قاراعاندى وبلىسىنىڭ اۋماعىندا بولعان قىلمىستىق وقيعالارعا قاتىستى ەكى جاڭالىق وتكەن اپتادا ەلدى كادىمگىدەي ەلەڭ ەتكىزدى. ونىڭ ءبىرى – ساتباەۆ قالاسىندا بەس جاستاعى قىز بالانى زورلاعان دەگەن كۇدىككە ىلىنگەن ەركەكسىماق كەنشىلەر استاناسىنداعى تەرگەۋ يزولياتورىندا اسىلىپ ولگەن ەكەن. بۇل تۋراسىندا وبلىستىق قىلمىستىق-اتقارۋ جۇيەسى دەپارتامەنتى رەسمي تۇردە حابارلادى.
مەكەمە تاراتقان حابارلامادا بىلاي دەپ جازىلعان: «وسى جىلدىڭ 6 قازانىندا قاراعاندى قالاسىنداعى قاج-دا كىشكەنتاي قىز بالانى زورلادى دەگەن كۇدىكپەن قاماۋدا وتىرعان ەر ادامنىڭ مۇردەسى تابىلدى. شاقىرىلعان جەدەل مەديتسينالىق كومەك بريگاداسى ءولىمدى راستادى. ءولىمنىڭ الدىن الا سەبەبى – سۋيتسيد. تەكسەرۋ بارىسىندا قايتىس بولعاننىڭ دەنەسىندە قانداي دا ءبىر زاقىمنىڭ بەلگىلەرى انىقتالعان جوق...».
ەسكە سالار بولساق, بيىلعى 23 شىلدەدە ساتباەۆ قالاسىندا ەلدى ەلەڭ ەتكىزگەن قىلمىستىق وقيعا بولعان ەدى. كەنشىلەردىڭ شاعىن قالاسىنداعى كوپقاباتتى ۇيلەردىڭ بىرىندەگى اۋلادا جۇرگەن بەس جاسار قىز بالا كەشكە قاراي ۇشتى-كۇيلى جوعالىپ كەتكەن بولاتىن. بۇل سۋىت حاباردان قۇلاقتانعان قالا جۇرتى ءتارتىپ ساقشىلارىمەن بىرگە قالانى ءتىنتىپ, ىزدەۋگە اتسالىسقان ەدى. جوعالعان بالا ەكى-ءۇش ساعاتتان كەيىن الگى ۇيدەگى پاتەرلەردىڭ بىرىنەن تابىلدى. سويتسە, كىشكەنتاي قىزدى ازعىن ەركەك اۋزىن سكوتچتاپ, ۇيدە تىعىپ ۇستاپ وتىرعان ەكەن...
وسى حاباردى ەستي سالىسىمەن اشۋ-ىزاعا بوي الدىرعان ءبىر توپ تۇرعىن كۇدىكتىنى قولدارىنا بەرۋدى تالاپ ەتىپ, پوليتسيا قىزمەتكەرلەرىمەن قاقتىعىسۋعا دەيىن بارعان. بۇل تۋراسىندا «Egemen Qazaqstan» گازەتىندە تولىعىراق جازىلدى دا («ساتباەۆتاعى سوراقىلىق», №141, 27.07.20 ج.).
سونىمەن, بەس جاستاعى بەيكۇنا ءسابيدىڭ وبالىنا قالعان, قالا حالقىن دۇربەلەڭگە سالعان ازعىندى اجال وعى وسىلايشا اباقتىدا قاماۋدا وتىرعان جەرىندە تاپتى...
ال ەكىنشى جاڭالىققا كەلسەك, الەۋمەتتىك جەلىلەردە ازىلكەش تۇرسىنبەك قاباتوۆتىڭ اتىنداعى تەمىر تۇلپاردىڭ قاراعاندى وبلىسىنىڭ اۋماعىندا, ناقتىراق ايتساق نۇرا اۋدانىنداعى احمەت اۋىلىنىڭ ماڭىندا ادام قاعىپ ولتىرگەنى تۋرالى اقپارات جەلدەي ەستى. جاڭالىق ەندى جارق ەتكەنىمەن, بۇل وقيعا ءوزى بۇدان ءبىر جىل بۇرىن, ياعني 2019 جىلدىڭ 13 قازانىندا بولعان ەكەن. سول كۇنى كەشكە تەمىرتاۋ – نۇرا – نۇر-سۇلتان تراسساسىندا جول تالعامايتىن «لەكسۋس» ماركالى كولىگى جوعارى جىلدامدىقپەن كەلىپ ادام قاققان. جاپا شەگۋشى 34 جاستاعى ەرلان ومارقۇلوۆ وقيعا بولعان جەردە تىلگە كەلمەي كەتىپتى. كەيىن بەلگىلى بولعانداي, اتالعان كولىك تۇرسىنبەك قاباتوۆتىكى بولىپ شىعادى. ال ونى جۇرگىزگەن 25 جاستاعى ازىرگە ەسىمى بەلگىسىز جاس جىگىت ەكەن.
