اقجايىقتا جول ازابى ازايادى

وڭىردە وبلىستىق جانە اۋدان­دىق دارەجەدەگى جولداردىڭ جالپى ۇزىندىعى 5 082,7 شاقى­رىم­دى قۇرايدى. مۇنىڭ 1 148 كيلومەترى عانا اسفالت. 2 081 شاقىرىم جولعا قيىرشىق تاس توسەلگەن بولسا, دالا جولدارىنىڭ ۇزىندىعى 1 853 شاقىرىمعا سوزىلىپ جاتىر.

– مەملەكەت باسشىسى ەلدىڭ كولىكتىك-لوگيستيكالىق الەۋەتىن ودان ءارى ارتتىرۋدى تاپسىردى. وسى باعىتتا بىلتىر بولىنگەن 27,3 ملرد تەڭگە قاراجاتقا 368 شاقىرىم جول جوندەلگەن ەدى. بيىلعى كولەم ودان ءبىراز جوعارى. ءبىز جول سالىپ قانا قويماي, وسى جولداردا ءجۇرىپ جاتقان جۇمىس­تار­دىڭ ساپاسىنا قوعامدىق باقى­لاۋدى كۇشەيتتىك. ول ءۇشىن وبلىس­تىق جولاۋشىلار كولىگى مەن اۆتو­م­­وبيل جولدارى باسقارماسى مەن ورال قالاسى, اۋداندار اكىم­دىكتەرىمەن بىرلەسىپ وبلىس تۇر­عىن­دارى اراسىنان جول سالاسى بويىنشا بىلىكتى جانە تاجىريبەلى قوعامدىق وكىلدەردەن توپتار قۇرىلدى. اتالعان توپ اۆتوجولداردى جوندەۋ جۇمىستارىنىڭ ساپاسىن تەكسەرەدى, جوندەۋ اياقتال­عان سوڭ نىساندى تاپسىرۋ كەزىندە قوعامدىق وكىل نىساندى قابىلداۋ جۇمىستارىنا قاتىسادى, – دەگەن ەدى ءوڭىر باسشىسى عالي ەسقاليەۆ.

باتىس قازاقستان وبلىسىندا بيىل قولعا الىنعان 102 جوبانىڭ ىشىندە ۇزىندىعى 103,7 شاقىرىمدىق رەسپۋبليكالىق ماڭىزى بار 9 جوبا بار. بۇعان 7,1 ملرد تەڭگە بولىنگەن. سونداي-اق 12 ملرد تەڭگەگە 167,8 شاقىرىم وبلىستىق جانە اۋداندىق جولدار جوندەلىپ جاتىر. ال ەلدى مەكەن­دەر­دىڭ ىشىندەگى كوشە جولدارىن سالۋ ءۇشىن 69 جوباعا 17,1 ملرد تەڭگە قاراستىرىلعان. مۇنداي جولداردىڭ جالپى ۇزىندىعى 165 شاقىرىمعا سوزىلىپ جاتىر.

– وبلىستا جول قۇرىلىسى ءۇشىن «جۇمىسپەن قامتۋدىڭ جول كارتاسى» باعدارلاماسى ارقىلى 10 ملرد تەڭگە, «اۋىل – ەل بەسىگى» باعدارلاماسى بويىنشا 4,2 ملرد تەڭگە ءبولىندى. قازىر جالپى جولعا بولىنگەن قارجىدان 23,4 ملرد تەڭگە يگەرىلىپ, 335 شاقىرىم جول جوندەۋدەن ءوتتى, – دەيدى وبلىس اكىمىنىڭ ورىنباسارى تيمۋرجان شاكىموۆ.

