ىندەت قايتا ءورشىپ بارادى

فرانتسيادا وتكەن دۇيسەنبىدە 52 مىڭنان استام ناۋقاس انىق­تالدى. وسىعان بايلانىستى ەل بيلىگى دابىل قاعىپ, شەكتەۋ شارالارىن كۇشەيتۋگە كىرىسپەك. ەل پرەزيدەنتى ەممانۋەل ماكرون مينيسترلەر كابينەتىمەن كەز­دە­سىپ, پاندەميامەن كۇرەسۋ ماسەلەلەرىن تالقىلادى.

پرەمەر-مينيستر جان كاس­تەنىڭ ايتۋىنشا, جيىن بارىسىندا دەنساۋلىق سالاسىنداعى قيىندىقتاردى ەڭسەرۋ ماسەلەسى قارالعان. دەگەنمەن بيلىك وكىلدەرى كوكتەمدەگىدەي لوكداۋن ەنگىزۋ بيزنەس­كە زور سوققى اكەلەدى دەپ ەسەپتەيدى. وسىعان بايلانىستى, ۆيرۋس­تىڭ ەكىنشى تولقىنىمەن كۇرەستە مۇن­داي شەكتەۋلەردى ەنگىزبەۋگە مۇددەلى.

ىندەت جۇقتىرعاندار سانى قايتا كوبەيگەن پاريج باستاعان بىرنەشە ۇلكەن قالادا 17 قازاننان باستاپ كومەندانتتىق ساعات ەن­گىزىلدى. دەن­ساۋ­لىق سالاسىنا جاۋاپتى مەكەمە وكىل­دەرىنىڭ سوزىنە سۇيەنسەك, ۆيرۋستىڭ قايتا ورشۋىنە ادامداردىڭ الەۋمەتتىك قاشىقتىقتى ساقتاماۋى, كاران­تيندىك تالاپتاردى ورىنداماۋى اسەر ەتىپ وتىر.

قازىرگى تاڭدا فرانتسيادا قاتەرلى دەرتتى جۇقتىرعاندار سانى 1 ميل­ليون 138 مىڭ ادامنان اسىپ, 35 مىڭعا جۋىق ناۋ­قاس اجال قۇشتى. اسىرەسە كۇز باس­تالعالى بەرى COVID-19-دىڭ قۇرى­عىنا شالدىققاندار سانى كۇرت ارتتى.

يسپانيادا دا ۆيرۋس جۇق­تىر­عاندار سانى ميلليوننان استى. پيرە­نەي تۇبەگىندە ىندەت بىردەن كۇرت كوبەي­مەسە دە, ناۋقاستار سانى كۇن سا­ناپ ارتىپ كەلەدى. بۇل ەلدە دە باقي­لىق بولعاندار سانى 35 مىڭعا جۋىقتاعان.

وسىعان بايلانىستى يسپانيا بيلىگى وتكەن جەكسەنبىدە توتەنشە جاعداي جاريالاپ, بۇكىل ەل اۋماعىندا كارانتين جاريالادى. پاندەميا قاتتى تاراماعان كانار ارالدارى عانا ازىرگە مۇنداي شەكتەۋدەن ادا.

يتاليا ۇكىمەتى تۇرعىندارعا ەۋروپانىڭ باسقا مەملەكەتتەرىنە بارماۋعا كەڭەس بەرەدى. بۇعان قۇر­لىقتاعى احۋالدىڭ ناشار­لاۋى سەبەپ. سىرتقى ىستەر ءمينيسترىنىڭ حابارلاۋىنشا, كارانتيندىك شارالار قاتاڭداتىلسا, شەتەلگە بارعان يتاليالىقتاردىڭ سوندا قالىپ قويۋ ىقتيمالدىعى جوعارى.

سونداي-اق سىرتقى ىستەر مي­نيسترلىگى اپەننين تۇبەگى تۇرعىن­دارىنىڭ ەۋروپادان الىسقا بارماۋىن سۇراپ وتىر. ويتكەنى الەمنىڭ باسقا تۇكپىرلەرىندەگى جاعداي دا تۇراقسىز.

ەل بيلىگىنىڭ مۇنداي ەسكەرتۋ جاساۋى بەكەر ەمەس. كوكتەمدە ىندەت كۇشەيگەندە 100 مىڭنان استام يتاليالىق شەتەلدەردە قالىپ كەتكەن ەدى. ۇكىمەت ولاردى ەلگە اكەلۋ ءۇشىن قىرۋار قارجى مەن كۇش جۇمسادى.

