كاريب تەڭىزىندە باستالعان «ەتا» داۋىلىنىڭ ەكپىنى كۇشەيىپ كەلەدى. ساراپشىلاردىڭ بولجاۋىنشا, الداعى تاۋلىكتە دولى جەل ودان سايىن قۇتىرىپ, ونىڭ دەڭگەيى بەسىنشى ساناتقا جەتۋى مۇمكىن. دەگەنمەن اقش ۇلتتىق ورتالىعىنىڭ حابارلاۋىنشا, «ەتا» ءۇيىرىپ سوققانىمەن, جىلجۋ قارقىنى باسەڭدەۋ. قازىرگى تاڭدا جەلدىڭ جىلدامدىعى سەكۋندىنا 54 مەترگە جەتكەن. سوعان قاراماستان, داۋىلدىڭ جىلدامدىعى كەز كەلگەن ساتتە ارتىپ كەتۋى ىقتيمال.
جالپى, «ەتا» نيكاراگۋاعا عانا باعىت العان جوق. سول سەبەپتى ورتالىق امەريكاداعى بىرقاتار مەملەكەت اپاتقا قارسى تۇرۋعا دايىندىقتى باستاپ كەتتى. ماسەلەن, نيكاراگۋادا جاعاجايلار جابىلسا, گوندۋراستا دا داۋىل تۋرالى جاپپاي ەسكەرتۋ جاسالدى. بۇدان بولەك, مەكسيكا, پاناما سەكىلدى ەلدەردە مول جاۋىن-شاشىن بولاتىنى حابارلاندى.
اقش ۇلتتىق ورتالىعى جاۋىن-شاشىننىڭ مول ءتۇسۋى سالدارىنان تاۋلى ايماقتاردا كوشكىن ءجۇرىپ, سەل باسۋ قاۋپى بار ەكەنىن جەتكىزدى. اسىرەسە يامايكا, مەكسيكانىڭ وڭتۇستىك-شىعىسى, سالۆادور, گايتيدىڭ وڭتۇستىك بولىگى جانە كايمان ارالدارىندا وزەندەردەگى سۋ دەڭگەيىنىڭ كوتەرىلۋى ابدەن مۇمكىن.
داۋىل نيكاراگۋا مەن گوندۋراستىڭ تاۋلى اۋداندارىنا جەتىپ, سودان كەيىن سولتۇستىككە, بەليز جاققا قاراي باعىت الماق. بىراق قازىر داۋىلدىڭ تراەكتورياسى مەن قارقىنىن انىقتاۋ وتە قيىن. ايتا كەتەرلىگى, «ەتا» – بيىلعى 28-ءشى داۋىل. وسىلايشا, ءبىر جىلداعى دۇلەي جەلدىڭ كورسەتكىشى بويىنشا رەكورد جاڭارتىلدى.