كارانتيندىك شەكتەۋلەر ءالى تولىق الىنعان جوق. سوعان قاراماستان اتىراۋلىقتار توي, تۋعان كۇندى اتاپ ءوتۋ سەكىلدى شارالاردى توقتاتپاي تۇر, دەپ حابارلايدى Egemen.kz.
پوليتسيا قىزمەتكەرلەرى وتكەن جۇما-جەكسەنبىدە موبيلدىك توپتارمەن بىرگە جۇرگىزگەن رەيد كەزىندە توپ ادامدى جيناپ, توي وتكىزۋشىلەردىڭ ۇستىنەن ءتۇستى.
«اتىراۋ» ىقشاماۋدانىنداعى 17-كوشەدەگى ۇيدە 40-50 ادام, ال مەچنيكوۆ كوشەسىندەگى ۇيلەردىڭ بىرىندە 30-40 ادام قاتىسقان توي وتكىزىلگەن. ستۋدەنتتەر كوشەسىندە ورنالاسقان مەيرامحانالاردىڭ بىرىندە ءوتىپ جاتقان تويدا 80 ادام, «الماگۇل» ىقشاماۋدانىنداعى مەيرامحانادا تويلانعان تۋعان كۇندە 50-60 ادام, تايمانوۆ كوشەسىندەگى مەيرامحانادا 50-60 ادامنىڭ جيناۋىمەن توي وتكەنى انىقتالدى. «جەرۇيىق» ىقشاماۋدانىندا ورنالاسقان مەيرامحاناداعى كاراوكە-بارعا 15-20 ادام جينالعان» دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
ال «لەسحوز» ىقشام اۋدانىندا جانە ۆلاديميرسكي كوشەسىندەگى ەكى كاليان-بار يەسى دە كارانتين رەجيمىنە قاراماي, جۇمىس ىستەگەنى بەلگىلى بولدى.
وسى دەرەكتەرگە قاتىستى جيناقتالعان قۇجاتتار اتىراۋ قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جولداندى.
اتىراۋ وبلىسى