قورعانىس مينيسترلىگىنىڭ باستاماسى بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ باسشىلىعىمەن كەزدەسۋ ءوتتى, دەپ حابارلايدى Egemen.kz اگەنتتىكتىڭ ءباسپاسوز قىزمەتىنە سىلتەمە جاساپ.
نەگىزگى كۇن ءتارتىبى قارۋلى كۇشتەر قاتارىندا جەمقورلىقتىڭ الدىن الۋ باعىتى بويىنشا ءوزارا ءىس-قيمىل ماسەلەلەرىنە باعىتتالعان.
ءىس-شاراعا سىبايلاس جەمقورلىققا قارسى قىزمەت جانىنداعى قوعامدىق كونسۋلتاتيۆتىك-كەڭەسشى ورگانداردىڭ وكىلدەرىمەن قاتار اسكەر تۇرلەرىنىڭ باس قولباسشىلارى, وڭىرلىك قولباسشىلىقتاردىڭ, اسكەر تەكتەرىنىڭ قولباسشىلارى, جەرگىلىكتى اسكەري باسقارۋ ورگاندارىنىڭ جانە اسكەري پوليتسيانىڭ باستىقتارى قاتىستى.
كەزدەسۋگە قاتىسۋشىلارعا ارناعان سوزىندە قورعانىس ءمينيسترى نۇرلان ەرمەكباەۆ جاسالعان مەموراندۋم اياسىنداعى كاسىبي قولداۋ, تاجىريبەلىك كومەك جانە ىنتىماقتاستىق ءۇشىن اگەنتتىككە العىسىن ءبىلدىردى.
اليك شپەكباەۆ جەمقورلىققا قارسى باستامالاردىڭ ىسكە اسىرىلۋ بارىسىن جاريا ەتە وتىرىپ, جەكە جاۋاپكەرشىلىك تۋرالى نورمالار اياسىندا سىبايلاس جەمقورلىق قۇقىق بۇزۋشىلىقتاردىڭ الدىن الۋىن السىرەتەتىن باسشىلارعا قاتىستى قاعيداتتىق شەشىمدەر قابىلداۋدىڭ, جەمقورلىق تاۋەكەلدەرىنە ىشكى تالداۋلاردى ساپالى ورىنداۋدىڭ جانە مەملەكەتتىك ورگاننىڭ ءمانماتىنى ەسكەرىلگەن وزىندىك باستامالاردى پىسىقتاۋدىڭ ماڭىزدىلىعىن اتاپ ءوتتى.
"ارميا پاراساتتىلىقتىڭ, ءتارتىپ پەن تازالىقتىڭ تىرەگى بولۋى كەرەك. ورتالىق دەڭگەيدە وسى باعىتتا قولداۋعا لايىق ماڭىزدى قادامدار قابىلدانۋدا. اسكەري بولىمدەردە الدىن الۋ شارالارىن كۇشەيتۋ تالاپ ەتىلەدى. سونىمەن قاتار, وزىق تەحنولوگيالاردى ەنگىزە وتىرا, اسكەري ءبولىم قوعام الدىندا ارميانىڭ تىرەگىنە اينالاتىن ازاماتتارمەن ءوزارا ارەكەتتەسۋدىڭ ۇلگىلى "تەرەزەسىنە" اينالۋى كەرەك. بۇل تۇرعىدا تۇرمىستىق جەمقورلىقتىڭ الدىن الۋ ماقساتىندا مەملەكەتتىك قىزمەتتەردى اۆتوماتتاندىرۋ جانە تسيفرلاندىرۋ ماسەلەلەرىنە ەرەكشە نازار اۋدارۋ قاجەت", دەپ اتاپ ءوتتى اگەنتتىك توراعاسى.
سپيكەرلەر ەلىمىزدىڭ قورعانىس قابىلەتىن قامتاماسىز ەتۋ جانە مەملەكەتتى سىرتقى قاتەرلەردەن قورعاۋدىڭ ستراتەگيالىق مىندەتتەرىن ەسكەرە وتىرىپ, جەمقورلىقتىڭ الدىن الۋ جالپى قورعانىس مينيسترلىگى مەن قارۋلى كۇشتەر قىزمەتىندە ماڭىزدى ءرول اتقاراتىنىن اتاپ ءوتتى.
قورعانىس ءمينيسترى نۇرلان ەرمەكباەۆ ۆەدومستۆودا سىبايلاس جەمقورلىققا قارسى ءىس-قيمىل بويىنشا ىشكى قاۋىپسىزدىك فۋنكتسيالارىمەن باسقارما قۇرۋ تۋرالى ايتىپ بەردى. ول اسكەري قىزمەتكە كەلىسىمشارت بويىنشا مەملەكەتتىك, اسكەري قىزمەتتەن, ارنايى جانە قۇقىق قورعاۋ ورگاندارىنان تەرىس سەبەپتەرمەن بوساتىلعان تۇلعالار قابىلدانبايتىنىن اتاپ ءوتتى.
مينيسترلىكتىڭ سىبايلاس جەمقورلىققا قارسى ءىس-قيمىل كوميسسياسىنىڭ جۇمىسى – نورماتيۆتىك قۇقىقتىق قوردى تالداۋدا جانە تاۋەكەلدىڭ "ايماقتارىن" انىقتاۋدا باستاپقى نۇكتە. اسكەري قىزمەتكە شاقىرۋ, مەملەكەتتىك ساتىپ الۋدى ىسكە اسىرۋ, جەكە قۇرامدى تاماقتاندىرۋ جۇمىسىن ۇيىمداستىرۋدى باقىلاۋ, كۇردەلى قۇرىلىس, تۇرعىن ءۇيدى ءبولۋ سالالارىندا جانە باسقا دا ماسەلەلەر بويىنشا 90-عا جۋىق ۇسىنىمدار ازىرلەندى.
اتاپ ايتقاندا, اسكەرگە شاقىرۋدى كەيىنگە قالدىرۋدى ۇسىنۋ جانە ودان بوساتۋ بويىنشا ەكى مەملەكەتتىك قىزمەت ەلەكتروندىق ۇكىمەت پورتالى ارقىلى اشىق كورسەتىلەتىن بولادى.
"قورعانىس مينيسترلىگى ازاماتتاردىڭ ايرىقشا سەنىمىنە يە. قوعاممەن كەرى بايلانىس دەڭگەيىن ودان ءارى ارتتىرۋ ماقساتىندا "قارۋلى كۇشتەر – ادالدىق الاڭى" جوباسى اياسىندا جەرگىلىكتى اسكەري باسقارۋ ورگاندارىنىڭ مەملەكەتتىك قىزمەتتەر كورسەتۋىنىڭ سەرۆيستىك مودەلىن قامتاماسىز ەتۋ قاجەت", دەپ اتاپ ءوتتى ارنايى مونيتورينگتىك توپتىڭ جەتەكشىسى ايگۇل سولوۆەۆا.
كەزدەسۋ قورىتىندىسى بويىنشا تاراپتار بىرلەسكەن كۇش-جىگەردى ەسكەرە وتىرىپ, قورعانىس ۆەدومستۆوسىنداعى جەمقورلىق دەڭگەيىنىڭ جالپى تومەندەۋ ترەندىن اتاپ ءوتتى. ارىپتەستىكتى نىعايتۋ اياسىندا اعىمداعى جىلدىڭ قاراشا ايىندا جەرگىلىكتى اسكەري باسقارۋ ورگاندارىندا جەمقورلىق تاۋەكەلدەرىنە سىرتقى تالداۋ جۇرگىزۋ تۋرالى بىرلەسكەن بۇيرىققا قول قويىلدى.