پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا تۇركىستان قالاسىن دامىتۋدىڭ جاڭا باس جوسپارى قارالدى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
تۇركىستان وبلىسىنىڭ اكىمى ءو. شوكەەۆ, يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى ق. وسكەنباەۆ بايانداما جاسادى.
"ەلباسى نۇرسۇلتان ءابىش ۇلى نازارباەۆتىڭ تاريحي باستاماسى مەن شەشىمىنىڭ ارقاسىندا تۇركى الەمىنىڭ مادەني-رۋحاني استاناسى رەتىندە قاسيەتتى تۇركىستان قالاسىن دامىتۋعا ۇلكەن سەرپىن بەرىلدى. مەملەكەت باسشىسى قاسىم-جومارت كەمەل ۇلى توقاەۆ تۇركىستاننىڭ دامۋىنا ەرەكشە كوڭىل بولەدى. قازىرگى تاڭدا تۇركىستان قالاسى قازاقستاننىڭ رۋحاني جاڭعىرۋىنىڭ سيمۆولى مەن ەل ماقتانىشىنا اينالدى", — دەدى ا. مامين.
ۇكىمەت باسشىسى تۇركىستاننىڭ جاڭا دامۋىن قامتاماسىز ەتۋ, تاريحي قۇندىلىقتاردى ساقتاي وتىرىپ, ونى ودان ءارى وركەندەتۋ ماقساتىندا 2018 جىلعى قىركۇيەكتە تۇركىستان قالاسىن دامىتۋدىڭ باس جوسپارىنىڭ تۇجىرىمداماسى ماقۇلدانعانىن اتاپ ءوتتى. قىسقا مەرزىمدە اۋقىمدى جۇمىس اتقارىلدى.
تاريحي-ساۋلەت, اكىمشىلىك-ىسكەرلىك ورتالىقتاردىڭ, كولىك جانە ينجەنەرلىك ينفراقۇرىلىمنىڭ, تۇرعىن ءۇي ايماعىنىڭ قۇرىلىسى قارقىندى تۇردە جۇرگىزىلدى. وبلىس ورتالىعى تۇركىستانعا كوشىرىلگەن كۇننەن باستاپ قالانىڭ نەگىزگى كاپيتالىنا شامامەن 400 ملرد تەڭگە ينۆەستيتسيا باعىتتالدى. جاڭا باس جوسپارعا سايكەس قالا اۋماعى 3 مىڭ گەكتارعا جۋىق ۇلعايدى. حالىق سانى 165 مىڭنان 176 مىڭ ادامعا دەيىن ءوستى, 2025 جىلعا قاراي ول شامامەن 250 مىڭ, ال 2035 جىلعا قاراي 350 مىڭ ادام بولادى دەپ بولجانىپ وتىر.
ۇكىمەت باسشىسى تۇركىستاندى دامىتۋدىڭ جاڭا باس جوسپارى بەلسەندى دامىپ كەلە جاتقان قالانىڭ بارلىق قاجەتتىلىكتەرىن ەسكەرەتىنىن جانە ونىڭ تۇرعىندارى مەن قوناقتارى ءۇشىن تولىققاندى جايلى ورتا قۇرۋعا جول اشاتىنىن اتاپ ءوتتى.
جوسپار قالانىڭ جانە تۇركىستان وبلىسىنىڭ اتقارۋشى ورگاندارىمەن, سونداي-اق ورتالىق مەملەكەتتىك ورگاندارمەن كەلىسىلدى. قالا ينفراقۇرىلىمىن دامىتۋدىڭ بارلىق ەگجەي-تەگجەيلى سحەمالارى ازىرلەندى. پرەمەر-مينيستر بەكىتىلگەن جوسپاردىڭ بارلىق جوبالارىن جۇزەگە اسىرۋدى تاپسىردى.