«جۇمىسپەن قامتۋدىڭ جول كارتاسى» اياسىندا جۇزەگە اسى­رى­­لاتىن 48 جوبا كەزىندە 10 ملرد تەڭگەگە 86,6 شاقىرىم جول جوندەۋ جوسپارلانعان ەكەن. وسى جۇمىستارعا جاڭادان 2 730 ادام قىزمەتكە تارتىلعان. وبلىس ورتالىعىندا 30 جوبا اياسىندا 34,2 شاقىرىم جول جوندەلسە, سەگىز اۋداندا جالپى ۇزىندىعى 52,4 شاقىرىم جولعا ارنالعان 18 جوبا جۇزەگە اسىپ جاتىر. وبلىس باسشىسى عالي ەسقاليەۆ بيىل­عا جوسپارلانعان جول جوندەۋ جۇمىس­تارىن ءبىر اي ىشىندە اياقتاۋ جونىندە تاپسىرما بەردى.

سونىمەن قاتار الداعى قىس كەزىندە جولدى كۇتىپ ۇستاۋعا دايىن­دىق ءىسى دە جاقىندا وتكەن ارنايى جيىندا پىسىقتالدى. وبلىس قۇزىرىنداعى جولداردى قىس ۋاقىتىندا جارامدى ەتىپ ۇستاۋ بىرنەشە مەكەمەگە جۇكتەلگەن. ماسەلەن, «جولاۋشى جول» جشس اقجايىق, جاڭاقالا جانە بوكەي وردا اۋداندارىنىڭ جولىن قاداعالاسا, «اسفا» جشس بايتەرەك اۋدانىنا جاۋاپ بەرەدى. «دوررەمسەرۆيس» فيرماسى ءبورلى, سىرىم جانە قاراتوبە اۋدانى اۋماعىنداعى جولداردا كەدەرگى بولماۋىن ءوز موينىنا العان. «شام شىن» جشس تەرەكتى اۋدانى ءۇشىن جاۋاپ بەرسە, «جايىقسترويگرۋپپ» مەكەمەسى تاسقالا مەن قازتالوۆ اۋدان­دارىنداعى جولداردى قاداعالاماق. سىرىم مەن قاراتوبە اۋداندارىنداعى كەيبىر جول بولىكتەرى ءۇشىن جاۋاپكەرشىلىكتى «باقىت جولدارى» جشس, تەرەكتى مەن ءبورلى اۋدانىنىڭ كەي بولىگىن «باسوۆ» جەكە كاسىپكەرلىگى العان. «وردا جولدارى» فيرماسى دا تەرەكتى مەن اقجايىق اۋداندارى اۋماعىنداعى وزدەرىنە مىندەت­تەل­گەن جول بولىكتەرىن قاردان تازارتىپ, كەدەرگىسىز جول قاتىناسىن ۇيىمداستىرۋدى مىندەتىنە العان ەكەن.

جوعارىدا اتالعان كاسىپو­رىن­دار­دا قار تازالايتىن 94 تەحنيكا بار ەكەن. ونىڭ 15-ءى – اۆتوگرەيدەر, 35-ءى – قاجەتتى تىركەمە جالعانعان ت-150 جانە ك-701 تراكتورلارى. ءارتۇرلى موديفيكاتسياداعى 15 تيەگىش پەن جولعا قۇم شاشاتىن 10 تەحنيكا دا قار مەن مۇزدا جولاۋشىلارعا كومەك­كە كەلۋگە ءازىر كورىنەدى. قاجەت كە­زىن­دە قوسىمشا تەحنيكا تارتۋ مۇم­كىن­دى­گى دە قاراس­تى­رىل­عان.

كۇرە جولدار بويىندا جىلىتۋ بەكەتتەرىنىڭ سانى – 10. بۇل جەردە ترانزيتتىك كولىكتەر اۋا رايىنىڭ قولايسىز كەزىندە ۋاقىتشا پانالايدى. سونداي-اق بوران كەزىندە قار باسىپ قالۋ قاۋپى بار جول بولىكتەرىندە تۇ­راق­تى تۇردە كەزەكشىلىك ۇيىم­داس­تىرىلىپ, قار تازالايتىن تەحنيكا ساقاداي ساي تۇرادى. بۇل جول قىزمەتكەرلەرىنىڭ جىل سايىن اتقارىپ جۇرگەن جۇمىسى.

