جازيرالى جاركەنت وڭىرىندە «جۇمىسپەن قامتۋدىڭ جول كارتاسى» باعدارلاماسى اياسىندا 55 جوبا قولعا الىنعان. سونىڭ ءبىرى – ەڭبەكشى ورتا مەكتەبى. ىرگەتاسى 35 جىل بۇرىن سالىنعان ءبىلىم عيماراتى شاتىرىنان ەدەنىنە دەيىن تولىقتاي جاڭارتىلۋدا.
جول كارتاسىمەن بولىنگەن كۇردەلى جوندەۋ جۇمىستارىن «نۇر-شاپاعات قۇرىلىس» جشس اتقارىپ جاتىر. مەردىگەرلەر بۇگىندە نىساننىڭ ىشكى جۇمىستارىن 100 پايىزعا اياقتاعان. ەندى اۋلاسىنداعى اباتتاندىرۋ-كوگالداندىرۋ, جارىق شامدارىن ورناتۋ شارۋالارى قالدى. توزىعى جەتكەن مەكەمەنى بيىلعا دەيىن قىس كەزىندە جىلىتۋ ءبىراز ماسەلە بولعان. جاڭارتىلۋى كەزىندە جىلىتۋ جاعىنا باسا ءمان بەرىلۋدە.
– جىلىتۋ پەشىن سىرتقا شىعاردىق. ەلەكتر جۇيەلەرى 95 پايىزعا جاڭاردى. ەسىك-تەرەزەلەرىنىڭ 90 پايىزى قويىلدى. جىلۋ جۇيەسى 100 پايىز دايىن. اۋىز سۋ جانە كارىز جۇيەسى جاسالدى. سونىمەن قاتار سەيسموكۇشەيتۋ جۇمىستارىن جۇرگىزىپ جاتىرمىز. قازىرگى تاڭدا جۇمىسشى كۇشى جەتكىلىكتى. جوسپار بويىنشا قاراشادا نىساندى اياقتاپ وتكىزەمىز, – دەيدى مەردىگەر مەكەمەنىڭ پرورابى ايدىن جايشىبەكوۆ.
«جۇمىسپەن قامتۋدىڭ جول كارتاسى» بويىنشا جاڭارتىلىپ جاتقان جوبا قۇنى – 958 ملن تەڭگە. مەردىگەرلەر قۇرىلىستى مامىردىڭ ورتاسىندا باستاعان. سودان بەرى 178 جەرگىلىكتى تۇرعىن جۇمىسقا تارتىلىپ وتىر. باستامانىڭ باستى ماقساتى – اۋىلداعى ەكى قولعا ءبىر كۇرەك ىزدەگەن ازاماتتاردى جۇمىسقا تارتۋ بولعان. وسى رەتتە مۇنداعى جۇمىسشىلاردىڭ ايلىق جالاقىسى 85 مىڭنان 200 مىڭ تەڭگەگە دەيىنگى ارالىقتا بەرىلدى. ءدال قازىرگى كۇنى قۇرىلىستىڭ ءبىرشاماسى اياقتالۋىنا بايلانىستى 45 مىڭ تەڭگەگە جۇمىس ىستەپ جاتىر. مەكتەپتىڭ پارتا-تاقتا, كابينەتتەرى, سىنىپتاردىڭ ماتەريالدىق-تەحنيكالىق بازاسى تولىعىمەن جاڭارتىلادى. بۇل ماقساتقا جوبادان بولەك, 23 ملن تەڭگە قارجى بولىنگەن.
شيرەك عاسىرلىق تاريحى بار ءبىلىم شاڭىراعى 1 172 ورىنعا لايىقتالعان. شاعىن ورتالىعىمەن قوسقاندا بۇگىندە 750 بالا تاربيەلەنىپ جاتىر. پاندەميا جاعدايىنا بايلانىستى وقۋشىلار تولىعىمەن ۇيلەرىندە وقىتىلۋدا. جاڭا وقۋ جىلىندا كوپبالالى, از قامتىلعان, مۇقتاج وتباسى بالالارىنا مەكتەپ تاراپىنان 20 نوۋتبۋك-سمارتفوندار ۇلەستىرىلىپ بەرىلدى. ايتا كەتكەن ءجون, كەلەر جىلى اۋداندا قوس مەكتەپ تابيعي گازعا قوسىلادى. جامبىل جانە حامراەۆ ورتا مەكتەپتەرىنە كوگىلدىر وتىن جەتكىزۋ ءۇشىن بۇگىندە جوبانىڭ سمەتالىق قۇجاتتامالارى ازىرلەنۋ ۇستىندە.
پەنجىم اۋىلىنداعى جاڭا امبۋلاتوريانىڭ سالىنۋىنا جول كارتاسى نەگىز بولدى. اۋىل تۇرعىندارىنىڭ يگىلىگى ءۇشىن ىرگەتاسى قالانىپ جاتقان نىسان – 50 ورىندىق. 7 مىڭعا جۋىق حالقى بار ەلدى مەكەندە بۇگىنگە دەيىن زاماناۋي جاڭا ەمدەۋ مەكەمەسى بولماعان. باسى اۋىرىپ, بالتىرى سىزداعان اۋىلداعى اعايىن شاعىن دارىلەرلىك امبۋلاتوريانى جاعالاپ كەلدى. ەندى مىنە, كوپ ۇزاماي قاراشا ايىنان باستاپ جاڭا كەشەنگە كەلەتىن بولادى. مۇنداعى باستى ەرەكشەلىك – ىشىندەگى قوندىرعىلار, ماتەريالدىق-تەحنيكالىق بازا جاڭا زامانعى جابدىقتارمەن قامتاماسىز ەتىلەدى. ازىرگە, 4 دارىگەر قىزمەت كورسەتەدى دەپ جوسپارلانعان. «نۇر-شاپاعات قۇرىلىس» جشس 30 قاراشادا نىساندى تولىقتاي ەل يگىلىگىنە بەرەمىز دەپ بىلەك سىبانىپ وتىر. بۇگىندە جالپى جۇمىستىڭ 70 پايىزى بىتكەن. امبۋلاتوريا عيماراتىنىڭ قۇرىلىسىن سالۋعا 259,2 ملن تەڭگە بولىنگەن. مۇنىمەن قوسا, اۋدانارالىق كوپسالالى اۋرۋحانانى اباتتاندىرۋ جۇمىستارى 52,8 ملن تەڭگەگە اتقارىلۋدا.