اقساي قالاسىندا اباي قۇنانباي ۇلى, باۋىرجان مومىش ۇلى, باتىرحان شوكەنوۆ سىندى بەلگىلى تۇلعالاردىڭ سۋرەتى كوپقاباتتى تۇرعىن ۇيلەردىڭ قابىرعاسىنا سالىنعانىن بۇدان بۇرىن جازعان ەدىك. ەندى باتىس قازاقستان وبلىسىنىڭ وزگە اۋدان ورتالىقتارىندا دا وسىنداي مۋرالدار پايدا بولا باستادى, دەپ حابارلايدى Egemen.kz.
جاقىندا بوكەي ورداسى اۋدانىنىڭ ورتالىعى سايقىن اۋىلىندا قوس قاباتتى ءۇيدىڭ قابىرعاسىنا جاڭگىر حاننىڭ بەينەسى سالىندى. مۋرالدى ورالدىق سۋرەتشىلەر ياكوۆ پەن داريا پوليششۋك سالىپ شىققان.
ايتا كەتەيىك, 2021 جىلى بوكەي حاندىعىنىڭ قۇرىلعانىنا 220 جىل تولماق. 1801 جىلى نۇرالى حاننىڭ بالاسى بوكەي سۇلتان قولاستىنداعى حالقىمەن بىرگە ەدىل-جايىق وزەندەرىنىڭ اراسىنداعى بايتاق دالاعا ءوتىپ, ىشكى قازاق ورداسىنىڭ, ياعني بوكەي حاندىعىنىڭ نەگىزىن قالاعان بولاتىن.
وسى كۇندەرى اقجايىق اۋدانىنىڭ ورتالىعى چاپاەۆ سەلوسىندا دا ۇلى ابايدىڭ بەينەسى سالىنىپ جاتىر. يحسانوۆ كوشەسىندە ورنالاسقان 2 قاباتتى ءۇيدىڭ قابىرعاسىنا بەينەلەتىن بۇل مۋرال ۇلى اقىننىڭ 175 جىلدىق مەرەيتويىنا ارنالعان.
باتىس قازاقستان وبلىسى