سەگىزىنشى ماۋسىمىن دارىگەرلەردىڭ قۇرمەتىنە ءۇش قايىرىمدىلىق كونتسەرتپەن اشقان سوڭ, "استانا بالەت" تەاترىنىڭ ارتىستەرى ءۇش پرەمەرالىق سپەكتاكلگە دايىندىعىن جالعاستىردى. ولاردىڭ كورسەتىلىمى 30-قازان مەن 6 قاراشادا وتەدى. جاڭا ماۋسىمداعى سپەكتاكلدەرگە بيلەت ساتىلا باستادى. ول تەك تەاتر سايتى ارقىلى ونلاين جۇزەگە اسىرىلادى, دەپ حابارلايدى Egemen.kz
30 قازاندا كورەرمەن قاۋىم قوس پرەمەرانى تاماشالايدى. ءبىر كەشتە تەاتر ساحناسىندا شاقىرىلعان حورەوگراف ريكاردو امارانتەنىڭ جاڭا تۋىندىسى – "Longing" ("قۇشتارلىق"), سونىمەن بىرگە, دەۆيد دجوناتاننىڭ "Instinct" ("ينستينكت") ءبىر اكتىلى بالەتى كورسەتىلەدى.
ريكاردو امارانتە قازاقستاندىق كورەرمەنگە ءبىرشاما تانىس: ونىڭ قويىلىمدارى تەاتردىڭ كونتسەرتتىك جانە گاسترولدىك باعدارلامالارىندا تۇراقتى تۇردە كورسەتىلەدى. ارگەنتينالىق كومپوزيتورلار استور پياتستسوللا مەن پابلو تسيگلەردىڭ مۋزىكاسىنا قويىلعان تىڭ تۋىندىسى - "Longing" بالەتىندە كورەرمەن قاۋىم قيمىلمەن ورىلگەن ەموتسيانىڭ تولقىنى مەن كوركەمدىك بەزەندىرۋدەگى مينيماليزمگە كۋا بولادى. بۇل تۋىندىسىندا بالەتمەيستەر: "وسى ومىردەن, ماحابباتتان, جالپى, ءوزارا قارىم-قاتىناسىمىزدان, شىن مانىندە, نە قالايمىز؟" دەگەن سۇراقتىڭ جاۋابىن ىزدەگەندەي. ايتسە دە, وسى تاقىرىپتى قوزعاي وتىرىپ, ول بىرجاقتى جاۋاپ بەرمەي, كورەرمەننىڭ ءوز بەتىنشە وي قورىتۋىنا مۇمكىندىك بەرەدى.
تەاتردىڭ جەتەكشى ءسوليستى دەۆيد دجوناتان ءۇشىن, "Instinct" "استانا بالەت" تەاترىنا ارناپ قويعان العاشقى بالەتى. بۇعان دەيىن, ول بالەتمەيستەر رەتىندە اۆستراليانىڭ باتىس بالەتى مەن فلاندريا كورولدىك بالەتىنىڭ ترۋپپالارىمەن شىعارماشىلىق ارىپتەستىك ورناتقان. حورەوگرافتىڭ ايتۋىنشا, بالەتتى جاساۋ يدەياسى ءبىر جىل بۇرىن پايدا بولعانىمەن, قازىرگى تاڭدا وزەكتىلىگى ارتا تۇسكەن.
"پاندەميا بالەتتىڭ يدەياسىنا ەرەكشە اسەر ەتتى. كارانتين كەزىندە قانداي كۇي كەشكەنىمىزدى ايتامىن. ليبرەتتودا دا وسى جايلى جازدىم: كوپتەگەن ادامدار وزدەرىنىڭ جاقىن تۋىستارىمەن, سۇيىكتى جاندارىمەن كەزدەسە المادى. وسى سەزىم, ءبىر بولۋعا دەگەن ۇمتىلىس ەرەكشە ماڭىزعا يە. بالەتتىڭ اتى "ينستينكت", سەبەبى, وسى پاندەميا مەن لوكداۋن كۇتپەگەن جەردەن ورىن الىپ, ءبىزدىڭ ينستينكتيۆتى ادەتتەرىمىز وزگەرىسكە ۇشىرادى. وسى جايلى ويلار مەنى مازالادى. ءبىز بۇرىنعىداي ءومىر سۇرە المادىق, بىراق, ءبارىبىر ءومىر ءسۇرۋىمىز كەرەك ەدى", دەيدى دەۆيد دجوناتان.
ال 6 قاراشادا كورەرمەن قاۋىم تاعى ءبىر پرەمەرانى تاماشالايدى. استانالىق تەاتر ساحناسىندا قازاقستاندىق حورەوگراف انۆارا سادىقوۆانىڭ "جەلتوراڭعى تۋرالى اڭىز" ءبىر اكتىلى بالەتى كورسەتىلەدى. قۋات شىلدەباەۆتىڭ مۋزىكاسىنا قويىلعان بالەت جەلتوراڭعى اعاشى جايلى بايان ەتەدى.
سپەكتاكل پرەمەرالارى قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلادى.