قازاقتىڭ ۇلى اقىنى ءارى ويشىلى اباي قۇنانباي ۇلىنىڭ 175 جىلدىعىنا وراي قازاقستاننىڭ ماجارستانداعى ەلشىلىگىندە "اباي ورتالىعىنىڭ" اشىلۋ ءراسىمى ءوتتى, دەپ حابارلايدى Egemen.kz.
ءىس-شاراعا ماجارستاننىڭ كورنەكتى قوعام قايراتكەرلەرى, قازاق دياسپوراسىنىڭ وكىلدەرى, سول ەلدەگى جوعارى وقۋ ورىندارىندا ءبىلىم الىپ جاتقان قازاقستاندىق ستۋدەنتتەر, سونداي-اق قازاق ءتىلى مەن ادەبيەتىن وقىپ جاتقان جانە قازاق مادەنيەتىنە قىزىعۋشىلىق تانىتقان ماجار ستۋدەنتتەرى قاتىستى.
ەلشى جانىبەك ءابدراشوۆ ءوزىنىڭ العى سوزىندە ورتالىقتى اشۋدىڭ ماقساتى قازاق مادەنيەتىن, ونەرى مەن ادەبيەتىن ناسيحاتتاۋ, سونداي-اق قازاق دياسپوراسى وكىلدەرى مەن ماجار ستۋدەنتتەرىنە قازاق ءتىلى مەن ادەبيەتىن, سونىمەن بىرگە ولاردى ۇلتتىق مۋزىكالىق اسپاپتاردا وقىتۋدا كومەك كورسەتۋ بولىپ تابىلاتىنىن اتاپ ءوتتى.
ءىس-شارا بارىسىندا ستۋدەنت جاستاردىڭ وكىلدەرى ابايدىڭ ولەڭدەرى مەن اندەرىن, سونداي-اق "قارا سوزدەرىنەن" ۇزىندىلەردى قازاق جانە ماجار تىلدەرىندە وقىدى.