كارانتيندىك شەكتەۋدى ەلەمەي, تابىس تابۋدى كوزدەيتىندەر كىمدەر؟ وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, بۇلاردىڭ قاتارىندا تۇنگى كلۋب پەن ءدامحانا, ناۋبايحانا يەلەرى بار, دەپ حابارلايدى Egemen.kz.
"اتىراۋ قالاسىنىڭ اۆانگارد-2 ىقشاماۋدانىندا ورنالاسقان كوڭىل كوتەرۋ ورنى تۇنگى ساعات 01:00 شاماسىندا كليەنتتەرگە قىزمەت كورسەتكەن. ءارتىپ ساقشىلارى كەلگەن كەزدە تۇنگى كلۋبتا 100-گە جۋىق كليەنت بولعان. وسى ىقشاماۋدانداعى تاعى ءبىر ءدامحانا ءتۇن ورتاسى اۋعانشا جۇمىس ىستەگەنى انىقتالدى. اتالعان نىسانداردىڭ يەلەرىنە قاتىستى جيناقتالعان قۇجاتتار اتىراۋ قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن قاداعالاۋ باسقارماسىنا جولداندى", دەپ حابارلادى دەپارتامەنتتىڭ ءباسپاسوز قىزمەتى.
ال "اتىراۋ" ىقشاماۋدانىنداعى ناۋبايحانادا جۇمىسشىلاردىڭ بەتپەردە تاعۋ رەجيمىن بۇزعانى انىقتالىپتى. جۇمىسشىلار قولعاپ كيۋدى قاجەت دەپ تاپپاپتى. ءتىپتى بۇل ناۋبايحانادا وزبەكستان رەسپۋبليكاسىنىڭ ەكى ازاماتى تولقۇجاتسىز جۇمىس ىستەگەنى بەلگىلى بولىپ وتىر. ەندى ولاردىڭ كىم ەكەنى انىقتالعانشا, قالالىق پوليتسيا باسقارماسىنىڭ قابىلداۋ-تاراتۋ ورتالىعىنا ورنالاستىرىلدى.
قاۋىپتى ىندەت وسىنداي بەيعامدىقتان تارالار بولسا, كىم جاۋاپ بەرەدى؟