نۇر-سۇلتان قالاسىندا ۇزدىك ينسپەكتورلارعا, ورمانشىلارعا جانە تابيعاتتى قورعاۋعا اتسالىسىپ جۇرگەن بەلسەندى ازاماتتارعا ورمان شارۋاشىلىعى مەن جانۋارلار الەمىن ساقتاۋ سالاسىنداعى «ەلىم-اي» سىيلىعى بەرىلدى.
شاراعا ەكولوگيا, گەولوگيا جانە تابيعي رەسۋرستار مينيسترلىگى (ەگتر) مەن «رەسپۋبليكا. ايماق. دامۋ» قوعامدىق قورى ۇيىتقى بولدى.
ماراپاتتالۋشىلارعا سىيلىقتى ەگتر ءمينيسترى ماعزۇم مىرزاعاليەۆ, مادەنيەت جانە سپورت ءمينيسترى اقتوتى رايىمقۇلوۆا, سەناتور نۇرتورە ءجۇسىپ, ءماجىلىس دەپۋتاتتارى پاۆەل كازانتسەۆ, ولگا شيشيگينا, ميكاەليان نارينە, حالىق قاھارمانى ايدىن ايىمبەتوۆ, وليمپيادا چەمپيونى ۆاسيلي لەۆيت, Nur Media حولدينگىنىڭ باسشىسى بولات كاليانبەكوۆ جانە باسقا دا قوعام قايراتكەرلەرى تابىستادى.
«ەلىمىزدە پرەزيدەنتىمىز قاسىم-جومارت توقاەۆتىڭ باستاماسىمەن تۇڭعىش رەت ورمان شارۋاشىلىعى مەن جانۋارلار الەمىن قورعاۋ سالاسىنداعى «ەلىم-اي» سىيلىعىن تاپسىرۋ ارقىلى ءبىز سالاداعى ۇزدىك مامانداردى, جانۋارلارعا, جابايى تابيعاتقا, ەكولوگياعا جانى اشىپ, ءوز ەرىكتەرىمەن قوعامدىق ىستەردىڭ باسىندا جۇرگەن ازاماتتاردىڭ ەڭبەگىن اتاپ وتكىمىز كەلدى», دەدى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
ەكولوگيا مينيسترلىگى «ەلىم-اي» سىيلىعى شاراسىن ءداستۇرلى تۇردە جىل سايىن وتكىزبەك نيەتتە.
ء«بىزدىڭ مينيسترلىك الدىنا ەكولوگيا سالاسىنداعى قىزمەتكەرلەردىڭ, ەكوبەلسەندىلەردىڭ مارتەبەسىن كوتەرۋ مىندەتىن قويىپ وتىر. سالا ماماندارىنىڭ ماتەريالدىق جاعدايىن جاقسارتۋعا قاتىستى قادامدار جاسالدى. براكونەرلىك ءۇشىن جازا قاتاڭداتىلدى. وتكەن جىلى اقبوكەندەردى قورعاۋ جولىندا قورىقشىلارىمىز – ەرلان نۇرعاليەۆ پەن قانىش نۇرتازينوۆتىڭ براكونەرلەر قولىنان قازا تاپقانىن ەشكىم ۇمىتقان جوق. بۇل – ينسپەكتورلاردىڭ مارتەبەسىن جوعارىلاتۋ جولىنداعى بەلسەندى جۇمىستى جالعاستىرۋىمىز قاجەتتىگىنىڭ ۇلكەن بەلگىسى», دەپ اتاپ ءوتتى م.مىرزاعاليەۆ.
مادەنيەت جانە سپورت ءمينيسترى اقتوتى رايىمقۇلوۆا 18 قازاندا اتالىپ وتكەن ورمان شارۋاشىلىعى قىزمەتكەرلەرىنىڭ كۇنىمەن قۇتتىقتادى.
ء«تول مەرەكە ءوز جالعاسىن بۇگىنگى كۇنى دە تابۋدا. بۇل وزدەرىنىڭ تاباندىلىقتارى ارقىلى ەلىمىزدىڭ ورمان بايلىعىن قورعاپ, كوبەيتىپ جۇرگەن ازاماتتاردىڭ مەرەكەسى. ەلىمىزدىڭ باعا جەتپەس بايلىعى – تابيعاتى. ورمان-توعاي – جەر-انانىڭ ادامزاتقا بەرگەن سىيىنىڭ ءبىرى. سوندىقتان تابيعاتتى ايالاۋ مەن ونىڭ قادىر-قاسيەتىن سەزىنۋ – ادامزاتقا, ۇرپاعىمىزعا پارىز», دەدى ول ءوز سوزىندە.
