قازاقباي اجىبەك ۇلىنىڭ "ونەر شىڭىنا ۇمتىلىس" اتتى جەكە كورمەسى اشىلدى

كورمەنى كورمەككە كەلگەن قادىرلى قوناقتاردىڭ اراسىندا سۋرەتشىلەر كاميل مۋللاشەۆ, ءومىرالى يسمايلوۆ, كومپوزيتور تولەگەن مۇحامەدجانوۆ, مۋزىكانت بەكبولات بايساعاتوۆ, اقىن داۋلەتكەرەي كاپ ۇلى باستاعان تاعى دا باسقا تانىمال تۇلعالار بولدى.

كورمەگە 1997–2020 جىلدار ارالىعىندا جاسالعان سۋرەتشىنىڭ وتىزعا جۋىق جۇمىسى قويىلدى. شىعارماشىلىعىنىڭ العاشقى كەزەڭىن حح عاسىردىڭ 90-شى جىلدارى سوڭىنداعى تۋىندىلارى بەينەلەيدى. سوڭعى ونجىلدىقتاعى جۇمىستار اۆتوردىڭ شىعارماشىلىق جانە جەكە ەۆوليۋتسياسىن كورسەتەدى.

قازاقباي اجىبەك ۇلى قىلقالام شەبەرلەرىنىڭ شىعارماشىلىق ىزدەنىستەرىنىڭ باستى جەلىسىن – قازاق حالقىنىڭ ءداستۇرلى باستاۋلارى مەن رۋحاني مۇراسىنىڭ جاندانۋىن بەينەلەيدى. تاۋەلسىزدىكتىڭ ءاربىر جىلدىعى ەلىمىزدىڭ, قازاقستان ازاماتتارىنىڭ بولاشاعىنا سەرپىندى قوزعالىستىڭ شارتى رەتىندە وتكەندى تالداۋعا ۇيىتقى بولىپ تابىلادى. بۇل كولوريستيكادا, قازاقباي قىلقالامىنىڭ ۇشقىرلىعىندا ايقىن سەزىلەدى, ەرتە كەزەڭدەگى جۇمىس تاسىلىنەن ايتارلىقتاي ەرەكشەلەنەدى.

ءىس-شارانى ەلباسى كىتاپحاناسىنىڭ ديرەكتورى ءامىرحان راحىمجانوۆ اشتى:

"قازاقبايدى  قازىرگى قازاقستاننىڭ بەينەلەۋ ونەرىنىڭ كوش باسىندا كەلە جاتقان سۋرەتشىلەردىڭ بىرەگەيى دەسەك تە بولادى. ويتكەنى سارىارقانىڭ توسىنەن ورىن تەپكەن ەلوردامىزدىڭ العاشقى بەينەسىن ەلباسىمەن بايلانىستىرا بىلگەن قازاقبايدىڭ شىعارماشىلىعى قاشان دا الىستان ەرەكشە سويلەپ تۇرادى.  اۆتور وزىندىك قولتاڭباسى بار ونەرلى جان, ول ءوز جۇمىستارىندا حالىقتىڭ مادەنيەتىن, ەلىمىزدىڭ مادەني قۇندىلىقتارىن ونىڭ ۇلتتىق يدەياسىن ۋاقىت پەن قازىرگى ءومىردىڭ ءوزارا استاسىپ جاتقانىن شىنايى سۋرەتتەيدى. كورمەگە قىلقالام شەبەرىنىڭ قر تۇڭعىش پرەزيدەنتى – ەلباسى كىتاپحاناسىنىڭ قورىندا ساقتالعان بۇرىنعى جۇمىستارى مەن الەمدىك قاۋىمداستىقتى تولعاندىرعان كوزقاراستار تۇرعىسىنان العاندا ادامزاتتى ويلاندىراتىن جاڭا دۇنيەلەرى, تۋعان حالقىنىڭ ۇلتتىق بەينەسىن سومداعان تىڭ تۋىندىلارى دا قويىلدى", دەدى ول. 

"ەلباسى كىتاپحاناسىنىڭ مۋزەيىنە كەلىپ, تاۋەلسىزدىگىمىزدىڭ قالىپتاسۋى مەن دامۋىنىڭ تاريحىمەن تەرەڭىرەك تانىسقانىمىزدى اتاپ وتكىم كەلەدى. قازاقستاننىڭ تۇڭعىش پرەزيدەنتىمەن بىرگە تاريحىمىزدىڭ اسىل مۇراسىنداي بولعان  وسىنداي  مەملەكەتتى قۇرعانىمىزدى جاقسى بىلەمىز. سوندىقتان تۇڭعىش پرەزيدەنت كىتاپحاناسىنىڭ قىزمەتكەرلەرىنە اتقارىپ جاتقان جۇمىستارى ءۇشىن العىسىمدى بىلدىرگىم كەلەدى. بۇگىن ءبىزدىڭ زامانداسىمىزدىڭ, مەنىڭ ويىمشا, قازاقستاننىڭ ەڭ كەرەمەت ءارى تالانتتى سۋرەتشىسىنىڭ كورمەسى اشىلادى. ول ءوز ەلىن جانە حالقىن قاتتى جاقسى كورگەندىكتەن بۇكىل الەمگە ۇلتىنىڭ داستۇرلەرى مەن ادەت-عۇرىپتارىن كورسەتكىسى كەلەدى", دەدى تولەگەن مۇحامەدجانوۆ.

كاميل مۋللاشەۆ اۆتوردىڭ استانانىڭ العاشقى قالىپتاسۋ جىلدارىنداعى تالانتىنا توقتالدى.

"قىلقالام شەبەرى رەتىندە ول قازاقستاننان تىس جەرلەردە بۇرىننان تانىمال. باسقا ەلدەردەگى كەسكىندەمەنىڭ جانكۇيەرلەرى قازاق حالقىنىڭ مادەنيەتى مەن تاريحىن قازاقباي اجىبەك ۇلىنىڭ سۋرەتتەرىنەن بىلەتىنى وتە ماڭىزدى. اۆتور جۇمىستارىنىڭ ءبىر ەرەكشەلىگى – حالىققا جاقىن, ونىڭ تۋىندىلارىندا ءبىر جىلىلىق بار, بوياۋلارى قانىق. ونىڭ شىعارمالارى سۇلۋلىققا قۇشتار ءار ادامنىڭ جۇرەگىنەن ورىن الادى", دەپ اتاپ ءوتتى ول.

ءىس-شارا سوڭىندا كورمەنىڭ اۆتورى قازاقباي اجىبەك ۇلى ەلباسى كىتاپحاناسىنىڭ باسشىلىعىنا جانە ارنايى كەلگەن قوناقتارعا ريزاشىلىعىن ءبىلدىردى.