قۇتقارۋشىلار كۇنىنە وراي توتەنشە جاعدايلار دەپارتامەنتىنىڭ ارنايى تەحنيكالارى جاڭا 8 كولىكپەن تولىقتى. توتەنشەلىكتەردى وبلىس اكىمى ماحامبەت دوسمۇحامبەتوۆ قۇتتىقتاپ, ۇزدىكتەرگە العىس حات تابىس ەتتى, دەپ حابارلايدى Egemen.kz.
"قۇتقارۋشى – ءاردايىم جوعارى دايىندىقتى, ۇلكەن جاۋاپكەرشىلىكتى, سونداي-اق كاسىبي ىسكەرلىك پەن قىراعىلىقتى تالاپ ەتەتىن ماماندىق. توتەنشە جاعدايلاردىڭ الدىن الىپ, وقىس وقيعانى اۋىزدىقتاۋدا قۇتقارۋشىلار لايىقتى ۇلەسىن قوسىپ كەلەدى", دەدى وبلىس اكىمى ماحامبەت دوسمۇحامبەتوۆ.
"بەيبارىس سۇلتان" الاڭىندا توتەنشە جاعدايلار دەپارتامەنتىنىڭ يەلىگىندەگى ءورت ءسوندىرۋ, اۆاريالىق-قۇتقارۋ تەحنيكالارىنىڭ كورمەسى ءوتىپ, گيدروتسيكل, جول تالعامايتىن "ترەكول", "حولماترو" سەكىلدى وسى زامانعى 17 ءتۇرلى كولىك قويىلدى. دەپارتامەنت باستىعى, ازاماتتىق قورعاۋ پولكوۆنيگى ومار بەرجانوۆتىڭ مالىمەتىنشە, قازىر قۇرىلىمدا 690 قىزمەتكەر, ءارتۇرلى 118 تەحنيكا بار. سونىڭ ىشىندە 53 ءورت ءسوندىرۋ, 19 ارنايى, 46 قوسىمشا, 20-دان استام ءجۇزۋ تەحنيكاسى ءورت ءسوندىرۋ, اۆاريالىق-قۇتقارۋ جۇمىستارىنا جۇمىلدىرىلادى. قۇتقارۋشىلارعا "گروم", "ابرەك" اتتى ەكى ءيتتىڭ دە كومەگى تيەدى.
كورمەدەگى تەحنيكالارعا قىزىعۋشىلىق تانىتقان بالالار ءورت ءسوندىرۋ ماشيناسىنىڭ كابيناسىنا, گيدروتسيكلگە وتىرىپ, قۇتقارۋشىلاردىڭ كاسكاسىن كيدى. جۇرتشىلىقتىڭ نازارىن "گروم" مەن "ابرەك" كوبىرەك اۋداردى.