«استانا وپەرا» تەاترىنىڭ ءانشىسى سالتانات احمەتوۆا گەرمانياداعى ەڭ ايتۋلى بايقاۋلاردىڭ ءبىرى – «Neue Stimmen»-گە قاتىسىپ, گيۋتەرسلوداعى «كلاسسيكالىق كۇز» («Klassik Herbst in Gutersloh Forderprei») سىيلىعىن يەلەندى.
«استانا وپەرا» تەاترىنىڭ ءانشىسى سالتانات احمەتوۆا گەرمانياداعى ەڭ ايتۋلى بايقاۋلاردىڭ ءبىرى – «Neue Stimmen»-گە قاتىسىپ, گيۋتەرسلوداعى «كلاسسيكالىق كۇز» («Klassik Herbst in Gutersloh Forderprei») سىيلىعىن يەلەندى.
ايتا كەتۋ كەرەك, بۇل بايقاۋعا الەمنىڭ ءار تۇكپىرىنەن 1428 ادام ءوتىنىم بىلدىرگەن, ال ولاردى ىرىكتەي كەلگەندە بار-جوعى 40 ءانشى عانا بايقاۋ تالابىنا لايىقتى دەپ تابىلعان. «مىڭنان – تۇلپار, جۇزدەن – جۇيرىك», دەمەكشى, ەڭ سوڭعى تۋرعا تەك 9 ءانشى عانا سۇرىنبەي جەتتى. شاشاسىنا شاڭ جۇقپاعان سول توعىزدىقتىڭ ىشىندە قازاقتىڭ سالتانات ەسىمدى ارۋ قىزى بارىن ەستىپ, قۋانىپ جاتىرمىز. سالتانات احمەتوۆا ىرىكتەۋ كەزەڭىندە گ.گەندەلدىڭ «يۋلي تسەزار» وپەراسىنان كلەوپاترانىڭ ارياسىن ورىنداپ شىقتى. «بۇل بايقاۋعا قاتىسۋ ءۇشىن الدىمەن قازىلار القاسى ءۇش اي بويى ىرىكتەۋ جۇرگىزدى. بۇعان دۇنيە جۇزىنەن قانشاما تالانتتى جاستار قاتىستى. مەن بەرليندەگى ىرىكتەۋدەن ءوتتىم. قازاقستاننان بۇل سايىسقا انشىلەردىڭ ءبىرىنشى رەت قاتىسۋى, دەيدى س. احمەتوۆا. – قاتىسۋشىلاردى وتە جوعارى دەڭگەيدەگى پيانيستەر سۇيەمەلدەپ وتىردى. قازىلار القاسىنىڭ قۇرامىندا ەۋروپاداعى, امەريكاداعى ءىرى-ءىرى تەاترلاردىڭ باسشىلارى مەن باسقا دا اگەنتتىكتەردىڭ ديرەكتورلارى بولدى. مۇنداي بايقاۋلاردىڭ, اسىرەسە, جاستار ءۇشىن كومەگى اسا زور. بۇكىل الەمگە تۋعان ەلىڭنىڭ داڭقىن ءوز ونەرىڭ ارقىلى اسىرۋدان اسقان بيىك شىڭ جوق شىعار, ءسىرا. ەكىنشى ءبىر جاعىنان الىپ قاراعاندا, ول ەۋروپاعا باستاپ باراتىن جولدىڭ كىلتى سەكىلدى. جانە دە مىقتىلارمەن باسەكەلەسە كەلە وزىڭە سىن كوزبەن قاراۋدى ۇيرەنەسىڭ, ءارى بۇل وزگەنىڭ پايدالى, جاقسى جاقتارىن كادەڭە جاراتۋىڭا مۇمكىندىك تۋعىزاتىن الاڭ. ونەر جولى – ءومىر بويى كورگەن-ءبىلگەنىڭدى ساناعا توقۋمەن وتەتىن مەكتەپ».
ءانشى جارتىلاي فينالدا موتسارتتىڭ «سيقىرلى فلەيتا» وپەراسىنان ءتۇن پاتشايىمى ارياسىن شىرقاسا, سوڭعى تۋردا ەكى اريا – گاەتانو دونيتسەتتيدىڭ «ليۋچيادي لاممەرمۋر» وپەراسىنان ليۋچيانىڭ, سوسىن ماسسنەنىڭ «مانون» وپەراسىنان گاۆوتتىڭ اريالارىن ءساتتى ورىنداعان.
وپەرا انشىلەرى تۋرالى سىرتتاي ءتۇرلى قىزىق اڭگىمەلەردى ەستىپ قالىپ جاتامىز. مىسالى, بىرەۋلەر داۋىسى اشىلۋى ءۇشىن جۇمىرتقانى شيكىدەي جۇتسا, ەندى بىرەۋلەرى تىنىس جولدارىنا ارنالعان جاتتىعۋدى ورىنداپ بارىپ, كوپ الدىنا شىعۋدى ءجون سانايدى ەكەن. ال دالدىكپەن ءومىر ءسۇرىپ, ناقتىلىقتى سۇيەتىن نەمىستەردى ءبىزدىڭ قىزىمىز نەسىمەن ءتانتى ەتتى ەكەن دەپ تۇرعان شىعارسىز ىشتەي.سالتاناتتىڭ ايتۋىنشا, ۆوكالدىق گيگيەنانى مىقتاپ ۇستانعان ادام ەش جەردە ۇتىلمايدى, ياعني, داۋىس انىق ءارى شيراق شىعۋ ءۇشىن باسىڭدى ەرتەرەك جاستىققا قويىپ, ەرتە تۇرۋ وتە ماڭىزدى. تابىسقا جەتۋدىڭ تاعى ءبىر قۇپياسىن ورىنداۋدىڭ ەش قيىندىعى جوق, ول وتە قاراپايىم – تاماققا سۋىق تيگىزىپ الماۋ كەرەك. «سوندا دا بولسا اركىمنىڭ ەشكىمگە كوپ سىرىن جايا بەرمەيتىن بولەك قۇپيالارى بولادى. بۇل قانداي سىر ەكەنىن قازىر دە بۇكپەسىز ايتا الامىن. بىرەۋلەر مەيلى قۇپتار, مەيلى قۇپتاماس, كەشكىسىن مىندەتتى تۇردە اتام قازاقتىڭ ءداستۇرىمەن ەت جەيمىن. وسى ادامعا اجەپتاۋىر كۇش بەرەدى. ايتىپ قويايىن, بۇل ۇستازىم – قازاقستاننىڭ حالىق ءارتىسى قورلان قاليلامبەكوۆانىڭ بەرگەن كەڭەسى. بىراق ارينە, ءانشى ءۇشىن اۋتوترەنينگتىڭ دە ماڭىزى وتە زور بولىپ ەسەپتەلەدى. مىسالى, ەگەر ىشتەي ءوزىڭدى شوكولادتىڭ بولىگى كومەكتەسىپ, سەنى باقىتتى ەتەدى دەگەنگە سەنە بىلسەڭ, ول ءدال سولاي بولىپ شىعۋى بەك مۇمكىن», – دەيدى سالتانات.
جەتىقارا قوڭىر.
استانا.