سەنات سپيكەرى ماۋلەن اشىمباەۆتىڭ توراعالىعىمەن پالاتانىڭ جالپى وتىرىسى ءوتتى, دەپ حابارلايدى Egemen.kz.
وتىرىس بارىسىندا دەپۋتاتتار «2020-2022 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى.
رەسپۋبليكالىق بيۋدجەتتى ناقتىلاۋ پاندەميامەن كۇرەس جۇمىستارىن قارجىلاندىرۋعا, مەملەكەتتىڭ الەۋمەتتىك مىندەتتەرىن ورىنداۋعا, «نۇرلى جول», «نۇرلى جەر» مەملەكەتتىك باعدارلامالارى اياسىندا ەكونوميكانىڭ ناقتى سالالارىن قولداۋعا, اگروونەركاسىپتىك كەشەندى دامىتۋعا جانە يندۋستريالدى-يننوۆاتسيالىق دامۋ باعدارلامالارىن ىسكە اسىرۋعا باعىتتالعان.
سەنات توراعاسى بۇگىن قابىلدانعان زاڭنىڭ ەلىمىز ءۇشىن ماڭىزى زور ەكەنىن ايتتى.
«رەسپۋبليكالىق بيۋدجەتتى ناقتىلاۋ پرەزيدەنتىمىزدىڭ بيىلعى جولداۋىندا ايتىلعان الەۋمەتتىك تاپسىرمالاردى ورىنداۋعا, ەكونوميكالىق ءوسۋدى قالپىنا كەلتىرۋگە جانە پاندەميامەن كۇرەسۋگە باعىتتالعان. شىن مانىندە, بيىلعى جىل ىندەتكە بايلانىستى وڭايعا ءتيىپ جاتقان جوق. سوعان قاراماستان پرەزيدەنتىمىز مەملەكەتتىڭ حالىق الدىنداعى الەۋمەتتىك مىندەتتەرىن ورىنداۋ ءۇشىن بار مۇمكىندىكتى جاساۋدا», – دەدى ماۋلەن اشىمباەۆ.
سەنات سپيكەرىنىڭ ايتۋىنشا, رەسپۋبليكالىق بيۋدجەتتى ناقتىلاۋ كەزىندە الەۋمەتتىك ماسەلەلەردى شەشۋگە, ەكونوميكانىڭ ناقتى سەكتورلارىن قولداۋعا باسا ءمان بەرىلگەن.
«زاڭ جوبالارىن تالقىلاۋ بارىسىندا سەنات دەپۋتاتتارى كوپتەگەن وزەكتى ماسەلەلەردى كوتەردى. ۇكىمەت ولارعا مۇقيات نازار اۋدارىپ, وڭ شەشۋ ءۇشىن كەشەندى جۇمىس جۇرگىزەدى دەپ ويلايمىز. بيۋدجەتتەن بولىنگەن قاراجات ساپالى ءارى ءتيىمدى جۇمسالىپ, حالىقتىڭ يگىلىگىنە, ەكونوميكانى قالپىنا كەلتىرۋگە باعىتتالادى دەپ سەنەمىز», – دەدى سەنات توراعاسى.
سونىمەن قاتار سەناتورلار «قازاقستان رەسپۋبليكاسىنىڭ ۇلتتىق قورىنان 2020-2022 جىلدارعا ارنالعان كەپىلدەندىرىلگەن ترانسفەرت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى.
زاڭ جوباسىندا ۇلتتىق قوردان 2020 جىلعا ارنالعان رەسپۋبليكالىق بيۋدجەتكە 4 770 ملرد. تەڭگە سوماسىندا كەپىلدەندىرىلگەن ترانسفەرت مولشەرى بەلگىلەنگەن.
سونداي-اق, وتىرىستا بىرقاتار دەپۋتاتتىق ساۋالدار جولداندى. سەناتور باۋىرجان قانيەۆ «ورتالىق-باتىس» جوباسىن ىسكە اسىرۋ اياسىندا «شالقار-ەمبى-قاندىاعاش» اۆتوموبيل جولىنىڭ قۇرىلىسى تۋرالى ايتتى. ۆلاديمير ۆولكوۆ قىلمىستىق-اتقارۋ جۇيەسىندەگى ماسەلەلەردى كوتەردى. ال مۇحتار قۇل-مۇحاممەدتىڭ ساۋالى بەلگىلى عالىم, اكادەميك سالىق زيمانوۆتىڭ 100 جىلدىعىنا قاتىستى بولدى.