بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ جالپى وتىرىسى ءوتتى. وندا دەپۋتاتتاردىڭ باستاماسىمەن ازىرلەنگەن ەلەكتر ەنەرگەتيكاسىنا قاتىستى زاڭ جوباسى ماقۇلداندى, دەپ حابارلايدى Egemen.kz پارلامەنت ءماجىلىسىنىڭ ءباسپاسوز قىزمەتىنە سىلتەمە جاساپ.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە جاڭارتىلاتىن ەنەرگيا كوزدەرىن پايدالانۋدى قولداۋ جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا جاڭا مانەۆرلىك قۋاتتاردى سالۋ ءۇشىن جاعدايلار جاساۋ كوزدەلەدى.
سونداي-اق, تاسقىندىق ەلەكتر ەنەرگياسىن ورتالىقتاندىرىلعان ساتىپ الۋ-ساتۋ تەتىگىن ەندىرۋ, جاڭارتىلاتىن ەنەرگيا كوزدەرىن قولداۋعا وتپەلى تاريف بەلگىلەۋ مەن قارجى-ەسەپ ايىرىسۋ ورتالىعىنىڭ جەك وبەكتىلەرىنەن ەلەكتر ەنەرگياسىن ساتىپ الۋ مەرزىمىن ۇلعايتۋدى قاراستىرادى. وسىعان بايلانىستى, زاڭ جوباسىندا «ەلەكتر ەنەرگەتيكاسى تۋرالى» جانە «جاڭارتىلاتىن ەنەرگيا كوزدەرىن پايدالانۋدى قولداۋ تۋرالى» قازاقستان رەسپۋبليكاسىنىڭ زاڭدارىنا وزگەرىستەر مەن تولىقتىرۋلار ەنگىزۋ كوزدەلگەن. دەپۋتاتتار - جۇمىس توبىنىڭ مۇشەلەرى قۇجاتتى تالقىلاۋ بارىسىندا «ەلەكتر ەنەرگەتيكاسى تۋرالى» زاڭنىڭ ۇعىمدىق اپپاراتىنا بىرقاتار تولىقتىرۋلار ەنگىزدى.
ال, زاڭ جوباسىنىڭ جەكەلەگەن نورمالارىن جەتىلدىرۋ ماقساتىندا جۇمىس توبى گەنەراتسيانىڭ مانەۆرلىك رەجيمى بار گەنەراتسيالايتىن قوندىرعىلاردى سالۋ جونىندەگى جوبالاردى ىسكە اسىرۋ تەتىگىنە;
-تاسقىندىق ەلەكتر ەنەرگياسىن بەرۋ كەزىندە ەنەرگيا ءوندىرۋشى ۇيىمداردى ەلەكتر ەنەرگياسىن بەرۋگە ارنالعان كورسەتىلەتىن قىزمەتتەرگە اقى تولەۋدەن بوساتۋعا;
-الداعى جىلعا ەلەكتر قۋاتىنىڭ جۇكتەمەنى كوتەرۋگە ازىرلىگىن قامتاماسىز ەتۋ بويىنشا كورسەتىلەتىن قىزمەتكە, باعانى تومەندەتۋگە قۋات نارىعىندا قالىپتاسقان قاراجاتتى باعىتتاۋعا قاتىستى نورمالاردى قابىلدادى.
سونىمەن قاتار, پالاتا بۇگىنگى وتىرىستا «كەمە قاتىناسى تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى. بۇل كەلىسىم ەۋرازيالىق ەكونوميكالىق وداققا مۇشە مەملەكەتتەردىڭ ىشكى سۋ جولدارىمەن كەمەلەردىڭ ءجۇزۋى كەزىندە تۋىندايتىن قاتىناستاردى رەتتەۋ بويىنشا بىرىڭعاي قۇقىقتىق الاڭ قۇرۋعا باعىتتالعان.
كەلىسىمدە ەۋرازيالىق ەكونوميكالىق وداققا مۇشە مەملەكەتتەردىڭ ىشكى سۋ جولدارىمەن كەمەلەردىڭ ترانزيتتىك وتۋىنە وڭايلاتىلعان رۇقسات بەرۋ ءتارتىبىن جانە ەكى جاقتى تاسىمالدار كەزىندە حابارلاما جاساۋ ءتارتىبىن ەنگىزۋ ۇسىنىلادى. سونىمەن قاتار, كەلىسىمدە تاراپتاردىڭ تاراپتار كەمەلەرى ءۇشىن پورتتاردىڭ كورسەتىلەتىن قىزمەتتەرىنە قول جەتكىزۋدىڭ تەڭ جاعدايىن ۇسىنۋى, كەمەلەر ەكيپاجى مۇشەلەرىنىڭ جەكە باسىن كۋالاندىراتىن قۇجاتتاردى ءوزارا تانۋ, سونداي-اق كەمە قۇجاتتارىن جانە تەڭىزشىلەردىڭ بىلىكتىلىك قۇجاتتارىن تانۋ كوزدەلىپ وتىر.
جالپى وتىرىستا پالاتانىڭ بەيىندى كوميتەتتەرى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە قازاقستان مەن قىرعىز رەسپۋبليكاسى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوبالارىن جۇمىسقا الدى. وتىرىس سوڭىندا ءماجىلىس دەپۋتاتتارى ا.قوڭىروۆ, ا. جامالوۆ, ب. دۇيسەنبينوۆ ش.وتەمىسوۆ, ن.ءالىمجانوۆ, ف. قاراتاەۆ مەملەكەتتىك ورگاندار باسشىلارىنا دەپۋتاتتىق ساۋالدار جولدادى.