىنىڭ بەدەلى قازىر ءوز وتانىمىزدا عانا ەمەس, شەت جۇرتتارعا دا كەڭىنەن ءمالىم بولا باستادى. جاقىندا, وسى مەكەمەنىڭ ۇيىمداستىرۋىمەن «بىلىمدەگى جوعارى ساپا مەن كوشباسشىلىق – 2013» حالىقارالىق كونفەرەنتسياسى بولعان ەدى. بۇل شاراعا 400-گە جۋىق قاتىسۋشى الەمدەگى وزىق وقىتۋ جۇيەسى تۋرالى جان-جاقتى وي قوزعادى.
نازارباەۆ زياتكەرلىك مەكتەبىندە وركەن جايىپ, ءورىسىن كەڭەيتىپ كەلەدى
وركەنيەت جولىنا تۇسكەن ەلدەردەگىدەي تياناقتى ءبىلىم, ونەگەلى ءتاربيە بەرىپ كەلە جاتقان نازارباەۆ زياتكەرلىك مەكتەبىنىڭ بەدەلى قازىر ءوز وتانىمىزدا عانا ەمەس, شەت جۇرتتارعا دا كەڭىنەن ءمالىم بولا باستادى. جاقىندا, وسى مەكەمەنىڭ ۇيىمداستىرۋىمەن «بىلىمدەگى جوعارى ساپا مەن كوشباسشىلىق – 2013» حالىقارالىق كونفەرەنتسياسى بولعان ەدى. بۇل شاراعا 400-گە جۋىق قاتىسۋشى الەمدەگى وزىق وقىتۋ جۇيەسى تۋرالى جان-جاقتى وي قوزعادى.
القالى جيىندا نازارباەۆ زياتكەرلىك مەكتەپتەرى دەربەس ءبىلىم بەرۋ ۇيىمىنىڭ باسقارما ءتورايىمى كۇلاش شامشيدينوۆا ءبىلىم بەرۋ كوشباسشىلىق پەن ساپا تاقىرىبىن جان-جاقتى قوزعاي كەلىپ, «نازارباەۆ زياتكەرلىك مەكتەپتەرى بازاسىندا جاسالىپ جاتقان جۇمىستاردىڭ بارلىعى بولاشاقتا ورتا ءبىلىم بەرەتىن مەكتەپتەردە ورىن الادى. سوندىقتان ءبىز قازىر كوپشىلىك نازارىنا زاماناۋي ورتا ءبىلىمنىڭ قانداي بولۋ كەرەكتىگىن جەتكىزۋ ءۇشىن بار كۇش-جىگەرىمىزدى جۇمساپ جاتىرمىز. قازاق ەلىندەگى ورتا ءبىلىمنىڭ قۇرىلىمى بۇكىل دۇنيە جۇزىندەگى ۇردىسكە قاراي وزگەرىپ جاتقانىن ايتا كەتۋىمىز كەرەك», دەپ وسىنداي باسقوسۋلار كەزىندە ءبىلىم بەرۋ مەن ۇرپاق تاربيەسىنە قاتىستى ايقىنداپ, باعىت-باعدارىمىزدى بەلگىلەپ الۋىمىز كەرەكتىگىن ەسكە سالدى.
57 حالىقارالىق ساراپشىلار قاتىسقان كونفەرەنتسيا 48 سەكتسيا اياسىندا جۇمىس ىستەدى. ءبىلىم بەرۋ جۇيەسىن دامىتۋدىڭ جاڭا ءۇردىسى عالامدىق جانە فيلوسوفيالىق مانگە يە ەكەنى ءسوز بولىپ, ءبىلىم پاراديگماسىنىڭ وزگەرۋى, جاڭا ادىستەمەلەر مەن تەحنولوگيالار, مۇعالىمدەردىڭ بىلىكتىلىگىن ارتتىرۋ, ۇشتىلدىلىك, قازاقستان تاريحى ارقىلى تاۋەلسىز ەلدىڭ جاستارىن پاتريوتيزم رۋحىندا تاربيەلەۋ ءماسەلەسى تالقىلاندى. زياتكەرلىك مەكتەپتىڭ ستراتەگيالىق سەرىكتەستەرى نازارباەۆ, كەمبريدج ۋنيۆەرسيتەتتەرى, كەمبريدج حالىقارالىق كەڭەسى, Cito پەداگوگيكالىق ولشەمدەر ينستيتۋتى, شەتەلدىك عالىمدار كورولدىك اكادەمياسى (بەلگيا), كاليفورنيا شتاتى ۋنيۆەرسيتەتى (اقش), ۇلتتىق ءبىلىم ينستيتۋتى (سينگاپۋر) جانە باسقا ءبىلىم وردالارى وتانىمىزدىڭ ءبىلىم ۇياسىنداعى وڭ ىستەرگە قىزىعۋشىلىق تانىتتى. ءبىلىم مازمۇنى, وقۋ جەتىستىكتەرىن باعالاۋ, مۇعالىمدەردى كاسىپتىك دامىتۋ جايى دا تياناقتى اڭگىمە ارقاۋىنا اينالدى.
