تانىمايتىن ادامدى دورەكى سوزبەن بالاعاتتاعان جۇرگىزۋشى 12 تاۋلىككە قاماۋعا الىندى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى ءمالىم ەتتى, دەپ حابارلايدى Egemen.kz.
«ۆاز» كولىگىنىڭ جۇرگىزۋشىسى قالا تۇرعىنىن بالىقشى كەنتىنەن العاباس اۋىلىنا اپارۋ ءۇشىن تاكسي قىزمەتىن ۇسىنعان. بىراق دىتتەگەن جەرگە جەتكەنشە, جولاۋشىنىڭ ار-نامىسىنا ءتيىپ, ءتىپتى بالاعاتتاپ جىبەرگەن. كولىك جۇرگىزۋشىسىنەن مۇنداي تەرىس قىلىقتى كۇتپەگەن ازاماتشا №1 اتىراۋ قالالىق پوليتسيا بولىمىنە شاعىمدان ءتۇسىرىپتى.
«اتالعان شاعىمعا سايكەس پوليتسيا اعا لەيتەنانتى ريشات جامەلوۆ تاكسي جۇرگىزۋشىسىن جەدەل انىقتاپ, تەكسەرۋ جۇرگىزدى. كولىك جۇرگىزۋشىسى – 46-جاستاعى ازاماتقا قاتىستى قر اكىمشىلىك قۇقىقبۇزۋشىلىق تۋرالى كودەكسىنىڭ 434-بابى (ۇساق بۇزاقىلىق), 571-بابى (زاڭسىز كىسى تاسىمالداۋ) جانە 612-بابىمەن (جۇرگىزۋشى كۋالىگى جوق) حاتتامالار راسىمدەلدى. سوت شەشىمىمەن تاكسي جۇرگىزۋشىسى 12 تاۋلىككە اكىمشىلىك قاماۋعا الىندى» دەپ حابارلادى دەپارتامەنتتىڭ ءباسپاسوز قىزمەتى.