ەنەرگەتيكا مينيسترلىگى اي سايىن قازاقستاننىڭ ىشكى نارىعىنا سۇيىتىلعان مۇناي گازىن جەتكىزۋ جوسپارىن بەكىتەدى. ول اكىمدىكتەردەن كەلىپ تۇسكەن جيىنتىق وتىنىمدەر نەگىزىندە جاسالادى. سۇيىتىلعان گازدى ىشكى نارىققا جەتكىزۋدى 9 ءوندىرۋشى زاۋىت جۇزەگە اسىرادى.
رەسمي مالىمەتتەرگە سايكەس, 2019 جىلى سۇيىتىلعان مۇناي گازىنىڭ ءوندىرىسى 3,2 ملن توننانى قۇرادى. بيىل دا وسى كورسەتكىش بولادى دەپ كۇتىلۋدە. 2019 جىلى ىشكى نارىقتا تۇتىنۋ كولەمى 1,4 ملن توننانى قۇرادى, ال سمگ تۇتىنۋ بولجامى 1,5 ملن توننا بولادى دەپ كۇتىلۋدە. بۇل تۋرالى ورتالىق كوممۋنيكاتسيالار قىزمەتىندە ەم گاز جانە مۇناي-گاز-حيميا دەپارتامەنتىنىڭ ديرەكتورى زياش قياقباەۆ مالىمدەدى.
«ەلىمىزدە سۇيىتىلعان گازعا بەلگىلەنگەن شەكتى كوتەرمە باعا تونناسىنا 43 345 تگ. قۇرايدى (ققس قوسا العاندا). بۇل باعا شەكارالاس جانە كورشى ەلدەردەگى ەكسپورتتىق باعالاردان عانا ەمەس, كوتەرمە باعالاردان دا تومەن. مىسالى, رەسەيدىڭ شەكارالاس وبلىستارىندا باعا تونناسىنا 164 100 تگ., تاجىكستاندا – تونناسىنا 182 750 تەڭگە. قازاقستانداعى جانە كورشى ەلدەردەگى اتالىپ وتكەن باعالارداعى ايتارلىقتاي وزگەشەلىك ءوز كەزەگىندە ىشكى نارىقتا جەتىسپەۋشىلىكتىڭ تۋىنداۋىنا جانە كولەڭكەلى ەكسپورتقا الىپ كەلۋى مۇمكىن. بۇل ءوز كەزەگىندە, ىشكى نارىقتا دەفيتسيتتىڭ ورىن الۋىنا اكەلەدى. مۇنداي جاعدايلار 2017 جىلى ورىن العان, وسى فاكتىلەردى انىقتاۋ ءۇشىن ەنەرگەتيكا مينيسترلىگى ءتيىستى ۋاكىلەتتى ورگاندارعا حات جولدادى», - , - دەپ اتاپ ءوتتى قياقباەۆ.
ونىڭ اتاپ وتۋىنشە, 7 قازاندا ەنەرگەتيكا مينيسترلىگى قازاقستان اۋماعىنان ءۇش جىل مەرزىم ىشىندە اۆتوكولىكپەن سمگ ەكسپورتتاۋعا تىيىم سالدى. بۇل سمگ-نى ەلدەن تىس زاڭسىز شىعارۋ جانە ىشكى نارىقتا سمگ جەتىسپەۋشىلىگىن بولدىرماۋ ءۇشىن جاسالدى.