وسكەمەندە «قاراسورا» جەدەل پروفيلاكتيكالىق ءىس-شاراسى كەزىندە ۇزاق ۋاقىت بويى ماريحۋان ساتۋمەن اينالىسقان ازامات ۇستالدى. ول قالاداعى فيتنەس ورتالىقتارىنىڭ بىرىندە جاتتىقتىرۋشى بولىپ جۇمىس ىستەگەن, دەپ حابارلايدى Egemen.kz.
"جەدەل-ىزدەستىرۋ ءىس-شارالارى بارىسىندا ونىڭ ەسىرتكى ساتۋعا قاتىسى بار ەكەنى انىقتالدى. ال ۇستالعان كەزدە كۇدىكتىدەن 30-دان استام ءبىر رەتتىك ماريحۋانا دوزالارى تاركىلەندى", - دەدى وبلىستىق پوليتسيا دەپارتامەنتى باستىعىنىڭ ورىنباسارى تالعات شاياحمەتوۆ.
كۇدىكتى ۋاقىتشا ۇستاۋ يزولياتورىنا قاماۋعا الىندى. وقيعاعا بايلانىستى قىلمىستىق كودەكستىڭ 297-بابى, 1-بولىگى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. اتالعان باپتىڭ سانكتسياسىندا 10 جىلعا دەيىن باس بوستاندىعىنان ايىرۋ جازاسى كوزدەلگەن.
اتاپ وتسەك, 2020 جىلدىڭ باسىنان بەرى شىعىس قازاقستان وبلىسىنىڭ ەسىرتكى قىلمىستارىنا قارسى ءىس-قيمىل باسقارماسىنىڭ قىزمەتكەرلەرى 170 ەسىرتكى قىلمىسىن, ونىڭ ىشىندە 141 ەسىرتكى ساتۋ فاكتىسىن انىقتاعان. جىل باسىنان بەرى 222 كەلى ءارتۇرلى ەسىرتكى تۇرلەرى, ونىڭ ىشىندە 3,7 كەلى پسيحوتروپتىق زاتتار تاركىلەندى.