ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ دەپۋتاتتارى پارلامەنتتىك تىڭداۋعا دايىندىق بارىسىندا "دامۋ" كاسىپكەرلىكتى دامىتۋ قورىنىڭ باسشىلىعىمەن كەزدەسىپ, شاعىن جانە ورتا بيزنەستى مەملەكەتتىك قولداۋ ماسەلەلەرىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوميتەت توراعاسى داۋرەن ادىلبەكوۆ اتاپ وتكەندەي, «دامۋ» قورى «بيزنەستىڭ جول كارتاسى-2025», «قاراپايىم زاتتار ەكونوميكاسى» جانە باسقا دا باعدارلامالار اياسىندا قارجىلىق قولداۋدى جۇزەگە اسىرا وتىرىپ, قاداعالايتىن قارجى اگەنتى بولىپ تابىلادى.
سەناتوردىڭ ايتۋىنشا, «بيزنەستىڭ جول كارتاسى-2020» مەملەكەتتىك باعدارلاماسى 2025 جىلعا دەيىن شاعىن جانە ورتا بيزنەستى دامىتۋعا باعىتتالعان بىرقاتار ماقساتتى ينديكاتورلاردى قامتيدى. مىسالى, ونىڭ ىشىندە ءجىو-دەگى شاعىن جانە ورتا بيزنەس ۇلەسىن كەم دەگەندە 33,8% دەيىن جەتكىزۋ بار.
«دامۋ» قورىنىڭ باسقارما توراعاسى گاۋحار بورىباەۆا بۇگىنگى كۇنگە دەيىن قور بارلىق قارجىلىق باعدارلامالار بويىنشا 5,9 تريلليون نەسيەگە 95 مىڭ جوبانى قولداعانىن اتاپ ءوتتى. بيىلعى جىلى كاسىپكەرلەردىڭ بەلسەندىلىگى باسىم بولىپ وتىر. مەملەكەتتىك باعدارلامالار اياسىندا كەپىلدەندىرىلگەن 10,1 مىڭ نەسيەگە قولداۋ كورسەتىلىپ, 67,6 مىڭ جەڭىلدەتىلگەن نەسيە بەرىلدى. قور باسشىسى ونەركاسىپ سالالارى بويىنشا وڭدەۋشى ونەركاسىپ نەسيە كولەمى جاعىنان باسىم ەكەنىن, ال ەگەر قارىز الۋشىلار سانىن الاتىن بولساق, ەڭ ۇلكەن ءوسىم ساۋدا مەن اۋىل شارۋاشىلىعىندا بايقالاتىنىن اتاپ ءوتتى.
سەناتورلار شاعىن جانە ورتا بيزنەستىڭ دامۋىنا كەدەرگى بولاتىن فاكتورلار مەن تاۋەكەلدەرگە قاتىستى بىرقاتار ماسەلەلەرگە نازار اۋداردى. كەزدەسۋ بارىسىندا قاتىسۋشىلار وسى ماسەلەلەرگە قاتىستى ۇسىنىستار ەنگىزدى. پارلامەنتتىك تىڭداۋ ناتيجەلەرى بويىنشا شاعىن جانە ورتا بيزنەستى دامىتۋ ءۇشىن ۇكىمەت, مۇددەلى مەملەكەتتىك ورگاندار جانە «اتامەكەن» ۇلتتىق كاسىپكەرلەر پالاتاسىنا بىرقاتار ۇسىنىستار ازىرلەنەتىن بولدى.