باتىس قازاقستان وبلىسىنىڭ ەكونوميكالىق تەرگەۋ دەپارتامەنتى قارجىلىق پيراميدا قۇرىپ, 2 مىڭنان اسا ادامنىڭ 68,5 ملن تەڭگەسىن جيناپ العان الاياق ايەلگە قاتىستى تەرگەۋ ءىسىن اياقتادى دەپ حابارلايدى Egemen.kz.
باتىس قازاقستان وبلىسى بويىنشا ەكونوميكالىق تەرگەۋ دەپارتامەنتى قىلمىستىق كودەكستىڭ 217-بابى - "قارجىلىق پيراميدا قۇرۋ" فاكتىسى بويىنشا بىرنەشە قىلمىستىق ءىستى تىركەپ, تەرگەۋ جۇرگىزۋدە.
سونىڭ ءبىرى "ليدەر" جانە "التىن تۇمار" قارجىلىق پيراميدالارىن ۇيىمداستىرعان ازاماتشا چ.-عا قاتىستى ءىس. بۇل الاياق ايەل "تەز ارادا بايىپ كەتەسىز" دەپ ۋادە بەرىپ, اقشانى ەكى ەسە كوبەيتىپ قايتاراتىنىنا سەندىرىپ, سەنگىش ازاماتتاردان 68 567 056 تەڭگەنى جيناپ العان. بۇل "قارجىلىق پيراميداعا" 2 مىڭنان استام ادام قاتىسقان.
"جاقىندا قىلمىستىق كودەكستىڭ 217-بابى بويىنشا سوتقا دەيىنگى تەرگەۋ اياقتالدى. بۇل ازاماتشا ىستەگەن ءىسى ءۇشىن سوت الدىندا جاۋاپ بەرەدى" دەلىنگەن ەكونوميكالىق تەرگەۋ دەپارتامەنتى تاراتقان ءباسپاسوز پاراعىندا.
بيىل اقپان ايىندا مەملەكەت باسشىسى قاسىم-جومارت توقاەۆ قۇقىق قورعاۋ ورگاندارى مەن قارجى قۇرىلىمدارىنىڭ باسشىلارىمەن كەزدەسۋىندە «قارجى پيراميداسىن» ۇيىمداستىرعان كەيبىر قارجى ۇيىمدارىنىڭ زاڭسىز ارەكەتتەرىنە نازار اۋدارعان بولاتىن.
"قۇقىق قورعاۋ ورگاندارى بولعان جاعدايدى ەگجەي-تەگجەيلى تەكسەرىپ, ازاماتتاردىڭ قۇقىعى بۇزىلۋىنا جول بەرمەۋ ءۇشىن ءتيىمدى شارالار قابىلداۋى ءتيىس" دەگەن ەدى پرەزيدەنت.
مەملەكەت باسشىسىنىڭ وسى تاپسىرماسىن ورىنداۋ ءۇشىن قازاقستان رەسپۋبليكاسى قارجى مينيسترلىگىنىڭ قارجى مونيتورينگى كوميتەتى "قارجىلىق پيراميدالارعا" قارسى ءىس-قيمىل بويىنشا اۋماقتىق ەكونوميكالىق تەرگەۋ دەپارتامەنتتەرىنىڭ جۇمىسىن ەرەكشە باقىلاۋعا العان.