كوروناۆيرۋستىڭ ەۋروپاداعى العاشقى وشاعى سانالعان يتاليادا بۇگىندە 550 مىڭنان استام ادام ۆيرۋس جۇقتىرعان. ال قايتىس بولعاندار سانى 38 مىڭعا تاياپ قالدى. قازان باستالعالى بەرى اپەننين تۇبەگىندەگى ەپيدە­ميالىق احۋال كۇرت ناشارلاپ, ناۋقاستار سانى ارتىپ كەلەدى.

بەلگيادا دا جاعداي كۇردەلى. ءبىر اپتا بويى كۇندەلىكتى تىركەل­گەن ناۋقاستار سانى 12 مىڭنان ازايماي تۇر. Associated Press اگەنتتىگىنىڭ حابارلاۋىنشا, تەست تاپسىرعانداردىڭ ءار بەسىنشىسى ۆيرۋس جۇقتىرعانى انىقتالىپ وتىر. وكىنىشكە قاراي, اجال قۇش­قان­د­اردىڭ دا سانى كوبەيىپ بارادى. ماسەلەن, وتكەن اپتادا كۇنىنە قىرىق شاقتى ادام باقيعا اتتانعان. قازىر ەلدەگى اۋرۋحانالاردا جاتقان ناۋقاستار دا كوپ.

دۇيسەنبى كۇنى ەل بيلىگى كارانتين تالاپتارىن كۇشەيتتى. شەكتەۋ شارالارى 19 قاراشاعا دەيىن جالعاسپاق. ۋاللونيا ايماعى مەن بريۋسسەلدە كومەن­دانتتىق ساعات ەنگىزىلدى. ادام­دار كوشەدە دە, عيماراتتا دا ماس­كا تاعۋعا مىندەتتى. كينوتەاترلار, تەاتر­لار, سپورت ورتالىقتارى جابىل­دى. كەلەسى اپتادان باستاپ مەك­تەپ وقۋ­شى­لارىنىڭ دەمالىسى ۇزار­تىلىپ, قاشىقتان وقىتۋعا كوشپەك.

گەرمانيادا دا ۆيرۋس كۇشەيىپ كەلەدى. كانتسلەر انگەلا مەركەل ىندەتتى باقىلاۋ قيىنداپ بارا جات­قانىن ايتىپ دابىل قاعىپ وتىر. ونىڭ سوزىنە سۇيەنسەك, الدا نەمىس حال­قىن بىرنەشە اي بويى وتە قيىن كە­زەڭ كۇتىپ تۇر. گەر­مانياداعى احۋال كۇر­دەلى ءارى ءار كۇن ۆيرۋسپەن كۇرەسۋدە ماڭىزعا يە.

چەحياداعى ەپيدەميالىق جاع­داي دا قيىنداپ بارادى. دەنساۋلىق ساقتاۋ ءمينيستر­ى رومان پري­مۋ­لانىڭ سوزىنە سۇيەنسەك, كورونا­ۆيرۋس جۇقتىرعاندار سانى كوبە­يۋى­نە جول بەرمەس ءۇشىن ەلدە كومەن­دانت­تىق ساعات ەنگىزىلدى. سوعان سايكەس تۇرعىندارعا 28 قازان مەن 3 قاراشا ارالىعىندا 21.00-دەن 05.00-گە دەيىن كوشەگە شىعۋعا تىيىم سالۋ تۋرالى شەشىم قابىلداندى.

مينيسترلەر كابينەتى بارلىق مەملەكەتتىك جانە جەكە ۇيىمدار مەن كومپانيالارعا جۇمىستى قا­شىقتان جالعاستىرۋدى ۇسىن­دى. سونداي-اق 27 قازاندا ۇكى­مەت پارلامەنتتەن توتەنشە جاعداي رەجىمىن تاعى 30 كۇنگە ۇزارتۋدى سۇراعان. قازىرگى تاڭدا چەحيادا 162 مىڭنان اسا ادام كوروناۆيرۋس جۇقتىرعان, سونىڭ ىشىندە 2337 ناۋقاس قايتىس بولعان.

پورتۋگاليانىڭ كەز كەلگەن تۇر­عىنى كوشەدە ماسكا تاعۋعا مىن­دەت­تەلدى. ەل پارلامەنتى وسىنداي زاڭ قابىلدادى. وعان باعىنباعان­دار بىر­دەن جاۋاپقا تارتىلماق. ايىپ­پۇل كولەمى 500 ەۋروعا دەيىن بارۋى مۇمكىن. بۇدان بولەك, پورتۋگا­ليا ۇكىمەتى تۇرعىندارعا حەللوۋين مەرەكەسى كەزىندە ساپارعا شىعۋعا تىيىم سالدى. بۇل شەكتەۋ 30 قازان­نان 3 قاراشاعا دەيىن كۇشىن جويمايدى. پورتۋگاليادا سوڭعى ەكى اپتا بويى كۇن سايىن شامامەن 2 مىڭ ناۋقاس تىركەلىپ كەلەدى. ۆيرۋس جۇق­تىرعانداردىڭ جالپى سانى 110 مىڭ­نان اسىپ كەتكەن.

