قىسقا مۇقيات دايىندىق جاسالۋدا

قىر استىنان مىسىقتابانداپ كەلە جاتقان قىس لەبى سەزىلگەن سايىن كوممۋنالدىق شارۋاشىلىق ماماندارى قولدا بار تەحنيكالارىنىڭ كەم-كەتىگىن جوندەپ, اق قارمەن الىسۋعا دايىندىق جۇمىستارىن شيراتا تۇسۋدە. نەگىزىندە وبلىس ورتالىعىنىڭ كوك مۇز بەن اق قاردان تازالىعىنا ەكى سەرىكتەستىك جاۋاپ بەرەدى. ونىڭ ءبىرى «زەرەن پليۋس - 2006» كاسىپورنى.

كاسىپورىن وتكەن جىلداردىڭ ساباعىن ەسكەرە وتىرىپ, بۇگىننەن قام جاساۋدا. بۇل ورايدا, تەحنيكانىڭ كەيبىرى ەسكىرگەندىگىن, جاڭارتۋدى قاجەت ەتەتىندىگىن ايتا كەتۋگە ءتيىستىمىز.

– سەرىكتەستىكتە 80-گە جۋىق ادام جۇمىس ىستەيدى. 40-تان استام تەحنيكامىز بار. جۇمىسشىلاردىڭ بارلىعى قاجەتتى قىسقى كيىمدەرمەن قامتاماسىز ەتىلگەن. بيىل جاڭادان تەحنيكا الىنعان جوق. كەلەر جىلى بىرقاتار تەحنيكا الامىز دەپ مەجەلەپ وتىرمىز,–دەيدى سەرىكتەستىك جەتەكشىسىنىڭ مىندەتىن اتقارۋشىسى دۋلات ءامىروۆ.

كوكشە قىسىنىڭ قاتال ەكەندىگىن اركىم دە جاقسى بىلەدى. سوندىقتان, وسى باستان جاۋاپتى كاسىپورىنداردا ءتيىستى شارالار جۇزەگە اسىرىلۋدا.

– ەكى كاسىپورىنمەن ءتيىستى كەلىسىم-شارت جاسالدى. 89 ملن تەڭگە قاراجات ءبولىندى. ەگەر قىس قاتتى بولسا, «كوكشە جىلۋ» مەن «كوكشەتاۋ سۋ ارناسى» كاسىپورىندارىنىڭ تەحنيكالارى دا جۇمىلدىرىلادى,–دەيدى كوكشەتاۋ قالاسى اكىمىنىڭ ورىنباسارى ەربول تولەۋوۆ.

«كوكشەتاۋ سۋ ارناسى» كاسىپورنى دا قىسقا ناۋقانعا مىقتاپ دايىندالۋدا. ءبىر ايتا كەتەرلىگى, ماتەريالدىق-تەحنيكالىق بازاسىن جاڭعىرتىپ, بىرقاتار زاماناۋي قوندىرعىلار ساتىپ العان. ولار قالا بويىنشا 60 مىڭ تۇتىنۋشىعا قىزمەت كورسەتەدى.

– بىزدە 78 تەحنيكا بار. ولاردىڭ 69-ى جۇمىسقا تولىق دايىن. بارلىق تەحنيكالار ارنايى تەكسەرىستەن ءوتتى. بيىل ديزەلدى گەنەراتور ساتىپ الدىق. وزگە دە قۇرال-جابدىقتاردى جوندەپ, ساپقا قويدىق,–دەيدى «كوكشەتاۋ سۋ ارناسى»  كاسىپورنىنىڭ قىزمەتكەرى يۆان دانچەۆ.

وبلىستا قىسقى ماۋسىمدا قار تازالاۋعا 376 تەحنيكا, 600-دەن استام ادام جۇمىلدىرىلماق. قازىر قىس سىناعىنا توتەپ بەرۋ ءۇشىن لايىقتى قام جاسالۋدا.

كوكشەتاۋ قالاسى