جاناشىرلىقتىڭ جەتىسۋلىق ۇلگىسى جەمىس بەرىپ وتىر

جالپى, الماتى وبلىسىنىڭ مۇقتاج تۇرعىندارىنا "بىرگەمىز" رەسپۋبليكالىق قايىرىمدىلىق قورى مەن "بىرگەمىز جەتىسۋ" قورىنىڭ قارجىسى ەسەبىنەن جانە دەمەۋشىلەردىڭ كومەگىمەن 4,9 ملرد تەڭگە كولەمىندە الەۋمەتتىك كومەك كورسەتىلگەن كەن. مۇنان بولەك, الەۋمەتتىك جاعدايى تومەن اۋلەت ساناتىنا كىرەتىن 15,6 مىڭ وتباسىنا جالپى سوماسى 5,5 ملرد تەڭگە بولاتىن اتاۋلى الەۋمەتتىك كومەك كورسەتىلگەن. ال اتاۋلى كومەك الاتىن 1-6 جاس ارالىعىنداعى 19 مىڭ بالاعا كەپىلدى الەۋمەتتىك پاكەت بەرىلگەن. بۇل ماقساتتاعى كومەكتىڭ كولەمى 712,5 ملن تەڭگەگە جەتتى. سونداي-اق, توتەنشە جاعداي كەزىندە تاعايىندالعان 42 500 تەڭگە كولەمىندەگى تولەمدى وبلىستىڭ 368,2 مىڭ تۇرعىنى العان-دى.

قازىرگى كەزدە تابىسىنان ايىرىلعان ادامداردى جۇمىسپەن قامتۋعا باسا نازار اۋدارىلىپ وتىر. جالپى, الماتى وبلىسىندا جۇزەگە اسىپ جاتقان باعدارلامالار اياسىندا 56,2 مىڭ جۇمىس ورنى قۇرىلسا, ونىڭ 30,1 مىڭى تۇراقتى جۇمىس ورنى رەتىندە ەرەكشەلەنەدى. ياعني, كارانتين كەزىندە جۇمىستان بوساپ قالعان ازاماتتاردى ەڭبەكپەن قامتۋعا "جۇمىسپەن قامتۋ جول كارتاسى" ەرەكشە سەرپىن بەردى. وسى باعدارلاما بويىنشا قۇنى 105,6 ملرد تەڭگە بولاتىن 1051 جوبا جۇزەگە اسىپ جاتىر. ناتيجەسىندە, "جۇمىسپەن قامتۋدىڭ جول كارتاسى" تۇرعىندارعا جۇمىس تاۋىپ بەرۋمەن قاتار وڭىردەگى قۇرىلىستىڭ جاندانۋىنا جول اشتى. مۇنىڭ يگىلىگى رەتىندە وڭىردەگى 7 مەكتەپ پەن 8 دارىگەرلىك امبۋلاتوريا قۇرىلىسىنىڭ باستالعانىن, 35 مەكتەپتىڭ كۇردەلى جوندەۋدەن وتكەنىن, 64 ەلدى مەكەندەگى اۋىز سۋ جۇيەسىنىڭ جاسالعانىن جانە 220 اۋىلدىڭ ىشكى جولى تولىقتاي جوندەلگەنىن ايتۋعا بولادى.

جۇمىسسىزدىقتى جويۋ جولىنداعى جەمىستى ءىستىڭ تاعى ءبىر پاراسى «ەڭبەك» باعدارلاماسىنىڭ جۇزەگە اسۋىنان كورىنەدى. ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدى ماسات ەتكەن باعدارلاما بويىنشا بيىل 16,1 ملرد تەڭگە قارجى بولىنگەن بولاتىن. ناتيجەسىندە كاسىبي تەحنيكالىق ءبىلىم الۋعا 1535 ادام جىبەرىلسە, قىسقا مەرزىمدى دايارلىق كۋرسىنان 1263 ادام ءوتتى. وسى تىزىمدەگى 710 ادام تۇراقتى جۇمىس تاۋىپتى. سونىمەن بىرگە الەۋمەتتىك ورىندار مەن قوعامدىق جۇمىس تارتىلعان جانە  "جاستار تاجىريبەسى" بويىنشا تىركەلگەن 22 مىڭنان استام جۇمىسسىز جان تابىس تابۋعا مۇمكىندىك العان ەكەن.