بۇگىندە جالعىز ۇلىنان ايىرىلعان ءدادجان ومارقۇلوۆانىڭ قۇقىق قورعاۋشىلارعا دەگەن وكپەسى قارا قازانداي. ول كىسىنىڭ ايتۋىنشا, تەرگەۋشىلەر بولعان وقيعانى ءادىل, دەرەكتەردى ادەيىلەپ بۇرمالاعان. ماسەلەن, د.ومارقۇلوۆا پروكۋرورعا جازعان شاعىمىندا تەرگەۋشىنىڭ ءىستى جاپا شەگۋشى تاراپتىڭ قاتىسۋىنسىز جۇرگىزگەنىن, سونداي-اق ونىڭ پروكۋروردىڭ كەلىسىمىنسىز ايعاق زاتتاردى جويىپ جىبەرگەنىن ءمالىم ەتەدى.
ال قىلمىستىق ءىستىڭ وزىنە كەلەر بولساق, تەرگەۋشىنىڭ ۇيعارىمىمەن قىلمىس قۇرامى جوق دەگەن ۋاجبەن توقتاتىلعان ەكەن. ياعني بار كىنا جاپا شەگۋشى مارقۇمعا اۋدارىلىپ, اپات جاساعان كۇدىكتى جۇرگىزۋشى جازادان قۇتىلىپ كەتكەن. تەرگەۋ ماتەريالدارىنا سەنسەك, قازا بولعان ازاماتتىڭ قانىنان الكوگولدى ىشىمدىكتىڭ بەلگىلەرى انىقتالدى دەگەن دەرەك بار. ال ءدجيپتى تىزگىندەگەن 25 جاستاعى جىگىت وقيعا بولاردان بۇرىن جۇرگىزۋشى كۋالىگىنەن ايىرىلعان ەكەن.
قازىرگى تاڭدا بۇل وقيعاعا قاتىستى قىلمىستىق ءىستى پروكۋراتۋرا قايتارىپ الىپ, وبلىستىق پوليتسيا دەپارتامەنتىنىڭ باسقا تەرگەۋشىسىنە جىبەردى. ەندى مارقۇمنىڭ اناسىنىڭ عانا ەمەس, جاڭا تەرگەۋشىنىڭ دە بەلگىلى ارتىسكە قاتىستى بىرقاتار سۇراق تۋىنداۋى مۇمكىن. ماسەلەن, جاپا شەگۋشىنىڭ اناسى تۇرسىنبەك قاباتوۆتىڭ ءوزىنىڭ زاڭدى اۆتوكولىگىن جۇرگىزۋشى كۋالىگىنەن ايىرىلعان ادامعا بەرگەنى ءۇشىن وسى ۋاقىتقا دەيىن نە سەبەپتەن جاۋاپكەرشىلىككە تارتىلماي كەلگەنىنە نارازى.
ايتپاقشى, وسى اڭگىمە الەۋمەتتىك جەلىدە كوتەرىلە باستاعاندا ازىلكەش قاباتوۆ ەفيرگە شىعىپ, بولعان وقيعاعا ءوز مۇددەسى تۇرعىسىنان تۇسىنىك بەردى. «مەن ول جىگىتكە «قولىڭمەن ىستەگەنىڭدى موينىڭمەن كوتەر, مەن ارالاسپايمىن» دەپ ايتتىم. بىرەۋلەر «تۇرسىنبەك اقشا بەردى» دەدى. مەن ەشكىمگە xابارلاسقان ەمەسپىن. بۇل ىسكە ارالاسقان جوقپىن. ماعان قويعان سۇراقتارعا جاۋاپ بەردىم. مەن ونىڭ كۋالىگى جوعىن بىلمەيمىن. سوندىقتان ايتارىم: قازىر ءارتۇرلى اقپارات تاراپ جاتىر, ءيا, مەن ونىڭ باسىندا بولماسام دا, كولىك سەنىكى عوي دەپ كىنا تاعىپ جاتقاندار بولسا, مەن كەشىرىم سۇرايمىن. بىراق مەن ول كولىكتىڭ ىشىندە بولعان ەمەسپىن. سىزدەرگە ايتارىم وسى», دەپ اقتالدى ءارتىس.
قالاي بولعان كۇندە دە, جۇرتتىڭ نازارىن اۋدارعان بۇل وقيعالاردىڭ نەمەن اياقتالعانىن الداعى ۋاقىتتا نازاردا ۇستايتىن بولامىز.
قاراعاندى وبلىسى