شىمكەنت قالاسىنىڭ م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە ەكى كۇن بويى رەسپۋبليكالىق پىكىرسايىس ءوتتى.
ءداستۇرلى Nur Otan پارتياسىنىڭ اۋىسپالى كۋبوگىنە ارنالعان XVIII رەسپۋبليكالىق پىكىرسايىس تۋرنيرىنە ەلىمىزدىڭ تۇكپىر-تۇكپىرىنەن 36 كوماندا قاتىستى. Jas Otan جاستار قاناتى مەن ۇلتتىق پىكىرسايىس فەدەراتسياسى ۇيىمداستىرعان سايىس بريتاندىق جانە امەريكالىق پارلامەنتتىك فورماتتا ءوتتى. قاتىسۋشىلار جالپى جۇلدە قورى 2 ملن تەڭگە ءۇشىن بارىن سالدى.
ۇلتتىق پىكىرسايىس فەدەراتسياسىنىڭ پرەزيدەنتى بولات بۇحارباي ءداستۇرلى ءتۋرنيردىڭ باستى ماقساتىنا توقتالا كەلە, اتالعان سالادا ۇرپاقتار ساباقتاستىعى جاقسى جولعا قويىلعانىن باسا ايتتى.
«پىكىرسايىس ءتۋرنيرىنىڭ ماقساتى – ءوز ويىن ەمىن-ەركىن, ناقتى ءارى دايەكتى جەتكىزە الاتىن, تالانتتى, ءبىلىمدى جاستاردى قولداۋ. بۇل – پارتيا تاراپىنان قولداۋ تاپقان كەزەكتى 18-تۋرنير. مۇنى پىكىرسايىس سالاسىنداعى ۇلكەن جەتىستىك دەۋگە بولادى. شارانىڭ قۇرمەتتى قوناقتارى قاتارىندا تۋرنيرگە ون جىل بۇرىن قاتىسقان اعا بۋىن وكىلدەرىنىڭ قاتىسۋى – ۇرپاقتار ساباقتاستىعىنىڭ ايقىن كورىنىسى», دەپ اتاپ ءوتتى ب.بۇحارباي.
ءتۋرنيردىڭ اقتىق كەزەڭىنە جەتكەنگە دەيىن قاتىسۋشىلار وڭىرلەردە ىرىكتەۋدەن وتكەن. م.اۋەزوۆ اتىنداعى وقمۋ «اقيقات» دەبات كلۋبىنىڭ مۇشەسى اقەركە ەرمۇحان تۋرنير سانيتارلىق تالاپتارعا سايكەس وتكەنىن اتاپ ءوتتى. «ەلىمىزدىڭ تۇكپىر-تۇكپىرىنەن پىكىرسايىسشىلار جينالىپ, وزەكتى تاقىرىپتار بويىنشا وتە قىزىقتى پىكىرتالاس وتكىزدى. فينالدا سپيكەرلەر تۇرمىستىق زورلىق-زومبىلىققا قارسى ءىس-قيمىلدىڭ ءتيىمدى تەتىكتەرىنە قاتىستى پىكىر تالاستىردى. بۇل الاڭدا ايتىلعان يدەيالار مەن ۇسىنىستاردى زورلىق-زومبىلىق ستاتيستيكاسىن ازايتۋ ءۇشىن پايدالانۋعا بولادى», دەدى ا. ەرمۇحان.
جاستار «شۆەد مودەلى» ءتيىمدى مە؟», «ونلاين وقىتۋدى تۇراقتى تاجىريبەگە اينالدىرعان دۇرىس پا؟» «پرايمەريزدىڭ ناتيجەسى قانداي؟» دەگەن سەكىلدى وزگە دە وزەكتى ماسەلەلەر توڭىرەگىندە پىكىرلەرىن ايتىپ, ۇتىمدى ويلارىن ورتاعا سالدى.
Jas Otan جاستار قاناتىنىڭ جەتەكشىسى ەلنۇر بەيسەنباەۆ شىمكەنت قالاسىندا وتكەن فينالعا ەلىمىزدىڭ ەڭ مىقتى پىكىرسايىس كوماندالارى كەلگەنىنە سەنىمدى.
«جاستار اراسىنداعى پىكىرسايىسقا پرايمەريز, تۇرمىستىق زورلىق-زومبىلىق, سۋيتسيد سەكىلدى 12 وزەكتى تاقىرىپ الىندى. ءبىز وسى ماسەلەلەردى شەشۋدە جاستاردىڭ پىكىرىن ەسكەرۋ ماڭىزدى ەكەنىن ءتۇسىنۋىمىز كەرەك. پىكىرسايىس – ىمىراعا كەلۋدىڭ جاقسى قۇرالى. پرايمەريز كەزىندە كوپشىلىك الدىنداعى پىكىرسايىستار وسىعان دالەل بولدى. سونداي-اق بۇل تۋرنير وزىق ويلى جاستاردى قولداۋعا ىقپال ەتەدى», دەدى Jas Otan جەتەكشىسى.
جەڭىمپازداردى شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان, م.نارىكباەۆ اتىنداعى قازمزۋ باسقارما توراعاسىنىڭ ورىنباسارى ەربولات مۇحامەدجان, شىمكەنت قالاسىنىڭ Nur Otan پارتياسى توراعاسىنىڭ ورىنباسارى ءمۇراتالى قالمۇرادوۆ, Jas Otan جاستار قاناتىنىڭ جەتەكشىسى ەلنۇر بەيسەنباەۆ جانە ۇلتتىق پىكىرسايىس فەدەراتسياسىنىڭ پرەزيدەنتى بولات بۇحارباي ماراپاتتادى.
«ۇزدىك تورەشى» اتالىمىن «اقيقات» پىكىرسايىس كلۋبىنىڭ وكىلى شىدەرباي ءابدىساتتار يەلەندى. پەتروپاۆل قالاسىنىڭ «يمپەراتور» فراكتسياسى «بەلسەندى قاتىسۋشى» اتالىمىنا جانە 100 مىڭ تەڭگە كولەمىندەگى سەرتيفيكاتقا يە بولسا, ءۇشىنشى ورىن مەن 200 مىڭ تەڭگە جۇلدەنى الماتى قالاسىنىڭ قازاق ليگاسىندا «KN» كومانداسى جانە ورىس ليگاسىندا كوكشەتاۋ قالاسىنىڭ «ۆاگابۋند» كومانداسى الدى. ال ەكىنشى ورىن مەن 300 مىڭ تەڭگە كولەمىندەگى سەرتيفيكاتتى قازاق جانە ورىس ليگالارىندا دا نۇر-سۇلتان قالاسىنىڭ پىكىرسايىسشىلارى ۇتىپ الدى. قازاق ليگاسىندا ءبىرىنشى ورىنعا الماتى قالاسىنىڭ «پرايمەريز» توبى, ورىس ليگاسىندا «پاۆلودار» توبى يەلەنىپ, 400 000 تەڭگە كولەمىندەگى جۇلدەگە يە بولدى. سونداي-اق «پرايمەريز» كومانداسىنىڭ پىكىرسايىسشىسى جارىلقاسىن ساقتاعان «ۇزدىك سپيكەر» اتاندى.