ال اۋداندىق دەڭگەيدەگى جولداردىڭ جاعدايىن 26 مەردىگەر مەكەمە قاداعالاماق. ولاردىڭ قۇزىرىندا 159 بىرلىك تەحنيكا بار. سونىڭ ىشىندە اۋىلارالىق جولداردىڭ قار باسۋ قاۋپى بار 110 بولىگى ەرەكشە باقىلاۋدا بولماق. مۇنداي جولداردىڭ جالپى ۇزىندىعى 280 شاقىرىم شاماسىندا.

«جولاۋشىلار قوزعالىسى بەلسەندى جۇرەتىن جول بولىكتەرىن قاردان تازارتۋ 2-4 ساعات ىشىندە جۇرگىزىلەدى. ال وبلىستىق ماڭى­زى بار جول بولىكتەرىن تازارتۋ جۇمىسىن ءبىر تاۋلىكتەن كەشىكتىرمەي اتقارامىز» دەپ ۋادە بەرىپ وتىر ءتيىستى مەكەمەلەر.

جول بويىندا اپاتتى جاع­دايلار تۋىنداماس ءۇشىن جىل­دامدىق­تى شەكتەۋ, كوكتايعاقتى ەسكەرتۋ سەكىلدى جول بەلگىلەرى الدىن الا ازىرلەنگەن.

«وبلىستىق جانە اۋداندىق باعىنىستاعى جول اۋماقتارىندا كەز كەلگەن اپاتتىق جاعدايلاردىڭ الدىن الۋعا ءازىرمىز. قوسىمشا جول تەحنيكالارىنا مۇقتاجدىق جوق» دەيدى تيمۋرجان شاكىموۆ.

باتىس قازاقستان وبلىسى اۋماعىنان وتەتىن 1500 شاقىرىم­داي جول رەسپۋبليكالىق ماڭىزى بار كۇرە جول سانالادى. بۇل جولداردا قىس كەزىندە كىدىرىسسىز قوز­عا­­لىستى قامتاماسىز ەتۋ – وتە ماڭىزدى ماسەلە. بۇل ءۇشىن 359,204 ملن تەڭگە قارجى بولىنگەن. بۇل اۋماقتا جول قوزعالىسىنىڭ كەدەرگىسىز بولۋىنا نەگىزىنەن «قازاقاۆتوجول» مەكەمەسىنىڭ وبلىستىق فيليالى جاۋاپ بەرەدى. مەكەمە باسشىلارى قاجەتتى تەحنيكا تولىق دايىن ەكەندىگىن حابارلاپ وتىر. ال قاجەتتى قوسىمشا ماتەريال – قۇمنىڭ 50 پايىز مولشەرى, تۇزدىڭ 55 پايىز كولەمى قازىردىڭ وزىندە جەتكىزىلگەن.

قىسقاسى, ەلىمىز بويىنشا اسفالت جولدارى ەڭ از اقجايىق وڭىرىندە جول ازابىن شەگەتىندەر قاتارى جىل سايىن ازايىپ كەلەدى. دەگەنمەن وبلىس تۇرعىندارى تالاي جىلدان كۇتكەن ورال – جانىبەك – بوكەي وردا جولىنىڭ قۇرىلىسى باياۋ ءجۇرىپ جاتقانىنا حالىق الاڭداپ وتىر. ەلباسىنىڭ تىكەلەي تاپسىرماسىمەن قولعا الىنعان بۇل جولدىڭ قۇرىلىسى جوبا بويىنشا 2021 جىلدىڭ سوڭىنا دەيىن اياقتالۋى ءتيىس.

باتىس قازاقستان وبلىسى