ورتالىق سايلاۋ كوميسسياسى شەت مەملەكەتتەردىڭ, حالىقارالىق ۇيىمداردىڭ بايقاۋشىلارى, شەتەلدىك بۇقارالىق اقپارات قۇرالدارىنىڭ وكىلدەرى قىزمەتىن ۇيىمداستىراتىن قاۋلى قابىلدادى.
ورتالىق سايلاۋ كوميسسياسى 2021 جىلعى 10 قاڭتارعا تاعايىندالعان قازاقستان رەسپۋبليكاسى پارلامەنتىنىڭ ءماجىلىسى جانە ءماسليحاتتارى دەپۋتاتتارىنىڭ كەزەكتى سايلاۋىنداعى شەت مەملەكەتتەردىڭ, حالىقارالىق ۇيىمداردىڭ بايقاۋشىلارى, شەتەلدىك بۇقارالىق اقپارات قۇرالدارىنىڭ وكىلدەرى قىزمەتىنىڭ كەيبىر ماسەلەلەرىنە قاتىستى وتىرىس وتكىزدى. جيىنعا ساياسي پارتيالاردىڭ وكىلدەرى, قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى مارعۇلان بايمۇحان, ونلاين رەجىمدە وبلىستاردىڭ, نۇر-Cۇلتان, الماتى جانە شىمكەنت قالالارىنىڭ اۋماقتىق سايلاۋ كوميسسيالارى جانە بۇقارالىق اقپارات قۇرالدارىنىڭ وكىلدەرى قاتىستى.
ورتالىق سايلاۋ كوميسسياسىنىڭ مۇشەسى اناستاسيا ششەگورتسوۆا قازاقستان كوپتەگەن حالىقارالىق ۇيىمداردىڭ مۇشەسى رەتىندە حالىقارالىق بايقاۋ ينستيتۋتىن اشۋ جونىندەگى مىندەتتەمەلەرىن ورىندايتىنىن حابارلادى. «شەت مەملەكەتتەر مەن حالىقارالىق ۇيىمداردىڭ بايقاۋشىلارى ورتالىق سايلاۋ كوميسسياسىنىڭ توراعاسى مەن قازاقستان رەسپۋبليكاسى سىرتقى ىستەر ءمينيسترىنىڭ شاقىرۋى بويىنشا قاتىسا الادى», دەدى ا.ششەگورتسوۆا.
سونداي-اق وتىرىس بارىسىندا ورتالىق سايلاۋ كوميسسياسىنىڭ قاۋلىسى قابىلداندى. وندا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا سايكەس بىرقاتار ەرەجە بەكىتىلگەن.
«شەت مەملەكەتتەر مەن حالىقارالىق ۇيىمداردىڭ بايقاۋشىلارى ورتالىق سايلاۋ كوميسسياسى سىرتقى ىستەر مينيسترلىگىنىڭ ۇسىنۋى بويىنشا اككرەديتتەلەدى. شەتەلدىك بۇقارالىق اقپارات قۇرالدارىنىڭ وكىلى, ەگەر ونىڭ سىرتقى ىستەر مينيسترلىگى بەرگەن اككرەديتتەۋ تۋرالى كۋالىگى بولسا, سايلاۋدا بايقاۋدى جۇزەگە اسىرا الادى. سايلاۋ تۋرالى كونستيتۋتسيالىق زاڭ شەتەلدىك بايقاۋشىلارعا اۋدارماشىنىڭ ىلەسىپ ءجۇرۋ مۇمكىندىگىن قاراستىرادى. اككرەديتتەۋدى جۇرگىزۋ داۋىس بەرۋ كۇنىنە بەس كۇن قالعاندا, ياعني 2021 جىلعى 4 قاڭتاردا جەرگىلىكتى ۋاقىت بويىنشا ساعات 18.00-دە اياقتالاتىنىن بەلگىلەيدى», دەدى ا.ششەگورتسوۆا.
ورتالىق سايلاۋ كوميسسياسىنىڭ توراعاسى بەرىك يماشەۆ حالىقارالىق بايقاۋ ينستيتۋتىن اشۋ تۋرالى شەشىم سايلاۋ پروتسەسىنىڭ اشىقتىعىن قامتاماسىز ەتەتىنىنە سەنىمدى.
«بۇگىن ورتالىق سايلاۋ كوميسسياسى پارلامەنت ءماجىلىسى مەن ءماسليحات دەپۋتاتتارىن سايلاۋىندا حالىقارالىق بايقاۋ ينستيتۋتىن اشۋ تۋرالى شەشىم قابىلدادى. بۇل شەشىم ءبىزدىڭ سايلاۋ پروتسەسىمىزدىڭ اشىقتىعى مەن جاريالىلىعىن قامتاماسىز ەتۋ تۇرعىسىندا حالىقارالىق مىندەتتەمەلەردى قابىلداۋىمىزدىڭ راستالۋى بولىپ تابىلادى», دەدى ب.يماشەۆ.