ارينە, جۇمىس ورىندارىنىڭ كوپتەپ اشىلۋى وڭىردەگى شاعىن جانە ورتا بيزنەستىڭ دامۋىنا تىكەلەي تاۋەلدى ەكەنى انىق. ال الماتى وبلىسى كاسىپكەرلىكتى قولداۋ بويىنشا تۇتاس ەلگە ۇلگى بولىپ وتىر. جالپى, ايماقتا «بيزنەستىڭ جول كارتاسى», «ەڭبەك» باعدارلامالارى اياسىندا جانە "دامۋ" قورىنىڭ قارجىسىنان 16,2 ملرد تەڭگە قارجى شاعىن جانە ورتا بيزنەستى قولداۋعا بولىنگەن. بۇل باعىتتا 158 جوبا قارجىلاندىرىلىپ, 836 ادام شاعىن نەسيەلەر العان ەكەن. سونداي-اق, «باستاۋ بيزنەس» جوباسى بويىنشا 3645 ادام وقۋعا جىبەرىلىپ, جاڭا بيزنەس-يدەيالاردى دامىتۋعا  دا 1659 گرانت بەرىلگەن-ءدى. قىسقاسى, وبلىستا كاسىپكەرلىكتى دامىتۋدى مەملەكەتتىك قولداۋدىڭ اياسى كەڭىگەن سايىن, شعانى جانە ورتا بيزنەستىڭ ادىمى شيراي باستادى دەۋگە تولىق نەگىز بار. ال جىل سوڭىنا دەيىن ۇكىمەتتىڭ ناقتى دەمەۋىن سەزىنگەن شاعىن جانە ورتا بيزنەس سالاسىندا دايىندالعان ءونىم مەن كورسەتىلگەن قىزمەت كولەمى 1,7 ترلن تەڭگەگە دەيىن جەتەدى دەگەن بوددام بار. ياعني, كاسىپكەرلەردىڭ جالپى وڭىرلىك ونىمدەگى بيىلعى ۇلەسى 34 پايىزدى قۇرۋى ءتيىس وتكەن جىلى بۇل كورسەتكىش 33,6 پايىز شاماسىندا بولعان.

ايتپاقشى, وبلىس كاسىپكەرلەرىنىڭ داعدارىس جاعدايىنداعى جۇمىسىنا قولداۋ جاساۋدىڭ ءتيىمدى تەتىگى رەتىندە سالىق جەڭىلدىكتەرىنىڭ جۇزەگە اسقانىن دا ايتۋىمىز پارىز. توتەنشە جاعداي كەزىندە پرەزيدەنت پارمەنىمەن ىسكە قوسىلعان سالىق جەڭىلدىگىنە وڭىردەگى 118,9 مىڭ بيزنەس نىسانى يە بولعان-دى.

- داعدارىسقا قارسى دەر كەزىندە قابىلدانعان شارالاردىڭ ناتيجەسىندە بيزنەستىڭ الماتى وبلىسىندا 641 كاسىپكەرلىك نىسانىنىڭ نەسيەسى كەيىنگە شەگەرىلدى. بۇل – 23,7 ملرد تەڭگە كولەمىندەگى قارجى. مۇنان بولەك, 6,5 مىڭ بيزنەس نىساننىڭ جالعا الۋ تولەمى 30 پايىزدان 90 پايىزعا دەيىن تومەندەتىلدى. ال 690 كاسىپكەر كوممۋنالدىق مەنشىك سالاسى بويىنشا م ۇلىكتى جالداۋ اقىسىن تولەۋدەن تولىق بوساتىلدى. وسىنىڭ ءبارى پرەزيدەنت قاسىم-جومارت توقاەۆتىڭ تاپسىرماسى بويىنشا ۇكىمەت قابىلداعان داعدارىستى ەڭسەرۋ جوسپارىنىڭ ناتيجەسى. وبلىستا ءىرى كاسىپورىنداردان بولەك شاعىن جانە ورتا بيزنەس نىساندارىنىڭ جۇمىسىنا مەملەكەتتىك قولداۋ جالعاسا بەرەدى, دەيدى وبلىس اكىمى اماندىق باتالوۆ.

الماتى وبلىسى