الەمدىك دەڭگەيدەگى كونفەرەنتسياعا ۇيتقى بولعان زياتكەرلىك مەكتەپتەردەگى مۇعالىمدەر قۇرامى ءوز ۇستازدارىمىزبەن قاتار, شەتەلدىك بىلىكتى كادرلارمەن دە تولىقتىرىلاتىنىن ايتا كەتسەك دەيمىز. قازىرگى تاڭدا 1710 ەل مۇعالىمدەرىمەن قاتار, 195 وزگە ەلدەردەن كەلگەن وقىتۋشىلار ساباق بەرۋدە. بۇل ءبىلىم ورداسىنا وقۋشىلار قاتاڭ كونكۋرستىق ىرىكتەۋ ارقىلى قابىلداناتىنى بەلگىلى. قازاق ەلىنىڭ كەز كەلگەن ايماعىنان 5-6 سىنىپ وقۋشىسى زياتكەرلىك مەكتەپكە ۆيرتۋالدى جانە دەمالىس مەكتەپتەرى ارقىلى تۇسۋىنە مۇمكىندىك بار. ايتالىق, ۆيرتۋالدى مەكتەپ تاپسىرمالارىن ءساتتى ورىنداعان وقۋشىلار دەمالىس مەكتەبىندە كۇندىز وقۋعا, سونىمەن بىرگە, بەيىندى پاندەر بويىنشا تاپسىرمالار الۋعا شاقىرىلادى. وسى كەزدەرى ەلىمىزدىڭ بارلىق ايماقتارىنان ۆيرتۋالدى مەكتەپكە 4129 وقۋشى تىركەلگەن ەكەن. وسىلاردىڭ اراسىنان وزات دەپ تانىلعاندار مەكتەپتە وقۋ ءۇشىن گرانت الادى. تاعى ءبىر ايتا كەتەتىن ەرەكشەلىك, بۇل ءبىلىم ورداسىن بىتىرگەندەردىڭ كوبى وزدەرى قالاعان جوعارى وقۋ ورىندارىنا تۇسۋگە مۇمكىندىكتەرى مول. ماسەلەن, بيىلعى وقۋ جىلىندا 78 تۇلەك بىتىرسە, ولاردىڭ ءار التىنشىسى ءبىلىم تۋرالى ۇزدىك اتتەستاتقا جانە «التىن بەلگىگە» يە بولعان.
جالپى, بۇل ءبىلىم ۇياسىن ءبىتىرگەندەردىڭ 135-ءسى نازارباەۆ ۋنيۆەرسيتەتىندە 27-ءسى شەتەلدىك جوعارى وقۋ ورىندارىندا ءبىلىم الىپ ءجۇر. تاعى ءبىر ەرەكشە اتاپ وتەرلىك نارسە, اعىمداعى جىلى اتىراۋدا, اقتوبەدە, قاراعاندىدا, تارازدا, شىمكەنتتە, قىزىلوردادا, پاۆلوداردا نازارباەۆ زياتكەرلىك مەكتەپتەرى تالاپكەرلەرگە ءوز ەسىگىن اشتى. الداعى ۋاقىتتا مۇنداي ءبىلىم ۇيالارى الماتىدا, اقتاۋدا, قوستانايدا شاڭىراق كوتەرەدى.
سۇلەيمەن مامەت,
«ەگەمەن قازاقستان».