اتىراۋ وبلىسى اكىمدىگىنىڭ قولداۋىمەن تىڭ باستاما قولعا الىندى, دەپ حابارلايدى Egemen.kz اتىراۋ وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.
"ويىل–قيىل–جەم–ساعىز" اتتى ەكولوگيالىق تاقىرىپتاعى بىرلەسكەن شىعارماشىلىق-زەرتتەۋ جوباسى مەملەكەت باسشىسى قاسىم-جومارت توقاەۆتىڭ "جاڭا جاعدايداعى قازاقستان: ءىس-قيمىل كەزەڭى" اتتى حالىققا ارناعان جولداۋىنان تۋىندايتىن مىندەتتەر جانە "اۋىل – ەل بەسىگى" باعدارلاماسى نەگىزىندە جۇزەگە اسىرىلادى.
جوبا اياسىندا "اتىراۋ-اقپارات" جانە "اقتوبە مەديا" جشس-تەرى اراسىندا ارىپتەستىك باعىتتاعى قارىم-قاتىناستاردى دامىتۋ, بۇقارالىق اقپارات قۇرالدارى سالاسىندا شىعارماشىلىق بايلانىستاردى ورىستەتۋ كوزدەلىپ وتىر. وسى باعىتتا بۇگىن اتالعان ەكى سەرىكتەستىكتىڭ باسشىلارى ىسقاق ەگەمبەرديەۆ پەن راۋكەن وتىنشين ءوزارا ىنتىماقتاستىق جونىندەگى مەموراندۋمعا قول قويدى.
"اقتوبە مەديا" سەرىكتەستىگىنىڭ ديرەكتورى, قازاقستان جۋرناليستەر وداعى اقتوبە وبلىستىق فيليالىنىڭ توراعاسى راۋكەن وتىنشين شىعارماشىلىق-زەرتتەۋ جوباسىنىڭ سەرىكتەسى بولىپ تابىلادى.
مەموراندۋم اياسىندا اتالعان وزەندەردىڭ احۋالى جونىندە ەكسپەديتسيالار, قوعام بەلسەندىلەرى, ءتيىستى قۇرىلىمدارمەن بىرلەسكەن ءىس-شارالاردى ۇيىمداستىرۋ سياقتى جۇمىستار جاسالادى.