اتىراۋ قالاسىنىڭ تۇرعىن ءۇي قورىندا اپاتتى ۇيلەر از ەمەس. قالا اكىمى قايرات ورازباەۆتىڭ مالىمەتىنە سۇيەنسەك, جىل باسىندا وسىنداي باسپانالار سانى 78-ءدى قۇراپتى. ونىڭ ىشىندە 10 جاتاقحانا دا بار. كەيىن ساراپشىلار جاساعان قورىتىندىعا سايكەس اپاتتى تۇرعىن ۇيلەردىڭ قاتارى تاعى ەكى نىسانمەن تولىققان.
– قالالىق اكىمدىكتىڭ باستى ماقساتىنىڭ ءبىرى – اپاتتى ۇيلەردىڭ تۇرعىندارىن جايلى ءارى جاڭا مەكەنگە كوشىرۋ. ەڭ باستىسى, تۇرعىنداردىڭ الەۋمەتتىك تۇرمىسىن جاقسارتىپ, جايلى ورتا قالىپتاستىرۋدى قولعا الىپ وتىرمىز. سول سەبەپتەن جاڭا باسپاناعا كوپ جىل بويى كەزەگىن كۇتكەن ازاماتتار قول جەتكىزىپ, جۇزدەگەن وتباسىنىڭ ءومىر ءسۇرۋ ساپاسى جاقسارۋدا, – دەيدى قالا اكىمى ق.ورازباەۆ.
شاھار باسشىسىنىڭ ايتۋىنشا, بيىل جىل باسىنان بەرى قالاداعى 5 كوپ قاباتتى ءۇي مەن 4 جاتاقحانانىڭ تۇرعىندارى جايلى پاتەرلەرگە قونىستاندى. وسى ماقسات ءۇشىن تۇرعىن قورىنان 410 پاتەر ءبولىندى. ەندى جىل سوڭىنا دەيىن تاعى 4 جاتاقحانانىڭ تۇرعىندارىن جاڭا باسپانامەن قامتۋعا تاعى 403 پاتەر ءبولۋ جوسپارلانىپ وتىر.
– مۇنداي باعدارلاما كەلەسى جىلى دا جالعاسىن تابادى. ويتكەنى بۇل – قالادا كۇرمەۋلى ماسەلەگە اينالعان اپاتتى ۇيلەر تۇرعىندارىنىڭ جاعدايىن جاقسارتۋعا باعىتتالعان مەملەكەتتىك قولداۋ شارالارى, – دەيدى ق.ورازباەۆ. – ەسكى ۇيلەردى بۇزۋ باعدارلاماسىمەن بىرگە, سول اۋماقتارعا ينۆەستورلار تارتۋ ارقىلى قولدانىستاعى ينفراقۇرىلىمدى پايدالانا وتىرىپ, شىعىنداردى ۇنەمدەۋ ەسەبىنەن ساپالى تۇرعىن ءۇي قورىن قالىپتاستىرىپ, حالىققا ۇسىنۋ جۇمىستارى جۇرگىزىلەتىن بولادى.
جاقىندا «نۇرسايا» شاعىن اۋدانىندا پايدالانۋعا بەرىلگەن جاڭا ۇيدە 240 پاتەر بار. وعان الدىمەن گاگارين كوشەسىندەگى اپاتتى جاتاقحانا تۇرعىندارى كوشىرىلدى. اپاتتى جاتاقحانادان جايلى پاتەرگە كوشكەن تانزيليا عيلاجەۆا: «بۇعان دەيىنگى كورگەن قيىندىقتىڭ ءبارىن ۇمىتاتىن بولدىق» دەپ قۋانسا, كوپبالالى انا جۇماگۇل ايتۋاروۆا: «باسپاناعا يە بولىپ, باقىتتان باسىم اينالىپ تۇر» دەپ قۋانىشىن جاسىرا المادى.
مۇنايلى ءوڭىر ورتالىعىندا جاڭادان بوي كوتەرگەن شاعىن اۋداننىڭ قاتارىندا «بەرەكە» دە بار. مۇندا «نۇرلى جەر» باعدارلاماسىمەن بىرنەشە تۇرعىن ءۇي بوي كوتەردى. جاقىندا حالىقتىڭ الەۋمەتتىك تۇرمىسى تومەن توپتارىنا ارنالعان 72 پاتەرى بار 9 قاباتتى ءۇي پايدالانۋعا بەرىلدى. اتىراۋ قالالىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوكولىك جولدارى ءبولىمىنىڭ سەكتور مەڭگەرۋشىسى رافحات جولديەۆتىڭ ايتۋىنشا, قازىر تۇرعىن ءۇي كەزەگىندە 21 مىڭ ادام تۇر. ال مەملەكەتتىك تۇرعىن ءۇي باعدارلاماسىمەن بەرىلگەن جالدامالى پاتەرلەردىڭ قۇنى قىمبات ەمەس.
– ەكى بولمەلى باسپانا العان تۇرعىندار ايىنا 7-8 مىڭ تەڭگەدەن تولەيدى. جىل اياعىنا دەيىن تاعى دا وسىنداي ءتورت ءۇي پايدالانۋعا بەرىلەدى. سول ۇيلەردەن تاعى دا 300-گە جۋىق وتباسىنىڭ جاڭا باسپانا الاتىنى جوسپارلانىپ وتىر. جالپى, جىل باسىنان بەرى 291 ادامعا پاتەر بەرىلدى, – دەيدى ر.جولديەۆ.
جاڭا باسپانا الۋ باقىتىنا بولەنگەندەردىڭ قاتارىنداعى مارجان بۋراباەۆانىڭ قۋانىشىندا شەك جوق. ويتكەنى ول وتباسىمەن بىرگە پاتەر جالداعانىنا 13 جىل بولىپتى.
– بىرەۋدىڭ پاتەرىن جالداۋدىڭ ماشاقاتى كوپ. ءبىر كۇنى «سۋدى كوپ پايدالانبا, ەلەكتر ەنەرگياسىنىڭ اقشاسى كوبەيىپ كەتتى, پاتەرىمدى بوسات» دەۋى مۇمكىن. مۇنداي سوزدەردى ەستىسەك تە, سوعان شىداپ كەلدىك. ويتكەنى ءوزىمىزدىڭ باسىبايلى باسپانامىز بولمادى. ءبىز از قامتىلعان وتباسىلاردىڭ ساناتىندامىز. سوندىقتان 2008 جىلى تۇرعىن ءۇي كەزەگىنە تىركەلدىك. ەندى مىنە, ەكى بولمەلى پاتەرگە يە بولدىق. وتباسىمىزبەن بىرگە قۋانىپ تا, تولقىپ تا تۇرمىن. پاتەر بولمەلەرى كەڭ ءارى جارىق. جەدەلساتى جۇمىس ىستەپ تۇر, – دەيدى باسپانا تاۋقىمەتىن تارتقان مارجان بۋراباەۆا.
اتىراۋ وبلىسى