نيگەريادا بىرنەشە كۇننەن بەرى حالىقتىڭ نارازىلىعى باسىلماي تۇر. ەلدەگى ارنايى قۇقىق قورعاۋ ورگاندارىنىڭ اياۋسىز ارەكەتتەرىنە قارسى حالىق العاشىندا الەۋمەتتىك جەلىدە نارازىلىق تانىتا باستادى. بۇل نارازىلىقتىڭ سوڭى نيگەريا كوشەلەرىندەگى شەرۋگە ۇلاستى. ۇرلىققا قارسى ارنايى ءبولىم (SARS) دەپ اتالاتىن داۋلى پوليتسيا بولىمشەسىنىڭ ۇرلاۋ, قۋدالاۋ جانە بوپسالاۋ سەكىلدى ارەكەتتەرى قاراپايىم تۇرعىنداردىڭ زىعىرىن شىعارعان. نارازىلىق سەيسەنبىدە ەلدىڭ ەڭ ۇلكەن قالاسى لاگوستا قاندى وقيعالارعا الىپ كەلگەن. سەبەبى شتات بويىنشا كومەندانتتىق ساعات ورناعانىنا قاراماستان شەرۋ توقتاماعان. كۋاگەرلەر بىرنەشە ادامدى اسكەريلەر اتىپ ولتىرگەنىن, ال دەنەلەرىن الىپ كەتكەنىن ايتقان.
وقيعاعا بايلانىستى مالىمدەمە جاساعان ەل پرەزيدەنتى مۋحاممادۋ بۋحاري قالادا حاوس ورناعانىن ايتىپ, كوپشىلىكتى تۇسىنىستىك پەن تىنىشتىققا شاقىرعان. الايدا كەلەسى كۇنى اشىنعان بەلسەندىلەر عيماراتتاردى ورتەپ, پوليتسيا بەكەتتەرىنە شابۋىل جاساعان. نيگەريا پرەزيدەنتى بىرنەشە كۇنگە جالعاسقان باسسىزدىق سالدارىنان 69 ادامنىڭ قازا تاپقانىن ايتتى. قازا بولعانداردىڭ كوبى بەيبىت تۇرعىندار, اراسىندا قۇقىق قورعاۋ ورگاندارىنىڭ وكىلدەرى دە بار. ەندى بيلىك ەلدەگى ءتارتىپتى قالپىنا كەلتىرۋدىڭ جولىن ىزدەپ الەك. پوليتسياعا قارسى شەرۋلەردىڭ سوڭى جىلدار بويى ەل بيلىگىنە جينالعان نارازىلىقتىڭ دا ءبىر كورىنىسىنە ۇلاستى دەيدى ساراپشىلار.
نيگەريا – افريكا قۇرلىعىندا ەڭ كوپ, 200 ميلليون حالقى بار مەملەكەت, ولاردىڭ 60%-دان استامى 24 جاسقا تولماعان. ەڭبەككە قابىلەتتى جاستاعى ادامداردىڭ كوپشىلىگىندە جۇمىس جوق جانە جاقسى ءبىلىم الۋعا مۇمكىندىكتەرى از. وسى جىلدىڭ باسىندا ۇكىمەتتىڭ ستاتيستيكاسى نيگەريالىقتاردىڭ 40%-ى كەدەيلىكتە ءومىر سۇرەتىنىن كورسەتكەن.