سوورونباي جەەنبەكوۆ: بۇل جاعدايدان ءبىز بىرلەسىپ شىعاتىنىمىزعا سەنىمدىمىن

"قىمباتتى وتانداستار!

قىرعىزستان ەڭ قيىن كەزەڭدى باستان وتكەرۋدە.

ەشقانداي بيلىك نەمەسە لاۋازىم ادام ومىرىنەن جوعارى بولا المايدى.

وزدەرىڭىز بىلەتىندەي, مەن ادام ومىرىنە قاۋىپ توندىرمەدىم جانە "اق ءۇي" عيماراتىنا كىرگەندەرگە قارسى كۇش قولدانۋعا بۇيرىق بەرمەدىم.

سول كۇندەرى نارازىلىق بىلدىرۋشىلەردى كۇشپەن باسۋ تۋرالى شۇعىل ۇسىنىستار دا كەلدى. مەن ونى مۇلدەم قابىلدامادىم. بۇل قاقتىعىستارعا اكەلۋى مۇمكىن.

سول سەبەپتى, مەن توتەنشە جاعداي رەجيمىن ەنگىزۋ تۋرالى جارلىققا قول قويعان جوقپىن.

وڭىرلەردە مەنى قولداپ, ميتينگىگە شىعىپ, ءسوز سويلەگىسى كەلەتىن وتانداستار دا از بولمادى. مەن ولاردان بۇلاي جاساماۋىن ءوتىندىم. سەبەبى, وسى كۇندەرى حالىقتى ءبولىپ-جارۋدىڭ قانشالىقتى قاۋىپتى ەكەنىن ءوز كوزىمىزبەن كوردىك.

قۇرمەتتى وتانداستار, قىزمەتكە ورنالاسقىسى كەلگەندەر ماقساتىنا جەتتى. ەندى كوشەدە اكتسيا جاساۋدى جالعاستىرىپ جاتقان جاقتاستارىڭىزعا توقتاۋ سالۋ كەرەك. مەن تاعى دا اكتسيانى ۇيىمداستىرۋشىلار مەن ساياسي ليدەرلەردى ءبارىن زاڭدى تۇرعىدا شەشۋگە شاقىرامىن.

مەن وسى قيىن ساتتە جوعارى ازاماتتىق ۇستانىم كورسەتكەن جاستارىمىزدىڭ ەڭبەگىن زور ريزاشىلىقپەن اتاپ وتكىم كەلەدى. ءتۇن ۇيقىسىن قيىپ, ەلدەگى بەيبىتشىلىكتى, ازاماتتار مەن مەملەكەتتىڭ مەنشىگىن ساقتاۋ ءۇشىن قىزمەت ەتكەندەرگە ءدان ريزاشىلىعىمدى بىلدىرەمىن.

سوڭعى كۇندەرى كىمنىڭ نەنى كوكسەپ جۇرگەنىنە كوز جەتكىزدىك. وسى رەتتە, جاس قىرعىزستاندىقتار, سىزدەر بيلىك ءۇشىن كۇرەسكەن ۇلكەندەرگە ۇلگى بولدىڭىزدار. بيلىك ەمەس, قىرعىزستان قىمبات ەكەنىن ءسوز جۇزىندە ەمەس, ءىس جۇزىندە كورسەتتىڭىزدەر. ەل مۇددەسى بارىنەن ماڭىزدى ەكەنىن شىن دالەلدەدىڭىزدەر.

مەن بارلىق تاراپتى ۇستامدىلىققا شاقىرامىن. مەملەكەت مۇددەسى جەكە باستىڭ امبيتسياسىنان جوعارى ەكەنىن تاعى دا ەسكە سالامىن.

ءبىز بىرلەسە ءجۇرىپ بۇل قيىندىقتى جەڭەمىز دەپ سەنەمىن.

قۇرمەتتى وتانداستار, قازىرگى وزەكتى ماسەلە - قىرعىزستاندا بەيبىتشىلىك پەن قوعامدىق ءتارتىپتى قامتاماسىز ەتۋ!

قىرعىزستانعا جاراتقان جار بولسىن!»

ەسكە سالا كەتەيىك, كەشە قىرعىزستان رەسپۋبليكاسىنىڭ پرەزيدەنتى مالىمدەمە جاسادى.