اقش-تا 23 قازاندا پاندەميا باستالعالى بەرى ءبىر تاۋلىك­تە كوروناۆيرۋس جۇقتىرعان ناۋ­قاس سانى بويىنشا انتيرەكورد تىركەلدى. دجونس حوپكينس اتىن­داعى ۋنيۆەرسيتەت دەرەگىنە سۇيەنسەك, ءبىر كۇندە 81521 ادامنىڭ ۆيرۋس جۇقتىر­عانى انىقتالعان. سونداي-اق قايتىس بولعاندار سانى دا وسە ءتۇستى.

ساراپشىلاردىڭ ايتۋىنشا, قيىن جاعداي ءالى الدا. قازىر­گى تاڭدا اۋرۋحاناعا جاتقى­زىل­عاندار سانى 75 پايىزعا وسكەن. وسىعان بايلانىس­تى قايتىس بولعانداردىڭ دا سانى كۇرت ۇلعايۋى مۇمكىن دەگەن قاۋىپ بار. دەنساۋلىق سالاسىنا جاۋاپتى قىزمەتكەرلەر ناۋقاستار سانى كۇن ساناپ ارتىپ بارا جاتقانىنا الاڭداپ, كارانتيندىك شارالاردى كۇشەيتۋگە شاقىردى. بۇگىنگە دەيىن مۇحيتتىڭ ارعى بەتىندە 8,9 ميلليون ادام قاتەرلى دەرتكە شالدىعىپ, 231 مىڭنان استام ادام باقيعا اتتاندى.

قىتايدا دا ۆيرۋس قايتا كۇشىنە ءمىنۋى مۇمكىن. كەيىنگى دەرەك­تەرگە سۇيەنسەك, شىڭجاڭ-ۇيعىر اۆتونو­ميالىق ايماعىنىڭ تۇرعىندارى كوروناۆيرۋستىڭ بار-جوعىن انىق­تايتىن تەستى­دەن ءوتىپ جاتىر. تاياۋدا عانا وسى وڭىردە 137 ادامنىڭ سيمپ­توم­سىز اۋىرعانى بەلگىلى بولدى.

قازىردىڭ وزىندە ايماقتاعى 2,8 ميلليوننان استام تۇرعىن تەستى­لەۋدەن ءوتتى. جالپى, بارلىعى 4,7 ملن ادام تەست تاپسىرۋى ءتيىس. ءوڭىر­دىڭ مۇنداي قادامعا بارۋىنا تاياۋ­دا ءبىر ادامنىڭ ۆيرۋس جۇق­تىر­عا­نى سەبەپ بولىپ وتىر. ول جەر­گىلىك­تى توقىما كاسىپورنىندا جۇمىس ىستەيدى ەكەن. ءارى ايماقتان تىس جەر­لەرگە شىقپاعان. وسىعان بايلانىستى ەڭ اۋەلى بۇكىل تىگىن فابري­كاسى قىزمەتكەرلەرىنەن اناليز الىنعان. ايتسە دە, قىتايدا جىل باسىنداعىداي كۇردەلى جاعداي جوق. بۇگىنگە دەيىن وسى ەلدە 86 مىڭعا جۋىق ادام Covid-19 جۇقتىرىپ, 4634 ادام و دۇنيەگە اتتاندى.

يران كوروناۆيرۋس ىندەتىنە باي­لانىستى قابىلدانعان شەك­تەۋلەردىڭ مەرزىمىن قاراشا­نىڭ جيىرماسىنا دەيىن ۇزارتتى. اتاپ ايتقاندا, ەل استاناسى تەگەراندا مەكتەپتەر, مەشىتتەر, دۇكەندەر مەن مەيرامحانالار جۇمىس ىستەمەيدى.

