پوليتسيا قىزمەتكەرلەرى 15 قازاندا باستالعان "بورىشكەر" ءىس-شاراسى كەزىندە 1 ملن تەڭگەدەن استام ايىپپ ۇلى بار جۇرگىزۋشىنى ۇستادى, دەپ حابارلايدى Egemen.kz
"جول قوزعالىسى ەرەجەلەرىن بۇزۋ, ونىڭ ىشىندە جىلدامدىقتى اسىرۋ فاكتىلەرىنە قاتىستى فوتو-بەينەتىركەۋدى جۇزەگە اسىراتىن, جالپى اۆتوكولىك قوزعالىسىن باقىلاۋعا الاتىن "كوردون م-2", "كوردون م-4" كەشەندەرىنىڭ بەينەكامەرالارىنا ارمەنيا رەسپۋبليكاسىنان اكەلىنگەن "BMW-525" اۆتوكولىگى تۇسكەنىن انىقتادى. كولىك جۇرگىزۋشىسى 55 رەت جىلدامدىقتى اسىرىپ, 1 ميلليون 83 مىڭ 420 تەڭگە كولەمىندەگى ايىپپۇلدى تولەمەگەنى ءۇشىن ۇستالدى. جىلدامدىقتى 40 رەت ۇدەتكەن "ۆاز-21144" كولىگىنىڭ جۇرگىزۋشىسىنە سالىنعان ايىپپۇل مولشەرى 666 مىڭ 720 تەڭگەنى قۇراعان. سونداي-اق, "ۆاز-2108" اۆتوكولىگىنىڭ جۇرگىزۋشىسىنە 21 رەت جىلدامدىقتى اسىرعانى ءۇشىن 333 مىڭ 360 تەڭگە ايىپپۇل سالىنعان. ال 28 رەت جىلدامدىعىن اسىرعان رەسەي فەدەراتسياسىنىڭ ەسەبىندە تۇرعان "ۆاز-21014" كولىگىنىڭ جۇرگىزۋشىسىنە سالىنعان ايىپپۇل 494 مىڭ تەڭگەگە جەتكەن", دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
پاترۋلدىك قىزمەت پوليتسەيلەرى يەلەرى ايىپپۇل تولەمەگەن تاعى 37 اۆتوكولىكتى انىقتاپ, توقتاتتى. قر اكىمشىلىك قۇقىقبۇزۋشىلىق تۋرالى كودەكستىڭ 785-بابىنا سايكەس, بورىشكەر اتانعان جۇرگىزۋشىلەردىڭ كولىكتەرى ايىپ تۇراعىنا قويىلدى.