بيىل بەلگىلى قالامگەر, ەتنوگراف, باسپاگەر, قازاقستان جازۋشىلار وداعىنىڭ مۇشەسى, ءتۇرلى تاقىرىپتا جازىلعان 15 تومدىق كىتاپتىڭ اۆتورى زەينوللا سانىكتىڭ تۋعانىنا 85 جىل.
حالقىنا مول رۋحاني بايلىق قالدىرعان جازۋشىنىڭ مەرەيتويىنا وراي «زەينولا سانىك اتىنداعى مادەنيەت قورى» يگىلىكتى ءىس-شارالار اتقارىپ وتىر. اتاپ ايتقاندا, قالامگەردىڭ اتا قونىسى ءۇرجار اۋدانىنىڭ قابانباي اۋىلىندا اۋدان اكىمدىگىنىڭ قولداۋىمەن «زەينوللا سانىك اتىنداعى ادەبيەت كابينەتى» اشىلدى. 3 ميلليون تەڭگەگە زاماناۋي ۇلگىدە جابدىقتالعان ارنايى كابينەتكە 60-قا تارتا تانىمال اقىن-جازۋشىلاردىڭ كىتاپتارى سىيعا تارتىلدى. سونىمەن قاتار قابانباي اۋىلىنداعى ەكى مەكتەپتىڭ الەۋمەتتىك از قامتىلعان ەڭ ۇزدىك, تالانتتى 7 وقۋشىسىنا ىنتالاندىرۋ رەتىندە 50 000 تەڭگەدەن شاكىرتاقى بەرىلدى. الداعى ۋاقىتتا دا مەكتەپتىڭ تالانتتى وقۋشىلارىنا تۇراقتى تۇردە قولداۋ جاسالا بەرمەك. ياعني وقۋشىلار اراسىندا وليمپيادا مەن عىلىمي جوبالار بايقاۋىن وتكىزۋ جانە ۇزدىك مەكتەپ تۇلەگىنىڭ جوعارى وقۋ ورنىندا سۇرانىسقا يە ماماندىق بويىنشا ءبىلىم الۋىنا كومەكتەسۋ كوزدەلگەن. تاعى ءبىر اتاپ وتەرلىگى, ىندەت ورشىگەن تۇستا مادەنيەت قورى قابانباي اۋىلدىق اۋرۋحاناسىنا 3,5 ميلليون تەڭگەگە 6 دانا وتتەگى اپپاراتى مەن ارنايى مەديتسينالىق توسەك الىپ بەردى. سونىمەن قاتار قور تارباعاتاي اۋداندىق اۋرۋحاناسىنا دا 3 وتتەگى اپپاراتىن جەتكىزدى.
زاماناۋي ۇلگىدەگى ادەبيەت كابينەتىنىڭ اشىلۋىنا قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, تانىمال اقىن اقبەرەن ەلگەزەك, ءۇرجار اۋدانى اكىمىنىڭ ورىنباسارى ءبىرجان قادىر ۇلى, اۋداندىق ىشكى ساياسات, ءبىلىم ءبولىمنىڭ ماماندارى, اۋىل اقساقالدارى, اقىندار مەن ۇستازدار اق باتاسىن بەرىپ, تىلەكتەستىگىن ءبىلدىردى.
اۋىلدىڭ رۋحاني ومىرىنە قان جۇگىرتىپ, ادەبيەت پەن ونەردى دامىتۋعا ۇزبەي ۇلەس قوسىپ كەلە جاتقان مادەنيەت قورىنىڭ تاعىلىمدى ءىس-شاراسى ءۇرجار اۋداندىق مادەنيەت ۇيىندە جالعاستى. اۋداندىق مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن اقىن اقبەرەن ەلگەزەكتىڭ الماتى مەن نۇر-سۇلتاندا جوسپارلاپ وتپەي قالعان «بولماعان بالالىق شاق» كىتابىنىڭ تانىستىرىلىمىنا ارنالعان شاعىن ادەبي كەش ءوتتى. اقىننىڭ ولەڭدەرى وقىلىپ, ولەڭىنە جازىلعان اندەر شىرقالىپ, وقىرمان كوكەيىندەگى سۇراقتارعا اۆتوردىڭ ءوزى جاۋاپ بەردى. سونداي-اق تالانتتى 3 ونەرپازعا قور اتىنان ارنايى شاكىرتاقى بەرىلدى.
قوردىڭ قولداۋىمەن قوس اقىن اقبەرەن ەلگەزەك پەن داۋلەتكەرەي كاپ ۇلىنىڭ 100 كىتابى ءۇرجار كىتاپحانالارىنا جول تارتتى.
تاياۋدا عانا «زەينوللا سانىك اتىنداعى مادەنيەت قورىنىڭ» جۇلدەسى ءۇشىن استانالىق باق وكىلدەرى اراسىندا شاعىن فۋتبولدان مەرەيتويلىق تۋرنير وتكىزىلگەن ەدى. اتالعان سپورتتىق شارا 31 قازاندا الماتىدا جالعاسپاق. وعان باق وكىلدەرى مەن قاتار اقىن-جازۋشىلار دا قاتىسۋعا نيەت ءبىلدىرىپ وتىر.
ءيىسى قازاققا يگىلىگى جەتەتىن جاقسى ىستەردىڭ ۇيىتقىسى بولىپ كەلە جاتقان «زەينوللا سانىك اتىنداعى مادەنيەت قورى» بۇعان دەيىن زەرتتەۋشىلەر مەن قالامگەرلەردىڭ كىتابىنىڭ شىعۋىنا قولداۋ جاسادى. الاكولدە اقىندار ايتىسى, الماتىدا وقۋشىلار اراسىندا ء«دىلمار» شەشەندىك ونەر بايقاۋى, ورالدا باتىس ايماقتىق جىرشى-تەرمەشىلەر فەستيۆالىن وتكىزۋگە دەمەۋشىلىك جاساپ ۇيىتقى بولدى. الداعى ۋاقىتتا دا مادەنيەت قورىنىڭ ءماندى-مازمۇندى شارالارى جالعاسا بەرمەك.