ىندەتتىڭ ورشۋىنە بايلانىستى كەيبىر وڭىرلەردىڭ اۋرۋحانالارىندا ورىن جەتىسپەي جاتىر. دارىگەرلەردىڭ ايتۋىنشا, ەل اۋماعىندا ءار ءتورت مينۋت سايىن ءبىر ادام وسى دەرتتىڭ سالدارىنان جارىق دۇنيەمەن قوشتاسادى. دەنساۋلىق ساقتاۋ مينيسترلىگىنىڭ وكىلدەرى ەگەر حالىق سانيتارلىق قاۋىپسىزدىك شارالارىن ساقتاماسا, كۇن سايىنعى ءولىم سانى 600-گە دەيىن ءوسۋى مۇمكىن دەپ ەسكەرتتى. كەيىنگى ءبىر اپتادا يراندا كۇن سايىن 6 مىڭ­عا جۋىق ادامنىڭ ناۋقاستانعانى انىق­تالادى. ەل بويىنشا بۇل اۋرۋدى جۇقتىرعانداردىڭ سانى 574 مىڭنان اسىپ, 33 مىڭ ادام اجال قۇشتى.

رەسەيدە COVID-19 جۇقتىرۋ بويىن­شا انتيرەكورد تىركەلدى. وسى ەلدىڭ شۇعىل شتابىنىڭ مالىمەتىنە سۇيەنسەك, كەيىنگى تاۋلىكتە 17 347 ادامن­ىڭ كوروناۆيرۋس جۇقتىرعانى انىقتالدى.

ناۋقاستاردىڭ كوبى ماس­كەۋدە (5224), سانكت-پەتەر­بۋرگ­تە (715) جانە ماسكەۋ ماڭىندا (499) تىركەلدى. ۆيرۋس جۇقتىر­عانداردىڭ ىشىندە تورتتەن ءبىر بولىگىنەن اسا ادامدا اۋرۋدىڭ سيمپ­تومدارى بولماعان. كەيىنگى تاۋلىكتە 219 ادام قايتىس بولىپ, 7 574 ناۋقاس جازىلدى.

دۇنيەجۇزىلىك دەنساۋلىق ساق­تاۋ ۇيىمىنىڭ باسشىسى تەدروس ادانوم گەبرەيەسۋس كوروناۆيرۋستىڭ تارالۋى­نا بايلانىستى الەمدە قيىن جاعداي تۋىنداعانىن حابارلادى.

«الەم, اسىرەسە سولتۇستىك جارتى شار بۇل پاندەميانىڭ كۇردەلى كەزەڭىندە تۇر. الداعى بىرنەشە اي وتە قيىن بولادى. كەي ەلدەردەگى احۋال مۇلدەم كۇردەلەنۋى مۇمكىن. قازىرگى تاڭدا سىرقاتتانعان ادامدار سانى كۇرت ءوسىپ جاتىر», دەپ مالىمدەدى ت.گەبرەيەسۋس.

ددۇ باسشىسى الەم ەلدەرىن ءولىم-ءجىتىم كوبەيىپ, دەنساۋلىق ساقتاۋ سالاسى داعدارىسقا تاپ كەلىپ, مەكتەپتەر قايتا جابىلماۋ ءۇشىن شۇعىل شارالار قابىلداۋعا شاقىردى.

قىركۇيەكتىڭ ورتاسىندا ناۋقاس­تار سانى كۇرت كوبەيگەن ءۇندىستاندا جاعداي تۇراقتالىپ كەلە جاتقانداي. قازىر ەلدە ۆيرۋس جۇقتىرعاندار بىرتىندەپ ازايىپ كەلەدى. ايتسە دە, كورسەتكىش ءالى كۇنگە جوعارى دەڭگەيدە قالىپ وتىر. ماسەلەن, قىركۇيەكتە ءبىر كۇندە 98 مىڭعا جۋىق ادامنىڭ دەرت تىرناعىنا شالدىققانى بەلگىلى بولعان ەدى. بۇگىندە سىرقاتتانعاندار سانى 35-40 مىڭنىڭ اينالاسىندا. دەگەنمەن ىندەت باستالعالى بەرى ءۇندىستاندا 8 ميلليونعا جۋىق ادام ناۋقاستانىپ, 119 مىڭنان استامى اجال قۇشتى.

جالپى, الەمدە كوروناۆيرۋس ناۋقاستارى سانى 43 ميلليوننان اسىپ, 1 ميلليون 156 مىڭ ادام بۇل ومىرمەن قوشتاستى. دۇ­نيە­جۇزىلىك دەنساۋلىق ساقتاۋ ۇيى­مىنىڭ حابارلاۋىنشا, ەۋروپا ىندەتتىڭ وشاعىنا اينال­عان. قازىرگى تاڭدا كۇن سايىن تىركەلەتىن جارتى ميلليون وقيعانىڭ 200 مىڭى وسى قارت قۇرلىققا تيەسىلى.