«ەلىم-اي» سىيلىعى 16 نوميناتسيا بويىنشا بەرىلدى. «براكونەرلەرمەن كۇرەستەگى ەرەن ەرلىگى ءۇشىن» «وحوتزووپروم» اقمولا وبلىستىق تىرەك پۋنكتىنىڭ ينسپەكتورى دوستاي بالعابەك ۇلى ماراپاتتالدى. ول 2016 جىلى براكونەرلەرمەن بەتپە-بەت كەلىپ, موينىنان پىشاق جاراقاتىن الىپ, اجالدان امان قالعان ەدى. «وحوتزووپروم» ءوب ورتالىق ايماقتىق فيليالىنىڭ ينسپەكتورى مۇرات قابيدەن ۇلى «جانۋارلار دۇنيەسىن قورعاۋدا «ۇزدىك ينسپەكتور» دەپ تانىلدى. ورمان شارۋاشىلىعى سالاسىندا 30 جىلدان استام ەڭبەك ەتىپ كەلە جاتقان «سامار ورمان شارۋاشىلىعى» كوممۋنالدىق مەملەكەتتىك مەكەمەسىنىڭ ديرەكتورى ەركەن قابدىرعاليەۆ «ۇزدىك ورمانشى» اتاندى. ورمان شارۋاشىلىعىن دامىتۋعا بارىن سالىپ اتسالىسقانى ءۇشىن «سەمەي ورمانى» مەكەمەسىنىڭ سەمەي قالالىق فيليالى باتپاەۆ ورمانشىلىعىنىڭ جەتەكشىسى الەكساندر ترۋشين ماراپاتتالدى. «ورمان شارۋاشىلىعىنا ەڭبەگى سىڭگەن ارداگەر» نوميناتسياسىنا «كولساي كولدەرى» مەملەكەتتىك ۇلتتىق تابيعي پاركىنىڭ اعا عىلىمي قىزمەتكەرى حاميت اعابەك ۇلى يە بولدى. بيولوگيا عىلىمدارىنىڭ كانديداتى, 30-عا جۋىق عىلىمي ماقالا جازعان, «TMT GROUP» جشس باسشىسى مارلەن ءتۇرسىنالى ۇلى «ۇزدىك بالىق ءوسىرۋشى» دەپ تانىلدى. ال «كاراگاندينسكي رىبوپيتومنيك» جشس «ۇزدىك بالىق تالىمباعى» اتاندى. باسشىسى – دەنيس مۋشتاكوۆ. «ىلە-الاتاۋ» مەملەكەتتىك ۇلتتىق تابيعي پاركى – «ۇزدىك ۇلتتىق پارك», «بارساكەلمەس» مەملەكەتتىك قورىعى «ۇزدىك قورىق» اتالىمىن الدى. سىيلىق مەكەمەلەردىڭ باسشىلارى دامير مالگەلديەۆ پەن زاۋرەش الىمبەتوۆاعا بەرىلدى. «Kazakh Tourism» ۇلتتىق كومپانياسىنىڭ باسشىسى ەرجان ەركىنباەۆقا «ەكوتۋريزمدى ناسيحاتتاۋ بويىنشا ۇزدىك جوبا» نوميناتسياسى بەرىلدى. «تامىر» جابايى تابيعاتتا سەرۋەندەۋ مەكتەبى ەكولوگيالىق مادەنيەتتى كوتەرۋ جانە ادامداردىڭ جابايى تابيعاتتاعى قاۋىپسىزدىگىن قامتاماسىز ەتۋگە قوسقان ۇلەسى ءۇشىن ماراپاتتالدى.
يتبالىقتاردىڭ قورعاۋشىسى رەتىندە تانىلعان گيدروبيولوگيا جانە ەكولوگيا ينستيتۋتىنىڭ عىلىمي قىزمەتكەرى اسەل بايمۇقانوۆا «ەكولوگيالىق ناسيحات باعىتىنداعى مامان» اتالىمىنا يە بولدى. «امانات پەن ەرىك-جىگەر» اتالىمىمەن ەكى قولىنىڭ جوقتىعىنا قاراماستان اقمولا وبلىسىندا 18 مىڭ اعاش وتىرعىزىپ, ۇلگىلى ىسپەن ومىردەن وتكەن الەكساندر كارپوۆيچتىڭ ەڭبەگى اتالىپ ءوتىلدى. سىيلىق ۇلىنا تابىستالدى. «ولكەتانۋعا قوسقان ۇلەسى ءۇشىن» نوميناتسياسىن «باياناۋىل» مەملەكەتتىك ۇلتتىق تابيعي پاركىنىڭ ينسپەكتورى التىنبەك جۇمات ۇلى الدى. «جابايى اڭدارعا جاساعان قامقورلىعى ءۇشىن» «سايرام-وگەم» مەملەكەتتىك ۇلتتىق تابيعي پاركىنىڭ بيولوگ-اڭشىسى نۇرجان سايرانباي ۇلى ماراپاتتالدى. جانۋارلاردى قورعاۋ قاۋىمداستىعىنىڭ پرەزيدەنتى ليليا سارسەنوۆا ء«ۇي جانۋارلارىن قورعاعانى ءۇشىن» نوميناتسياسىن الدى. ول جانۋارلار پانالايتىن ورتالىق اشقان.
ەسكە سالايىق, مەملەكەت باسشىسى قاسىم-جومارت توقاەۆ حالىققا بيىلعى جولداۋىندا قورشاعان ورتانى قورعاۋ جانە ەكولوگيالىق دامۋ ەلىمىز ءۇشىن الدىڭعى كەزەكتە تۇرعان ماسەلە ەكەنىن ايتقان. كوگالداندىرۋ اۋقىمىن كەڭەيتىپ, «جانۋارلاردى قورعاۋ تۋرالى» زاڭ جوباسى قابىلداناتىنىن جەتكىزگەن. ال 22 قازانداعى ۇلتتىق قوعامدىق سەنىم كەڭەسى وتىرىسىندا ۇلتتىق مەملەكەتتىك تابيعي پاركتەردە ەكوتۋريزمدى بەلسەندى دامىتۋ قاجەتتىگىنە تاعى دا توقتالدى.