جامبىل وبلىسىنىڭ اكىمى بەردىبەك ساپارباەۆ كوروناۆيرۋستىڭ ەكىنشى تولقىنىنا دايىندىق بارىسىن پىسىقتادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
كوروناۆيرۋسپەن كۇرەسۋ ستراتەگياسى بىرنەشە پۋنكتەن تۇرادى دەسەك, ولار – توسەك ورىندارى, مەديتسينالىق قىزمەتكەرلەر, ءدارى-دارمەكتەر, قاجەتتى جابدىقتار, زەرتحانالىق زەرتتەۋلەر, جەكە قورعانىس قۇرالدارىمەن قامتۋ شارالارى جانە ءموبيلدى توپتاردىڭ جۇمىسى.
بۇل ورايدا جامبىل وبلىسىنىڭ اكىمى بەردىبەك ساپارباەۆ بارلىق قارجىلىق جانە ينفراقۇرىلىمدىق رەسۋرستاردى جۇمىلدىرۋدى تاپسىرىپ, قاۋىپتى ينفەكتسيا ءورشي تۇسكەن جاعدايدا بارىنشا دايىن بولۋعا شاقىردى. وبلىستىق جەدەل شتابتىڭ كەزەكتى وتىرىسىندا دەنساۋلىق ساقتاۋ باسقارماسىنىڭ باسشىسى اسەت قاليەۆ مەديتسينالىق مەكەمەلەردىڭ 100 پايىز دايىن ەكەنىن ايتتى.
وبلىستا 2530 توسەك-ورىن جاساقتالعان, ونىڭ 253-ءى جان ساقتاۋ بولىمىنە تيەسىلى. مەديتسينالىق مەكەمەلەردە وكپەنىڭ 253 جاساندى جەلدەتكىش قۇرال, 706 وتتەگى باللونى, 542 وتتەگى كونتسەنتراتورى, 1009 يمپۋلستىك وكسيمەتر, 19 تسيفرلىق رەنتگەن اپپاراتى, 10 كومپيۋتەرلىك جانە 7 ماگنيتتىك-رەزونانستىق توموگرافتار بار. جاقىن ارادا تاعى 74 ءوجج, جەتى كومپيۋتەرلىك توموگراف, ءتورت تسيفرلىق رەنتگەن اپپاراتى, ءتورت وتتەگى ستانتسياسى, سونداي-اق, 74 بىرلىك جەدەل جاردەم كولىگى, سەگىز جىلجىمالى مەديتسينالىق كەشەن, 100 كوپفۋنكتسيوندى توسەك جەتكىزىلەدى دەپ كۇتىلۋدە.
بەردىبەك ساپارباەۆ بارلىق رەانيماتسيالىق توسەكتەردى ءوجج اپپاراتىمەن قامتاماسىز ەتۋدى تاپسىردى.
وبلىستىڭ باس دارىگەرى امبۋلاتوريالىق دەڭگەيدە دە, ستاتسيونارلىق دەڭگەيدە دە ءدارى-دارمەكتىڭ جەتكىلىكتى قورى بار ەكەنىن تىلگە تيەك ەتتى.
جالپى, 4 410 مەديتسينا قىزمەتكەرىن تارتۋ جوسپارلانىپ وتىر دەسەك, ونىڭ ىشىندە 882 دارىگەر, 1764 ورتا بۋىن مەديتسينا قىزمەتكەرلەرى جانە سونشا كىشى بۋىن مەديتسينا قىزمەتكەرلەرى بار. وبلىس اكىمى مەن س.د.اسفەندياروۆ اتىنداعى ۇلتتىق مەديتسينالىق ۋنيۆەرسيتەتىنىڭ رەكتورى اراسىندا جاسالعان ىنتىماقتاستىق تۋرالى مەموراندۋم اياسىندا قوسىمشا 150 مامان تارتىلماق.
وڭىردە جەتى پتر زەرتحاناسى بار. مىندەت – زەرتحانالىق زەرتتەۋلەردىڭ تيىمدىلىگىن, پتر زەرتحانالارىنىڭ سانى مەن سىيىمدىلىعىن ارتتىرۋ.
وبلىس اكىمى ءالى دە ءموبيلدى توپتاردىڭ جۇمىسىنا كوڭىلى تولمايتىندىعىن جەتكىزدى.
"وكىنىشكە قاراي, كوروناۆيرۋستىق ينفەكتسيا قاۋپى ءالى جويىلعان جوق. ءبىز ناقتى جانە دايەكتى تۇردە ارەكەت ەتۋىمىز كەرەك. تۇرعىندار نەمقۇرايلىلىق تانىتقان سايىن, كوروناۆيرۋستى جەڭۋ مۇمكىن ەمەس. حالىق ۇيلەنۋ تويلارى مەن مەرەيتويلاردى وتكىزۋدى توقتاتپاي وتىر. مۇنداي فاكتىلەردى انىقتاۋى ءتيىس ءموبيلدى توپتار ەشقانداي ماردىمدى شارا قولدانىپ جاتقان جوق, رەيدتەردى تەك ەسەپ ءۇشىن جۇرگىزۋدە", - دەپ اشۋلاندى وبلىس اكىمى.
مىسالى, تاراز قالاسىندا 10-30 قازان ارالىعىندا ءموبيلدى توپتار 3033 نىساندى تەكسەرىپ, كارانتيندىك رەجيمدى بۇزعانى ءۇشىن تەك 18 حاتتاما تولتىرعان. سارىسۋ, مويىنقۇم, مەركى, جۋالى, قورداي اۋداندارىنداعى ءموبيلدى توپتاردىڭ دا جۇمىسى ويداعىداي ەمەس.
جوعارىدا اتالعان اۋداندار مەن وبلىس ورتالىعىنىڭ اكىمدەرى جاعدايدى تۇزەتەتىندىكتەرىنە سەندىرىپ باقتى.
بەردىبەك ساپارباەۆ كەزدەسۋگە قاتىسقان ءدارىحانا جەلىلەرى وكىلدەرىن جاعدايدىن كەز-كەلگەن باعىتتا ورشۋىنە دايىن بولۋ كەرەكتىگىن, تۋىنداپ وتىرعان ماسەلەلەر تۋرالى اشىق ايتۋعا شاقىردى.