جامبىل وبلىسىندا دەنساۋلىق ساقتاۋ مەكەمەلەرىنىڭ ماتەريالدىق-تەحنيكالىق بازاسى جاڭارتىلۋدا. بۇگىن سالتاناتتى جاعدايدا وبلىس باسشىسى بەردىبەك ساپارباەۆ مەديتسينا قىزمەتكەرلەرىنە زاماناۋي جابدىقتارمەن جابدىقتالعان جاڭا اۆتوكولىكتەردىڭ كىلتتەرىن تابىستادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
وتاندىق وندىرىستەردە جابدىقتالعان جىلجىمالى مەديتسينالىق دياگنوستيكالىق كەشەندەر سەگىز اۋداندىق اۋرۋحانانىڭ بالانسىنا بەرىلدى. سونداي-اق, وبلىستىق جەدەل جاردەم ستانتسياسىنىڭ پاركى "Hyundai" ماركالى 18 رەانيموبيلمەن تولىقتى.
"مەملەكەت باسشىسىنىڭ نەگىزگى ساياساتىنىڭ باسىم باعىتتارىنىڭ ءبىرى – دەنساۋلىق ساقتاۋ سالاسىن جاڭعىرتۋ. بارلىق رەسۋرستار قازاقستاندىقتاردىڭ ءومىرى مەن دەنساۋلىعىن قورعاۋعا باعىتتالۋى كەرەك. مەديتسينالىق ۇيىمدار قاجەتتى قۇرال-جابدىقتارمەن قامتاماسىز ەتىلىپ, توسەك قورى مەن ينفراقۇرىلىمى جاڭارتىلۋدا. دارىگەرلەردىڭ جالاقىسى كوتەرىلۋدە. ءبىزدىڭ وبلىستا دەنساۋلىق ساقتاۋ سالاسىنا شامامەن 5 ميلليارد تەڭگە ينۆەستيتسيا سالىندى.
قازىرگى تاڭدا كوروناۆيرۋستىڭ ىقتيمال ەكىنشى تولقىنىنا قىزۋ دايىندىق جۇرۋدە. اتاپ ايتساق, ەكى ايلىق ءدارى-دارمەك قورى قالىپتاسىپ, 2530 توسەك-ورىن دايىندالدى, جابدىقتار ساتىپ الىنۋدا. اسفەندياروۆ اتىنداعى ۇلتتىق مەديتسينالىق ۋنيۆەرسيتەتىمەن بىرلەسىپ كادرلاردى دايارلاۋ بويىنشا ءىسى قولعا الىنىپ جاتىر", - دەگەن بەردىبەك ساپارباەۆ مەديتسينا قىزمەتكەرلەرىنە جانقيارلىق ەڭبەكتەرى ءۇشىن العىس ءبىلدىرىپ.
ول جاڭا تەحنولوگيا دارىگەرلەردىڭ ناۋقاستارعا جەتۋىن تەزدەتىپ, مەديتسينالىق كومەكتىڭ ساپاسىن ارتتىراتىنىنا سەنىم ءبىلدىردى.
مەديتسينالىق جىلجىمالى كەشەندەر جالپى قابىلداۋ بولمەلەرى, اكۋشەر-گينەكولوگ, ساۋلەلىك دياگنوستيكا, جالپى تاجىريبەلىك دارىگەر الاڭدارى, تالداۋلار قابىلداۋ ورنى, ءدارىحانا پۋنكتى, ساراپتامالىق كلاستاعى ءپورتاتيۆتى ۋدز, اينالاسىنا قاۋىپسىز رەنتگەن جانە فليۋوروگرافيامەن قامتىلعان. مۇمكىندىگى شەكتەۋلى جاندارعا ارنالعان پاندۋس-ءليفتى بار.
اۋىل تۇرعىندارىنا تار بەيىندى ماماندار قىزمەت كورسەتەدى. ولارعا "تازا جۇرەك" اكتسياسىنا قاتىسۋشى – مەديتسينالىق ەرىكتىلەر كومەكتەسپەك.
دەنساۋلىق ساقتاۋ باسقارماسىنىڭ باسشىسى اسەت قاليەۆ بۇعان دەيىن وبلىستىڭ ءۇش اۋدانى جىلجىمالى مەديتسينالىق دياگنوستيكالىق كەشەنگە يە بولعانىن اتاپ ءوتتى. ال, بۇگىنگى كەشەندەر قالعان اۋداندىق اۋرۋحانالارعا جەتكىزىلەدى. وسىلايشا, بارلىق ون اۋدان جانە وبلىس ورتالىعى جىلجىمالى كەشەندەرمەن قامتاماسىز ەتىلىپ وتىر.
"تاعى 48 جەدەل جاردەم كولىگى ساتىپ الىنادى. جەدەل جاردەم مەن جىلجىمالى مەديتسينالىق كەشەندەر دارىگەرلەردىڭ شالعايداعى اۋىلدارعا جەتۋىنە كومەكتەسەدى",- دەدى اسەت قاليەۆ.
ايماقتىڭ باس دارىگەرى كوروناۆيرۋسپەن كۇرەسۋگە ءتورت مىڭنان استام مەديتسينالىق قىزمەتكەر تارتىلعانىن ايتتى.
"جۇقتىرۋ قاۋپى جوعارى ايماقتا جۇمىس ىستەيتىن مەديتسينا قىزمەتكەرلەرىنە اي سايىنعى ۇستەماقى تولەنەدى. تولەمدەر دەنساۋلىق ساقتاۋ مينيسترلىگىنىڭ بۇيرىعىنا سايكەس جۇزەگە اسىرىلادى. كوروناۆيرۋسپەن اۋىرعان جالپى 275 مەديتسينا قىزمەتكەرى 2 ميلليون تەڭگە كولەمىندە تولەمگە قول جەتكىزدى. ولار ەپيدەمياعا قارسى شارالارعا قاتىسقان. قايتىس بولعان 20 مەديتسينا قىزمەتكەرىنىڭ وتباسىلارىنا 10 ميلليون تەڭگەدەن بەرىلدى", - دەدى اسەت قاليەۆ.
سالتاناتتى شارا بارىسىندا 12 جامبىلدىق دەنساۋلىق ساقتاۋ قىزمەتكەرى "حالىق العىسى" مەدالىمەن ماراپاتتالدى.
ءوز كەزەگىندە مەديتسينا قىزمەتكەرلەرى دە جان-جاقتى قولداۋلارعا ريزاشىلىقتارىن ءبىلدىردى. دارىگەرلەر وسىنداي كەشەندەردىڭ ارقاسىندا اۋىل تۇرعىندارىنا ساپالى كومەك كورسەتە الاتىندىقتارىن, بۇل وبلىس تۇرعىندارىنىڭ دەنساۋلىعىن جاقسارتۋعا ىقپال ەتەتىندىگىن اتاپ ءوتتى.