قورى قۇندى كارتينالارعا باي وبلىستىق ونەر مۋزەيىنىڭ قۇرىلعانىنا وتىز جىل تولدى. ابايدىڭ 175 جىلدىعىمەن تۇسپا-تۇس كەلگەن مادەني مەكەمەنىڭ مەرەيلى داتاسىنا وراي جۋىقتا «ۋاقىت تالابىمەن» اتتى سالتاناتتى شارا ءوتتى.
سانيتارلىق تالاپتاردى ساقتاي وتىرىپ ۇيىمداستىرىلعان شارا اياسىندا مۋزەيدىڭ قورىنداعى بوياۋى كونە سۋرەتتەر كورەرمەن نازارىنا ۇسىنىلدى. ونىڭ ىشىندە قازاق بەينەلەۋ ونەرىنىڭ اتاسى ءابىلحان قاستەەۆتىڭ, العاشقى بۋىن سۋرەتشىلەرى ۇكى اجيەۆتىڭ, ەۆگەني سيدوركيننىڭ, جاناتاي شاردەنوۆتىڭ, سونىمەن قاتار وتكەن عاسىردىڭ الپىسىنشى جىلدارىندا ۇلتتىق بەينەلەۋ ونەرى مەكتەبىن قالىپتاستىرعان سۋرەتشىلەردىڭ تۋىندىلارى قويىلدى. اتاپ ايتساق, ساليحيتدين ايتباەۆ, شايماردان ساريەۆ, ماعاۋيا امانجولوۆ, باقتيار تابيەۆ, ساحي رومانوۆ سەكىلدى قىلقالام شەبەرلەرىنىڭ تۇپنۇسقا تۋىندىلارى كورمە زالىنان ورىن تاپقان.
ونەر سۇيەر قاۋىم اسىرەسە ءابىلحان قاستەەۆتىڭ «ەسىك» كولىن بەينەلەگەن كارتيناسىنان كوز الا المادى. تۋىندى 1969 جىلى قاعازعا اكۆارەلمەن بەينەلەنىپتى. كارتينادا ءتۇس مەزگىلىندە كولدى قايىقپەن قاق جارىپ, ءجۇزىپ كەلە جاتقان ادامدار كورىنىس تاپقان. بۇل باعالى شىعارما بۇگىندە وسكەمەندەگى ونەر مۋزەيىندە ساقتاۋلى تۇر.
مۋزەيدە بۇرىنعى سۋرەتشىلەردىڭ كارتينالارى عانا ەمەس, ەسەنعالي سادىرباەۆ, نيكولاي اشتەما سىندى قازىرگى سۋرەتشىلەردىڭ دە قولتاڭبالارى توپتاستىرىلعان.
شىعىستاعى ونەر مۋزەيى بەينەلەۋ, ادەبيەت جانە مۋزىكا باعىتىمەن ەرەكشەلەنەدى. ونەرتانۋشىلاردىڭ ايتۋىنشا, مۇندا جيناقتالعان مۋزىكا مەن ادەبيەتتىڭ باي قورلارى ءالى زەرتتەلە قويماعان. جالپى, مۋزەيدە ۇزىن سانى ون مىڭعا جۋىق ەكسپونات بار. ولاردىڭ باسىم بولىگى گرافيكا, كەسكىندەمە, ءمۇسىن, ساندىك-قولدانبالى ونەردىڭ تۇرلەرىنەن جيناقتالعان.
سالتاناتتى ءىس-شاراعا مۋزەيمەن تىعىز بايلانىستى سۋرەتشىلەر, اقىندار, مۋزىكالىق بىرلەستىكتەردىڭ وكىلدەرى, قالانىڭ مادەني مەكەمەلەرىنىڭ قىزمەتكەرلەرى دە شاقىرىلدى. ەلدەگى جاعدايعا بايلانىستى كەلە الماعان سۋرەتشىلەر, مۋزەيدىڭ بۇرىنعى قىزمەتكەرلەرى ەكران ارقىلى جۇرەكجاردى قۇتتىقتاۋلارىن جولدادى.
وسكەمەن